گواہی دینے کے کام میں اپنی مہارتوں کو نکھاریں—‏کاروباری جگہوں پر گواہی دیں

یہ مہارت پیدا کرنا ضروری کیوں ہے؟‏ بہت سے لوگ زیادہ‌تر وقت کام کی جگہ پر ہوتے ہیں۔ اِن لوگوں کو خوش‌خبری سنانے کا بہترین طریقہ یہ ہے کہ ہم اُنہیں کام کی جگہ پر گواہی دیں۔ کاروباری جگہوں پر گواہی دینا بہت مؤثر ہوتا ہے اور اِس میں مبشروں کو بہت مزہ بھی آتا ہے۔ گھر گھر کی مُنادی میں ہمیں کبھی کبھار کم لوگ ملتے ہیں لیکن کاروباری جگہوں پر ہمیں لوگ ضرور ملتے ہیں۔ اِس کے علاوہ کاروباری لوگ ہمیں گاہک سمجھ کر عموماً ہمارے ساتھ خوش‌اخلاقی سے پیش آتے ہیں۔ اِن لوگوں کو مؤثر طریقے سے گواہی دینے کے لیے مبشر کو موقع محل کا خیال رکھنا چاہیے اور اُس کا بناؤسنگھار بھی مثالی ہونا چاہیے۔ (‏2-‏کُر 6:‏3‏)‏ لہٰذا خدمتی نگہبان کو اِس بات کا اِنتظام کرنا چاہیے کہ کاروباری جگہوں پر کتنی بار گواہی دی جائے گی اور کون کون ایسا کرے گا۔‏

آپ کیا کر سکتے ہیں؟‏

مختصر سی پیشکش تیار کریں۔ اگر ہم لوگوں کا بہت سا وقت لیں گے تو شاید وہ آئندہ ہم سے بات کرنا نہیں چاہیں گے۔‏
ایسے وقت کا اِنتخاب کریں جب زیادہ رش نہ ہو۔‏
سب سے پہلے مالک یا مینیجر سے بات کرنے کی کوشش کریں۔ اُن کے ساتھ خوش‌اخلاقی سے پیش آئیں۔ آپ اُن سے کہہ سکتے ہیں:‏ ”‏کام کرنے والے لوگوں سے اُن کے گھر پر ملنا بڑا مشکل ہوتا ہے اِس لیے ہم کام کی جگہ پر اُن سے مل رہے ہیں۔“‏ اُنہیں مختصراً گواہی دیں اور پھر اُنہیں کوئی پرچہ یا رسالہ وغیرہ پیش کریں۔ بہتر ہے کہ آپ خود سے عطیات کا ذکر نہ کریں ورنہ وہ سمجھیں گے کہ ہم اُنہیں کچھ بیچنے آئے ہیں۔‏
اگر مالک یا مینیجر ہماری بات خوشی سے سنتا ہے تو دوسرے ملازموں کے ساتھ بھی مختصراً بات کرنے کی اِجازت مانگیں۔ کچھ جگہوں پر بہتر ہے کہ آپ ملازموں کے لیے کتابیں یا رسالے چھوڑنے کی اِجازت مانگیں۔‏
صورتحال کا لحاظ رکھیں۔ مثال کے طور پر اگر دُکان‌دار گاہک سے بات کر رہا ہے یا کام میں مصروف ہے تو اُس وقت تک اِنتظار کریں جب تک وہ فارغ نہیں ہوتا۔‏

اِس مہینے یہ کریں:‏

خاندانی عبادت کے دوران ایک ایسی پیشکش تیار کریں جسے آپ کاروباری جگہوں پر گواہی دینے کے لیے اِستعمال کر سکتے ہیں۔‏