مَیں مرنا چاہتا ہوں—‏کیا پاک کلام خودکُشی کے خیال کو ذہن سے نکالنے میں میری مدد کر سکتا ہے؟‏

پاک کلام کا جواب

جی ہاں۔ پاک کلام اُس خدا کی طرف سے ہے، جو ’‏بے‌دلوں کو تسلی بخشتا‘‏ ہے۔ (‏2-‏کُرنتھیوں 7:‏6‏)‏ حالانکہ پاک کلام ذہنی اور نفسیاتی صحت کے حوالے سے کوئی کتاب نہیں ہے لیکن اِس میں پائے جانے والے مشوروں پر عمل کرنے سے بہت سے لوگوں کو خودکُشی کے خیال پر قابو پانے میں مدد ملی ہے۔ اِس میں دیے گئے مشورے آپ کے بھی کام آ سکتے ہیں۔‏

• پاک کلام میں کون سے مشورے دیے گئے ہیں؟‏

• کیا پاک کلام میں ایسے لوگوں کے بارے میں بتایا گیا ہے جو مر جانا چاہتے تھے؟‏

• پاک کلام کی کون سی آیتیں خودکُشی کے خیال کو ذہن سے نکالنے میں آپ کی مدد کر سکتی ہیں؟‏

• اگر آپ کا کوئی دوست کہتا ہے کہ ”‏مَیں مر جانا چاہتا ہوں“‏ تو آپ کیا کر سکتے ہیں؟‏

• اگر آپ نے ماضی میں خودکُشی کرنے کی کوشش کی تھی تو اب آپ کس بات کا یقین رکھ سکتے ہیں؟‏

پاک کلام میں کون سے مشورے دیے گئے ہیں؟‏

• ● اپنے احساسات بتائیں۔‏

  پاک کلام کی تعلیم:‏ ”‏سچا دوست ہمیشہ محبت ظاہر کرتا ہے اور مصیبت کی گھڑی میں ایک بھائی ثابت ہوتا ہے۔“‏—‏اَمثال 17:‏17‏۔‏

  مطلب:‏ ہمیں اُس وقت دوسروں کے سہارے کی ضرورت ہوتی ہے جب ہمارے ذہن میں ایسے خیال آتے ہیں جو ہمیں پریشان کر دیتے ہیں۔‏

  اگر آپ اپنے احساسات کسی کو نہیں بتائیں گے تو یہ ایک ایسا بوجھ بن جائیں گے جسے اُٹھانا آپ کے لیے ناممکن ہو جائے گا۔ لیکن اگر آپ اِن کے بارے میں بات کریں گے تو آپ ہلکا پھلکا محسوس کریں گے اور معاملے کے بارے میں فرق اور صحیح سوچ اپنانے کے قابل ہوں گے۔‏

  

  یہ کریں:‏ آج ہی اپنے گھر کے کسی شخص سے یا پھر کسی بھروسے‌مند دوست سے بات کریں۔‏a آپ اپنے احساسات کا اِظہار لکھ کر بھی کر سکتے ہیں۔‏

• ● ڈاکٹر سے مدد لیں۔‏

  پاک کلام کی تعلیم:‏ ”‏تندرست لوگوں کو حکیم کی ضرورت نہیں ہوتی بلکہ بیمار لوگوں کو۔“‏—‏متی 9:‏12‏۔‏

  مطلب:‏ اگر ہم بیمار ہیں تو ہمیں ڈاکٹر سے مدد حاصل کرنی چاہیے۔‏

  ذہن میں خودکُشی کے خیال آنا ذہنی یا جذباتی بیماری کی علامت ہو سکتے ہیں۔ جس طرح جسمانی صحت خراب ہونے پر ہم ڈاکٹر کے پاس جانے میں شرم محسوس نہیں کرتے اُسی طرح ہمیں ذہنی بیماری کی صورت میں بھی ڈاکٹر کے پاس جانے سے نہیں ہچکچانا چاہیے۔ ذہنی یا جذباتی بیماریوں کا علاج ممکن ہے۔‏

  یہ کریں:‏ جتنی جلدی ہو سکے، کسی قابل ڈاکٹر سے رابطہ کریں۔‏

• ● یاد رکھیں کہ خدا کو آپ کی فکر ہے۔‏

  پاک کلام کی تعلیم:‏ ”‏کیا دو پیسے کی پانچ چڑیاں نہیں بکتیں؟ لیکن خدا اُن میں سے ہر ایک کو یاد رکھتا ہے۔ آپ تو بہت سی چڑیوں سے زیادہ اہم ہیں۔ .‏.‏.‏ اِس لیے فکر مت کریں۔“‏—‏لُوقا 12:‏6، 7‏۔‏

