ایک نیا رہنما اور دو بہادر عورتیں

یشوع نے کئی سالوں تک یہوواہ کے بندوں کی رہنمائی کی۔ جب وہ فوت ہوئے تو وہ 110 سال کے تھے۔ جب تک وہ زندہ تھے، بنی‌اِسرائیل یہوواہ کی عبادت کرتے رہے۔ لیکن یشوع کے فوت ہو جانے کے بعد اُنہوں نے کنعانیوں کی طرح بُتوں کی پوجا کرنی شروع کر دی۔ بنی‌اِسرائیل نے یہوواہ کی عبادت کرنی چھوڑ دی۔ اِس لیے یہوواہ نے کنعان کے بادشاہ یابین کو یہ اِجازت دی کہ وہ بنی‌اِسرائیل کا جینا مشکل کر دے۔ لوگ یہوواہ سے مدد مانگنے لگے۔ یہوواہ نے لوگوں کے لیے ایک نیا رہنما چُنا جس کا نام برق تھا۔ اُنہوں نے یہوواہ کی طرف لوٹنے میں لوگوں کی مدد کی۔‏

اُس زمانے میں ایک نبِیّہ ہوا کرتی تھیں جن کا نام دبورہ تھا۔ اُنہوں نے برق کو اپنے پاس بُلوایا اور اُنہیں یہوواہ کا یہ پیغام دیا:‏ ”‏اپنے ساتھ 10 ہزار آدمی لو اور ندی قیسون کے پاس یابین کی فوج سے لڑو۔ وہاں تُم یابین کی فوج کے سربراہ سیسرا کو ہراؤ گے۔“‏ برق نے دبورہ سے کہا:‏ ”‏مَیں وہاں تبھی جاؤں گا اگر آپ بھی میرے ساتھ جائیں گی۔“‏ دبورہ نے کہا:‏ ”‏مَیں آپ کے ساتھ جاؤں گی۔ لیکن یاد رکھنا کہ آپ سیسرا کو نہیں ماریں گے۔ یہوواہ نے کہا ہے کہ اُسے ایک عورت مارے گی۔“‏

دبورہ برق اور اُن کی فوج کے ساتھ کوہِ‌تبور پر جنگ کی تیاری کرنے گئیں۔ جیسے ہی سیسرا کو اِس بارے میں پتہ چلا، اُس نے اپنے رتھ اور فوجیوں کو وادی میں اِکٹھا کِیا۔ دبورہ نے برق سے کہا:‏ ”‏آج کے دن یہوواہ آپ کو جیت دِلائے گا۔“‏ برق اور اُن کے 10 ہزار آدمی سیسرا کی طاقت‌ور فوج سے لڑنے کے لیے پہاڑ سے نیچے گئے۔‏

پھر یہوواہ نے ندی قیسون میں سیلاب بھیجا۔ سیسرا کی فوج کے جنگی رتھ کیچڑ میں پھنس گئے۔ سیسرا اپنا رتھ چھوڑ کر بھاگ گیا۔ برق اور اُن کی فوج نے سیسرا کی فوج کو ہرا دیا۔ لیکن سیسرا بچ کر بھاگ گیا۔ وہ بھاگ کر ایک عورت کے خیمے میں چھپ گیا۔ اُس عورت کا نام یاعیل تھا۔ یاعیل نے اُسے پینے کے لیے دودھ اور اوڑھنے کے لیے کمبل دیا۔ وہ بہت تھکا ہوا تھا اِس لیے وہ سو گیا۔ یاعیل سیسرا کے پاس گئیں اور خیمے کا ایک بڑا سا کیل اُس کے سر میں ٹھونک دیا۔ سیسرا وہیں مر گیا۔‏

برق سیسرا کو ڈھونڈتے ہوئے یاعیل کے خیمے کے پاس آئے۔ یاعیل اپنے خیمے سے باہر آئیں اور اُنہوں نے برق سے کہا:‏ ”‏اندر آئیں۔ جس شخص کو آپ ڈھونڈ رہے ہیں، وہ یہاں ہے۔“‏ جب برق اندر گئے تو اُنہوں نے دیکھا کہ سیسرا مرا ہوا ہے۔ برق اور دبورہ نے یہوواہ کی تعریف میں گیت گایا کیونکہ اُس نے بنی‌اِسرائیل کو اُن کے دُشمنوں پر جیت دِلائی تھی۔ اگلے 40 سالوں تک اِسرائیل میں امن رہا۔‏