مُنادی کے کام کے لئے بچوں کی تربیت کریں

۱.‏ زبور ۱۴۸:‏۱۲، ۱۳ کے مطابق والدین کی ذمہ‌داری کیا ہے؟‏

^۱ یہوواہ خدا کو یہ پسند ہے کہ بچے اُس کی حمد کریں۔ (‏زبور ۱۴۸:‏ ۱۲، ۱۳‏)‏ یہوواہ کی عبادت کرنے والے والدین کی یہ ذمہ‌داری ہے کہ وہ اپنے بچوں کو نہ صرف خدا کے حکموں پر عمل کرنا سکھائیں بلکہ اُنہیں خوشخبری کی مُنادی کرنے کی تربیت بھی دیں۔ لیکن سوال یہ ہے کہ بچوں کی عمر بڑھنے کے ساتھ‌ساتھ خوشخبری کی مُنادی کرنے کے سلسلے میں اُن کی تربیت کیسے کی جا سکتی ہے؟‏

۲.‏ والدین کی اچھی مثال سے بچوں کو کیا فائدہ ہوگا؟‏

^۲ اچھی مثال قائم کریں:‏ جدعون نے ایک موقع پر اپنے ۳۰۰ فوجیوں سے کہا:‏ ”‏مجھے دیکھتے رہنا اور ویسا ہی کرنا۔“‏ (‏قضا ۷:‏۱۷)‏ بچے بھی اکثر وہی کرتے ہیں جو وہ اپنے والدین کو کرتے دیکھتے ہیں۔ آئیں، اِس سلسلے میں ایک باپ کی مثال پر غور کریں جو رات کی شفٹ میں کام کرتا ہے۔ ہفتے کی صبح جب وہ تھکا ہارا کام سے واپس آتا ہے تو وہ آرام کرنے کی بجائے اپنے بچوں کے ساتھ مل کر مُنادی کے کام میں حصہ لیتا ہے۔ یوں وہ ایک اچھی مثال قائم کرتا ہے اور بچے یہ سیکھتے ہیں کہ اُنہیں خوشخبری کی مُنادی کو زندگی میں پہلا درجہ دینا چاہئے۔ (‏متی ۶:‏۳۳‏)‏ کیا آپ کے بچے دیکھتے ہیں کہ آپ خوشی سے بائبل پڑھتے، دُعا کرتے، اجلاسوں پر جواب دیتے اور مُنادی میں حصہ لیتے ہیں؟ یہ سچ ہے کہ آپ سے بھی غلطیاں ہو سکتی ہیں۔ لیکن اگر آپ کے بچے دیکھتے ہیں کہ آپ یہوواہ کی خدمت کرنے کی پوری کوشش کر رہے ہیں تو اِس بات کا زیادہ امکان ہے کہ وہ بھی آپ کی مثال پر عمل کریں گے۔—‏است ۶:‏۶، ۷؛‏ روم ۲:‏۲۱، ۲۲‏۔‏

۳.‏ والدین کونسے قدم اُٹھانے کے لئے بچوں کی حوصلہ‌افزائی کر سکتے ہیں؟‏

^۳ آگے بڑھنے کی حوصلہ‌افزائی کریں:‏ والدین اپنے بچوں کو بچپن ہی سے مختلف کام کرنا سکھاتے ہیں۔ مثال کے طور پر وہ اُنہیں بولنا، چلنا اور کپڑے پہننا سکھاتے ہیں۔ جب بچے ایک کام کرنا سیکھ جاتے ہیں تو پھر والدین اُنہیں کوئی دوسرا کام کرنا سکھاتے ہیں۔ اگر والدین یہوواہ کی عبادت کرتے ہیں تو وہ اپنے بچوں کی حوصلہ‌افزائی کریں گے تاکہ بچے اپنی عمر اور صلاحیت کے مطابق خدا کی خدمت میں آگے بڑھیں۔ (‏۱-‏کر ۹:‏۲۶‏)‏ کیا آپ اپنے بچوں کی تربیت کرتے ہیں کہ وہ اجلاسوں میں اپنے الفاظ میں جواب دیں اور مسیحی خدمتی سکول کے لئے اپنی تقریریں خود تیار کریں؟ (‏زبور ۳۵:‏۱۸‏)‏ کیا آپ شاگرد بنانے کے کام میں اپنے بچوں کی تربیت کرتے ہیں؟ کیا آپ اُن کی حوصلہ‌افزائی کرتے ہیں کہ وہ بپتسمہ لینے کی طرف قدم بڑھائیں اور ایک دن کُل‌وقتی خدمت شروع کریں؟ کیا آپ اپنے بچوں کو کُل‌وقتی خادموں سے ملاتے ہیں تاکہ بچوں میں بھی خدا کی خدمت کرنے کا شوق پیدا ہو؟—‏امثا ۱۳:‏۲۰‏۔‏

۴.‏ اگر والدین خدا کی راہوں میں بچوں کی تربیت کرتے ہیں تو بچوں کو کیا فائدہ ہوگا؟‏

^۴ زبورنویس نے کہا:‏ ”‏اَے خدا!‏ تُو مجھے بچپن سے سکھاتا آیا ہے اور مَیں اب تک تیرے عجائب کا بیان کرتا رہا ہوں۔“‏ (‏زبور ۷۱:‏۱۷‏)‏ جب آپ کے بچے چھوٹے ہی ہوں تو خدا کی راہوں میں اُن کی تربیت کریں تاکہ وہ عمر بھر یہوواہ کی خدمت کرتے رہیں۔—‏امثا ۲۲:‏۶‏۔‏