  مطلب:‏ آپ خدا کی نظر میں بہت قیمتی ہیں۔‏

  شاید آپ کو لگے کہ کسی کو آپ کی پرواہ نہیں۔ لیکن خدا اچھی طرح سمجھتا ہے کہ آپ کس تکلیف سے گزر رہے ہیں۔ اُسے آپ کی بہت فکر ہے، اُس وقت بھی جب آپ جینے کی خواہش کھو بیٹھتے ہیں۔ پاک کلام میں لکھا ہے:‏ ”‏اَے خدا!‏ تُو دُکھی اور ٹوٹے دل کو نہیں ٹھکرائے گا۔“‏ (‏زبور 51:‏17‏)‏ خدا کو آپ سے بے‌حد محبت ہے اور وہ یہ ہرگز نہیں چاہتا کہ آپ اپنی جان لے لیں۔‏

  یہ کریں:‏ پاک کلام سے کچھ ایسی آیتوں پر غور کریں جن سے ثابت ہوتا ہے کہ خدا کو آپ سے بہت محبت ہے۔ مثال کے طور پر ‏”‏مینارِنگہبانی،“‏ جون 2016ء، صفحہ 3-‏5 میں مضمون ”‏یہوواہ خدا کو ”‏آپ کی فکر ہے“‏‏“‏ کو دیکھیں۔‏

• ● خدا سے دُعا کریں۔‏

  پاک کلام کی تعلیم:‏ ”‏اپنی ساری پریشانیاں [‏خدا]‏ پر ڈال دیں کیونکہ اُس کو آپ کی فکر ہے۔“‏—‏1-‏پطرس 5:‏7‏۔‏

  مطلب:‏ خدا چاہتا ہے کہ ہم اُس کے سامنے اپنے دل کا بوجھ ہلکا کریں اور اُسے کُھل کر اپنی پریشانیوں کے بارے میں بتائیں۔‏

  خدا آپ کو دلی اِطمینان اور مشکل صورتحال سے نمٹنے کی طاقت دے سکتا ہے۔ (‏فِلپّیوں 4:‏6، 7،‏ 13‏)‏ اِس طرح وہ اُن تمام لوگوں کو سہارا دیتا ہے جو مدد کے لیے اُسے دل سے پکارتے ہیں۔—‏زبور 55:‏22‏۔‏

  

  یہ کریں:‏ آج ہی خدا سے دُعا کریں۔ دُعا میں اُس کا نام یہوواہ اِستعمال کریں اور اُسے کُھل کر بتائیں کہ آپ کیسا محسوس کر رہے ہیں۔ (‏زبور 83:‏18‏)‏ اُس سے اِلتجا کریں کہ وہ ہمت سے کام لیتے رہنے میں آپ کی مدد کرے۔‏

• ● اُس اُمید پر سوچ بچار کریں جو پاک کلام میں مستقبل کے بارے میں دی گئی ہے۔‏

  پاک کلام کی تعلیم:‏ ”‏اُمید ہماری جانوں کے لیے ایک لنگر کی طرح ہے۔ یہ مضبوط اور قابلِ‌بھروسا ہے۔“‏—‏عبرانیوں 6:‏19‏۔‏

  مطلب:‏ شاید آپ کے جذبات طوفان میں گِھرے ایسے جہاز کی طرح ہوں جو لہروں سے ہچکولے کھاتا ہے۔ لیکن پاک کلام میں دی گئی اُمید آپ کو اپنی جگہ پر قائم رہنے میں مدد کرے گی۔‏

  یہ اُمید صرف ایک خواب نہیں بلکہ اِس کی بنیاد خدا کا یہ وعدہ ہے کہ وہ اُن تمام مسئلوں کو ختم کر دے گا جن کی وجہ سے ہمیں تکلیف سے گزرنا پڑتا ہے۔—‏مُکاشفہ 21:‏4‏۔‏

  یہ کریں:‏ پاک کلام میں پائی جانے والی اِس اُمید کے بارے میں مزید جاننے کے لیے کتاب ‏”‏خدا کی طرف سے خوشخبری“‏ کے سبق نمبر 5 کو پڑھیں۔‏

• ● کوئی ایسا کام کریں جس میں آپ کو مزہ آتا ہے۔‏

  پاک کلام کی تعلیم:‏ ”‏خوش‌باش دل اچھی دوا ہے۔“‏—‏اَمثال 17:‏22‏۔‏

  مطلب:‏ جب ہم کوئی ایسا کام کرتے ہیں جس سے ہمیں خوشی ملتی ہے تو اِس کا ہمارے ذہن اور جذبات پر اچھا اثر پڑ سکتا ہے۔‏

