مَیں پاک کلام کو پڑھنے کا شوق کیسے پیدا کروں؟‏

آپ پاک کلام کو پڑھنے کا شوق کیسے پیدا کر سکتے ہیں اور اِس سے زیادہ سے زیادہ فائدہ کیسے حاصل کر سکتے ہیں؟ آئیں، پانچ مشوروں پر غور کریں جو بہت سے لوگوں کے لیے کارآمد ثابت ہوئے ہیں۔‏

مناسب جگہ کا اِنتخاب کریں۔‏ پاک کلام کو کسی ایسی جگہ بیٹھ کر پڑھیں جہاں خاموشی ہو اور جہاں آپ اِسے دھیان سے پڑھ سکیں۔ اچھی روشنی اور تازہ ہوا میں پاک کلام کو پڑھنے سے آپ کو زیادہ فائدہ ہوگا۔‏

سیکھنے کے لیے تیار رہیں۔‏ بائبل خدا کی طرف سے ہے اور اِس کے ذریعے ہم خدا سے تعلیم حاصل کر سکتے ہیں۔ لہٰذا اِس سے بھرپور فائدہ حاصل کرنے کے لیے ایک ایسے بچے کی طرح بنیں جو اپنے ماں باپ سے سیکھنا چاہتا ہے۔ اگر آپ کے ذہن میں پاک کلام کے بارے میں کوئی منفی سوچ ہے تو اِسے نکالنے کی کوشش کریں تاکہ آپ خدا سے تعلیم پا سکیں۔—‏زبور 25:‏4‏۔‏

پڑھنے سے پہلے دُعا کریں۔‏ پاک کلام میں خدا کے خیالات درج ہیں۔ لہٰذا اِسے سمجھنے کے لیے ہمیں خدا کی مدد کی ضرورت ہے۔ خدا نے وعدہ کِیا ہے کہ وہ اُن لوگوں کو ’‏پاک روح دے گا جو اُس سے مانگتے ہیں۔‘‏ (‏لُوقا 11:‏13‏)‏ پاک روح خدا کے خیالات کو سمجھنے میں آپ کی مدد کر سکتی ہے۔ وقت کے ساتھ ساتھ یہ آپ کو اِس قابل بنا سکتی ہے کہ آپ ”‏خدا کی گہری باتوں کو بھی“‏ سمجھ سکیں۔—‏1-‏کُرنتھیوں 2:‏10‏۔‏

سمجھ کر پڑھیں۔‏ یہ سوچ کر پاک کلام کو نہ پڑھیں کہ آپ کو اِسے جلدی جلدی ختم کرنا ہے۔ اِس کی بجائے جو کچھ آپ پڑھتے ہیں، اُس پر سوچ بچار کریں۔ اپنے آپ سے کچھ اِس طرح کے سوال پوچھیں:‏ ”‏مَیں جس شخص کے بارے میں پڑھ رہا ہوں، یہاں اُس کی کون سی خوبیاں اُجاگر ہو رہی ہیں؟ مَیں اِن باتوں کو اپنی زندگی میں کیسے لاگو کر سکتا ہوں؟“‏

کچھ منصوبے بنائیں۔‏ پاک کلام کو پڑھنے سے بھرپور فائدہ اُٹھانے کے لیے یہ اِرادہ کریں کہ آپ اِس سے کوئی ایسی بات سیکھنا چاہتے ہیں جس سے آپ کی زندگی خوش‌گوار ہو جائے۔ شاید آپ اِس طرح کے منصوبے بنا سکتے ہیں:‏ ”‏مَیں خدا کے بارے میں اَور زیادہ سیکھنا چاہتا ہوں،“‏ ”‏مَیں اپنی شخصیت میں نکھار لانا چاہتا ہوں،“‏ ”‏مَیں ایک اچھا شوہر بننا چاہتا ہوں“‏ یا ”‏مَیں ایک اچھی بیوی بننا چاہتی ہوں۔“‏ پھر پاک کلام کے ایسے حصوں کا اِنتخاب کریں جن کے ذریعے آپ اپنے منصوبے کو پورا کر سکتے ہیں۔‏a

اِن پانچ مشوروں پر عمل کرنے سے آپ پاک کلام کو پڑھنے کا شوق پیدا کر سکتے ہیں۔ لیکن آپ اِسے پڑھنے سے لطف کیسے اُٹھا سکتے ہیں؟ یہ جاننے کے لیے اگلے مضمون کو پڑھیں۔‏