پرچوں کے ذریعے بات‌چیت کیسے شروع کریں؟‏

جنوری 2018ء سے اِجلاس کے قاعدے کے سرِورق پر بات‌چیت کے لیے تجاویز دی جا رہی ہیں۔ اِس حصے کے ذریعے ہماری یہ حوصلہ‌افزائی کی گئی ہے کہ ہم اپنی توجہ لوگوں کے ساتھ بات‌چیت کرنے پر رکھیں نہ کہ صرف اُنہیں کتابیں یا رسالے وغیرہ دینے پر۔ اِس سلسلے میں مبشروں کی مدد کرنے کے لیے بات‌چیت کے لیے تجاویز کی ویڈیوز تیار کی جاتی ہیں جن میں دِکھایا جاتا ہے کہ ہم صرف بائبل کی آیت کو اِستعمال کرتے ہوئے بات‌چیت کیسے شروع کر سکتے ہیں۔ لیکن کیا اِس کا یہ مطلب ہے کہ گھر گھر مُنادی کرتے وقت ہمیں کوئی کتاب یا رسالہ وغیرہ پیش نہیں کرنا چاہیے؟ ایسا بالکل نہیں ہے۔ مثال کے طور پر ہمارے پرچے بات‌چیت شروع کرنے میں بہت مؤثر ثابت ہو سکتے ہیں۔ ہم اپنے کسی بھی پرچے کو اِستعمال کرتے وقت نیچے دیے گئے طریقے پر عمل کر سکتے ہیں:‏

1. صاحبِ‌خانہ کو پرچے کے پہلے صفحے پر لکھا سوال دِکھائیں اور اِس کے نیچے دیے گئے کسی ایک جواب کو چُننے کو کہیں۔‏

2. پرچے کو کھولیں اور صاحبِ‌خانہ کو ”‏پاک کلام کا جواب“‏ دِکھائیں۔ اگر وقت ہو تو پرچے کے اندر دی گئی معلومات میں سے کچھ پڑھیں اور اِس پر بات کریں۔‏

3. صاحبِ‌خانہ کو پرچہ دیں اور اُس کی حوصلہ‌افزائی کریں کہ وہ بعد میں اِسے پڑھے۔‏

4. جانے سے پہلے اُسے آخری صفحے پر ”‏کیا آپ جاننا چاہتے ہیں کہ .‏ .‏ .‏ “‏ کے تحت دیا گیا سوال دِکھائیں اور بائبل سے اِس کے جواب پر بات کرنے کے لیے دوبارہ ملنے کا بندوبست بنائیں۔‏

جب آپ واپسی ملاقات کرتے ہیں تو اُس سوال کا جواب دیں جو آپ نے پچھلی ملاقات کے آخر پر پوچھا تھا۔ جانے سے پہلے ایک اَور سوال اُٹھائیں جس پر آپ اگلی ملاقات پر بات کریں گے۔ اگر آپ چاہیں تو آپ ہماری ویب‌سائٹ سے یا کسی ایسی کتاب یا بروشر سے سوال چُن سکتے ہیں جس کا حوالہ پرچے کے پیچھے دیا گیا ہے۔ جب آپ کو مناسب لگے تو آپ اُسے کتاب ‏”‏خدا کی طرف سے خوشخبری‏“‏ یا ہمارے تعلیم دینے کے اوزاروں میں سے کوئی کتاب یا بروشر دے سکتے ہیں۔‏