  

  یہ کریں:‏ کوئی ایسا کام کریں جسے کرنے میں آپ کو مزہ آتا ہے۔ مثال کے طور پر ایسی موسیقی سنیں جس سے آپ کا موڈ اچھا ہو جائے؛ ایسے مضمون پڑھیں جن سے آپ کا حوصلہ بڑھے یا اپنی پسند کا کوئی کام کریں۔ اِس کے علاوہ دوسروں کی مدد کرنے سے بھی آپ کی خوشی بڑھ سکتی ہے پھر چاہے آپ چھوٹے موٹے طریقوں سے ہی ایسا کریں۔—‏اعمال 20:‏35‏۔‏

• ● اپنی صحت کا خیال رکھیں۔‏

  پاک کلام کی تعلیم:‏ ”‏جسمانی تربیت کا .‏.‏.‏ فائدہ ہے۔“‏—‏1-‏تیمُتھیُس 4:‏8‏۔‏

  مطلب:‏ ورزش کرنے، اچھی نیند لینے اور صحت‌بخش خوراک کھانے سے ہمیں بہت فائدہ ہوتا ہے۔‏

  یہ کریں:‏ تیز تیز واک کریں۔ اگر آپ 15 منٹ کے لیے بھی ایسا کرتے ہیں تو یہ بہت اچھا ہے۔‏

• ● یاد رکھیں کہ وقت کے ساتھ ساتھ احساسات اور حالات بدل جاتے ہیں۔‏

  پاک کلام کی تعلیم:‏ ”‏آپ کو نہیں پتہ کہ کل آپ کے ساتھ کیا ہوگا۔“‏—‏یعقوب 4:‏14‏۔‏

  مطلب:‏ ایسے مسئلے جن کے بارے میں شاید آپ کو لگے کہ اِن کا کوئی حل نہیں ہے، وہ بھی حل ہو سکتے ہیں۔‏

  شاید آپ کو لگے کہ آپ کی صورتحال کبھی ٹھیک نہیں ہوگی لیکن مایوس نہ ہوں، آپ کے حالات بدل سکتے ہیں۔ اِس لیے ایسے طریقے ڈھونڈیں جن کی مدد سے آپ اپنی صورتحال سے نمٹ سکتے ہیں۔ (‏2-‏کُرنتھیوں 4:‏8‏)‏ یاد رکھیں کہ آپ جس مشکل صورتحال سے ابھی گزر رہے ہیں، شاید وہ آگے چل کر بدل جائے لیکن اگر آپ خودکُشی کر کے اپنی جان گنوا دیں گے تو یہ واپس نہیں آ سکتی۔‏

  یہ کریں:‏ پاک کلام میں ایسے لوگوں کے بارے میں پڑھیں جو اپنے حالات سے اِس قدر مایوس ہو گئے تھے کہ وہ مر جانا چاہتے تھے اور دیکھیں کہ وقت آنے پر اُن کے حالات کیسے بہتر ہو گئے۔ اِن میں سے کچھ لوگوں کے حالات جس طرح سے بہتر ہوئے اُس کے بارے میں اُنہوں نے سوچا بھی نہیں تھا۔ آئیے اِن میں سے کچھ لوگوں کی مثالوں پر غور کریں۔‏

کیا پاک کلام میں ایسے لوگوں کے بارے میں بتایا گیا ہے جو مر جانا چاہتے تھے؟‏

جی ہاں۔ اِس میں کچھ ایسے لوگوں کے بارے میں بتایا گیا ہے جنہوں نے کہا کہ وہ مر جانا چاہتے ہیں۔ لیکن خدا اِن لوگوں پر غصہ نہیں ہوا بلکہ اُس نے اُن کی مدد کی۔ وہ آپ کی بھی مدد کر سکتا ہے۔‏

ایلیاہ

• ● وہ کون تھے؟‏ ایلیاہ خدا کے ایک بہادر نبی تھے۔ لیکن کچھ موقعوں پر وہ بھی اپنے حالات کی وجہ سے ہمت ہار بیٹھے۔ یعقوب 5:‏17 میں لکھا ہے کہ ”‏ایلیاہ نبی ہماری طرح اِنسان تھے اور ہمارے جیسے احساسات رکھتے تھے۔“‏

