باب ۴
ابرہام کے ساتھ خدا کا عہد
خلاصہ: ابرہام خدا پر ایمان رکھتا تھا اور اُس کا فرمانبردار رہا۔ یہوواہ خدا نے وعدہ کِیا کہ وہ ابرہام کو برکت دے گا اور اُس کی اولاد کو بڑھائے گا۔
نوح کے طوفان کے بعد تقریباً ۳۵۰ سال گزر گئے تھے۔ اُس وقت ابرہام (جسے ابراہیم بھی کہا جاتا ہے) شہر اُور میں رہ رہا تھا۔ یہ خوشحال شہر اُس علاقے میں واقع تھا جو آج عراق کہلاتا ہے۔ ابرہام کا ایمان مثالی تھا۔ لیکن پھر ایک ایسا وقت آیا جب اُسے اپنے ایمان کا ثبوت پیش کرنا پڑا۔
یہوواہ خدا نے ابرہام کو اپنا وطن چھوڑ کر پردیس میں رہنے کو کہا۔ ابرہام نے فوراً اِس حکم پر عمل کِیا۔ وہ اپنی بیوی سارہ، اپنے بھتیجے لُوط اور اپنے نوکرچاکروں کے ساتھ روانہ ہو گیا۔ لمبا سفر طے کرنے کے بعد وہ ملک کنعان میں پہنچ گئے جہاں وہ خیموں میں رہنے لگے۔ پھر یہوواہ خدا نے ابرہام کے ساتھ عہد باندھا۔ خدا نے اُس سے وعدہ کِیا کہ وہ اُسے ایک بہت بڑی قوم بنائے گا، اُس کے ذریعے سب لوگ برکت پائیں گے اور اُس کی اولاد کو ملک کنعان ورثے میں ملے گا۔
ابرہام اور لُوط کے مویشیوں کی تعداد اِس حد تک بڑھ گئی کہ اُن کا اکٹھا رہنا ناممکن ہو گیا۔ ابرہام نے لُوط کو اِس بات کا انتخاب کرنے دیا کہ وہ کس علاقے میں رہنا چاہتا ہے۔ لُوط نے دریائےیردن کے سرسبز علاقے کا انتخاب کِیا۔ اُس نے شہر سدوم کے نزدیک ڈیرا ڈال لیا۔ لیکن سدوم کے لوگ یہوواہ خدا کی نظر میں نہایت بدکار اور گنہگار تھے۔
بعد میں یہوواہ خدا نے ابرہام سے وعدہ کِیا کہ اُس کی اولاد بڑھ جائے گی اور اُن کی تعداد آسمان کے تاروں کی مانند ہوگی۔ ابرہام نے اِس وعدے پر یقین کِیا حالانکہ اُس کی بیوی سارہ بانجھ تھی۔ پھر جب ابرہام ۹۹ سال کا تھا اور سارہ ۹۰ سال کی تھی تو خدا نے وعدہ کِیا کہ اُن کا بیٹا ہوگا۔ اور واقعی سارہ کا ایک بیٹا ہوا جس کا نام اضحاق رکھا گیا۔ بعد میں ابرہام کے اَور بھی بچے پیدا ہوئے۔ لیکن خدا نے وعدہ کِیا کہ جو شخص انسانوں کو نجات دلانے کے لئے بھیجا جائے گا وہ اضحاق کی نسل سے ہوگا۔
لُوط اور اُس کا گھرانہ شہر سدوم کے نزدیک رہ رہے تھے۔ لُوط نیک تھا اور اُس نے سدوم کے باشندوں کے بُرے چالچلن کو نہیں اپنایا۔ جب یہوواہ خدا نے سدوم پر اپنا غضب نازل کرنے کا فیصلہ کِیا تو اُس نے فرشتوں کے ذریعے لُوط کو آنے والی تباہی سے آگاہ کِیا۔ فرشتوں نے لُوط اور اُس کے بیویبچوں کو سدوم سے نکل بھاگنے کو کہا اور تاکید کی کہ وہ پیچھے مڑ کر نہ دیکھیں۔ پھر خدا نے آسمان سے آگ اور گندھک برسا کر سدوم اور عمورہ کے شہروں کو راکھ کر دیا۔ لُوط اور اُس کی دو بیٹیاں اِس تباہی سے بچ نکلے۔ لیکن لُوط کی بیوی نے پیچھے مڑ کر دیکھا اور وہ ہلاک ہو گئی۔ ہو سکتا ہے کہ اُس کے دل میں اُن چیزوں کی حسرت تھی جن کو وہ چھوڑ کر آئی تھی۔ خدا کی نافرمانی کرنے کی وجہ سے وہ اپنی جان سے ہاتھ دھو بیٹھی۔
—اِن واقعات کا ذکر پیدایش ۱۱:۱۰–۱۹:۳۸ میں ہوا ہے۔