یسوع مسیح کب بادشاہ بنیں گے؟‏

دیکھیں، تصویر میں یسوع مسیح ایک پہاڑ پر بیٹھے ہوئے ہیں۔ یہ زیتون کا پہاڑ ہے۔ اُن کے ساتھ چار رسول ہیں۔ اِن کے نام اندریاس، پطرس، یعقو ب اور یوحنا ہیں۔ کیا آپ کو یسوع مسیح کے پیچھے بڑی سی ہیکل نظر آ رہی ہے؟‏

دو دن پہلے یسوع مسیح گدھے پر سوار ہو کر یروشلیم آئے تھے۔ اب منگل کا دن تھا۔ یسوع مسیح صبح کے وقت ہیکل میں گئے۔ مذہبی اُستاد یسوع مسیح کو مار دینا چاہتے تھے۔ لیکن وہ لوگوں سے ڈرتے تھے کیونکہ لوگ یسوع مسیح کو پسند کرتے تھے۔ اِس لئے مذہبی اُستادوں نے یسوع مسیح کو کچھ نہیں کِیا۔‏

یسوع مسیح نے مذہبی اُستادوں سے کہا:‏ ”‏اَے سانپو اور سانپ کے بچو!‏ تُم لوگوں نے بہت بُرے کام کئے ہیں اِس لئے خدا تُم کو سزا دے گا۔“‏ اِس کے بعد یسوع مسیح زیتون کے پہاڑ پر چلے گئے۔ وہاں اندریاس، پطرس، یعقوب اور یوحنا نے آکر یسوع مسیح سے کچھ سوال پوچھے۔ پتہ ہے، اُنہوں نے یسوع مسیح سے کیا پوچھا؟‏

رسول جاننا چاہتے تھے کہ آئندہ کیا ہوگا۔ اُن کو پتہ تھا کہ ایک دن یسوع مسیح زمین سے بُرائی ختم کر دیں گے۔ لیکن اُن کو یہ نہیں پتہ تھا کہ یسوع مسیح یہ کب کریں گے۔ اِس لئے اُنہوں نے یسوع مسیح سے پوچھا:‏ ”‏آپ کب بادشاہ بنیں گے اور زمین سے بُرائی کب ختم کریں گے؟“‏

یسوع مسیح جانتے تھے کہ جب وہ بادشاہ بنیں گے تو اُن کے شاگرد اُن کو نہیں دیکھ سکیں گے۔ پتہ ہے، کیوں؟ کیونکہ جب یسوع مسیح بادشاہ بنیں گے تو وہ آسمان پر ہوں گے۔ اِس لئے یسوع مسیح نے رسولوں سے کہا:‏ ”‏جب مَیں بادشاہ بنوں گا تو زمین پر بہت کچھ ہوگا۔‏

اُس وقت بڑی بڑی جنگیں ہوں گی؛ بڑے بڑے زلزلے آئیں گے؛ بہت سے لوگ بیمار ہوں گے؛ لوگوں کے پاس کھانا نہیں ہوگا اور لوگ بہت بُرے کام کریں گے۔ اُس وقت پوری دُنیا میں بادشاہت کی خوش‌خبری بھی سنائی جائے گی۔“‏ پھر یسوع مسیح نے کہا:‏ ”‏جب یہ سب کچھ ہوگا تو پتہ چل جائے گا کہ مَیں بادشاہ بن گیا ہوں۔“‏ کیا آج‌کل یہ سب کچھ ہو رہا ہے؟ جی۔ اِس سے پتہ چلتا ہے کہ یسوع مسیح آسمان پر بادشاہ بن چکے ہیں۔ بہت جلد یسوع مسیح زمین سے بُرائی ختم کر دیں گے۔‏