• ● وہ کیوں مر جانا چاہتے تھے؟‏ ایلیاہ کی زندگی میں ایک ایسا وقت آیا جب وہ بہت ڈر گئے اور خود کو اکیلا محسوس کرنے لگے، اُنہیں لگا کہ وہ کسی کام کے نہیں رہے۔ اِس لیے اُنہوں نے خدا سے اِلتجا کی:‏ ”‏اَے یہوواہ!‏ .‏.‏.‏ میری جان لے لے۔“‏—‏1-‏سلاطین 19:‏4‏۔‏

• ● وہ اپنی پریشانی سے کیسے نمٹ پائے؟‏ ایلیاہ نے خدا کو دل کھول کر اپنے احساسات کے بارے میں بتایا۔ اِس پر خدا نے اُن کا حوصلہ کیسے بڑھایا؟ خدا نے ایلیاہ کو احساس دِلایا کہ اُسے اُن کی کتنی فکر ہے اور یہ بھی دِکھایا کہ وہ کتنا طاقت‌ور ہے۔ اِس کے علاوہ اُس نے ایلیاہ کو یقین دِلایا کہ وہ اُس کی نظر میں بہت اہم ہیں۔ خدا نے اُنہیں ایک ایسا ساتھی بھی دیا جو اُن کا بہت خیال رکھتا تھا۔‏

• ◂ ایلیاہ کے بارے میں پڑھیں:‏ 1-‏سلاطین 19:‏2-‏18‏۔‏

ایوب

• ● وہ کون تھے؟‏ ایوب ایک امیر آدمی تھے جن کا بہت بڑا گھرانہ تھا۔ وہ پورے دل سے سچے خدا کی عبادت کرتے تھے۔‏

• ● وہ کیوں مر جانا چاہتے تھے؟‏ ایوب کی زندگی میں اچانک مصیبتوں کا پہاڑ ٹوٹ پڑا۔ اُن کی ساری مال‌ودولت لٹ گئی، اُن کے سارے بچے ایک آفت میں مارے گئے اور اُنہیں ایک تکلیف‌دہ بیماری لگ گئی۔ اِتنا ہی نہیں، اُن پر تو یہ اِلزام بھی لگائے گئے کہ وہ اپنی مصیبتوں کے خود ذمے‌دار ہیں۔ اِس تکلیف‌دہ صورتحال سے گزرتے ہوئے ایوب نے کہا:‏ ”‏مجھے اپنی زندگی سے نفرت ہے؛ مَیں اَور جینا نہیں چاہتا۔“‏—‏ایوب 7:‏16‏۔‏

• ● وہ اپنی پریشانی سے کیسے نمٹ پائے؟‏ ایوب نے خدا سے دُعا کی اور دوسروں کو بھی اپنے احساسات بتائے۔ (‏ایوب 10:‏1-‏3‏)‏ اِس کے علاوہ اُنہیں اپنے ایک شفیق اور ہمدرد دوست اِلیہو کی طرف سے بھی حوصلہ ملا جس نے صورتحال کو فرق طریقے سے دیکھنے میں اُن کی مدد کی۔ سب سے بڑھ کر ایوب نے خدا کی طرف سے ملنے والی اِصلاح اور مدد کو خوشی سے قبول کِیا۔‏

• ◂ ایوب کے بارے میں پڑھیں:‏ ایوب 1:‏1-‏3،‏ 13-‏22؛‏ 2:‏7؛‏ 3:‏1-‏13؛‏ 36:‏1-‏7؛‏ 38:‏1-‏3؛‏ 42:‏1، 2،‏ 10-‏13‏۔‏

موسیٰ

• ● وہ کون تھے؟‏ موسیٰ بنی‌اِسرائیل کے رہنما اور خدا کے ایک وفادار نبی تھے۔‏

• ● وہ کیوں مر جانا چاہتے تھے؟‏ موسیٰ کے کندھوں پر ذمے‌داریوں کا بھاری بوجھ تھا۔ اُن پر بار بار تنقید کی جاتی تھی اور وہ اپنی صورتحال سے بہت تھک گئے تھے۔ اِس لیے اُنہوں نے گڑگڑا کر خدا سے کہا:‏ ”‏تُو .‏.‏.‏ ابھی مجھے مار دے۔“‏—‏گنتی 11:‏11، 15، اُردو جیو ورشن۔‏

• ● وہ اپنی پریشانی سے کیسے نمٹ پائے؟‏ موسیٰ نے کُھل کر خدا کو اپنے احساسات بتائے۔ خدا نے موسیٰ کی پریشانی اور دباؤ کو کم کرنے کے لیے اُن کی کچھ ذمے‌داریوں کو گھٹا دیا۔‏

• ◂ موسیٰ کے بارے میں پڑھیں:‏ گنتی 11:‏4-‏6، 10-‏17۔‏