سٹال اور ٹرالیوں کے ذریعے گواہی دینے کے سلسلے میں کچھ مشورے

کتابوں اور رسالوں کے سٹال اور ٹرالیوں کے ذریعے گواہی دینا بہت مؤثر ثابت ہو رہا ہے۔ اِس طریقے سے بہت سے لوگ سچائی کی طرف آ رہے ہیں۔ (‏یوح 6:‏44‏)‏ لہٰذا بزرگوں کو ہدایت دی گئی ہے کہ وہ کلیسیا کے اُن علاقوں میں عوامی جگہوں پر گواہی دینے کا بندوبست کریں جہاں کرسچین لوگ رہتے ہیں۔ چونکہ ہمارے سٹال اور ٹرالیوں کو کسی ایک جگہ پر مستقل طور پر گاڑا نہیں جاتا اِس لیے عموماً سرکاری افسروں سے اِجازت لینے کی ضرورت نہیں ہوتی۔ کون اِس طرح کی گواہی دینے میں شامل ہو سکتے ہیں؟ اِس میں ایسے مبشر حصہ لے سکتے ہیں جو صورتحال سے نپٹنا جانتے ہیں، اچھے آداب‌واطوار ظاہر کرتے ہیں اور دوسروں سے بات‌چیت کرنے کی مہارت رکھتے ہیں۔ آئیں، کچھ ایسے مشوروں پر غور کریں جن پر عمل کرنے سے ہم مؤثر طریقے سے عوامی جگہوں پر گواہی دے سکتے ہیں۔‏

یہ کریں:‏

خوش‌مزاجی سے کام لیں۔ سٹال یا ٹرالی کے پاس سے گزرنے والوں کو مسکرا کر دیکھیں۔ اگر کوئی چلتے چلتے سٹال یا ٹرالی کو دیکھتا ہے تو دوستانہ انداز میں اُس کے ساتھ سلام دُعا لیں۔ آپ اُس سے کہہ سکتے ہیں:‏ ”‏آپ کوئی بھی رسالہ یا کتاب لے سکتے ہیں۔“‏
ٹرالی یا سٹال سے مناسب فاصلے پر کھڑے ہوں۔ بعض ملکوں میں مبشروں نے دیکھا ہے کہ جب وہ ٹرالی کے قریب کھڑے ہوتے ہیں تو زیادہ لوگ ٹرالی سے مطبوعات لیتے ہیں۔ لیکن کچھ اَور ملکوں میں مبشروں نے دیکھا ہے کہ اگر وہ ایسا کرتے ہیں تو لوگ ٹرالی کے پاس آنے سے ہچکچاتے ہیں اِس لیے وہ ذرا فاصلے پر کھڑے ہوتے ہیں۔ وہ تب ٹرالی کے پاس جاتے ہیں جب وہاں کوئی آتا ہے۔ صورتحال جو بھی ہو، جب کوئی شخص ٹرالی یا سٹال کے پاس آتا ہے تو اُس کے ساتھ بات‌چیت کرنے کی کوشش کریں۔ شاید آپ اُس سے پوچھ سکتے ہیں:‏ ”‏کیا آپ نے اِس سوال کے بارے میں پہلے کبھی سوچا ہے؟“‏
جتنا زیادہ ہو سکے، بائبل کو اِستعمال کریں۔‏
جب ایک شخص کوئی ایسی کتاب لیتا ہے جس سے ہم بائبل کا مطالعہ کراتے ہیں، جیسے کہ کتاب پاک صحائف کی تعلیم تو اُسے بائبل کے مطالعے کی پیشکش بھی کریں اور بتائیں کہ ہم لوگوں کو بائبل کا مطالعہ کیسے کراتے ہیں۔ اگر ممکن ہو تو اُسے فون یا کمپیوٹر ٹیبلٹ پر ویڈیو بائبل میں دلچسپی کیوں لیں؟‏ دِکھائیں۔‏
جو شخص ہمارے پیغام میں دلچسپی لیتا ہے، اُس سے اُس کا فون نمبر یا پتہ لینے کی کوشش کریں۔ اگر وہ کوئی دوسری زبان بولتا ہے یا آپ کی کلیسیا کے علاقے میں نہیں رہتا تو پھر کسی ایسے مبشر کو ڈھونڈیں جو اُس کی مدد کر سکتا ہے۔‏

یہ نہ کریں:‏

لوگوں کو کتاب یا رسالہ لینے یا بات کرنے پر مجبور نہ کریں۔ سٹال یا ٹرالی کے پاس کسی سپاہی یا فوجی کی طرح اکڑ کر کھڑے نہ ہوں۔‏
یہ نہ سمجھیں کہ عوامی جگہوں پر گواہی دینے کا مقصد صرف کتابیں یا رسالے بانٹنا ہے۔ ہمارا مقصد لوگوں کے ساتھ بائبل کے مطالعے شروع کرنا ہے۔ اِس لیے ہمیں لوگوں کے ساتھ بات‌چیت کرنے کی کوشش کرنی چاہیے۔‏
سٹال یا ٹرالی کے سامنے اِس طرح کھڑے نہ ہوں کہ لوگوں کو یہ نظر ہی نہ آئیں۔ اپنے ساتھ کام کرنے والے بہن یا بھائی کے ساتھ باتوں میں نہ لگے رہیں۔ اگر آپ کو کوئی ضروری کال کرنی ہے یا سننی ہے تو اچھا ہوگا کہ آپ ٹرالی یا سٹال سے تھوڑا دُور چلے جائیں۔‏
لوگوں کے ساتھ بحث میں نہ اُلجھیں۔ اگر ہمارا کوئی مخالف گالی‌گلوچ کرنے لگتا ہے تو بہتر ہے کہ وہاں سے کسی اَور علاقے میں چلیں جائیں۔‏