‏”‏مَیں دلچسپی نہیں رکھتا“‏

^۱ بعض علاقوں میں عام طور پر ہمارے پیغام کے لئے ایسا ہی ردِعمل دکھایا جاتا ہے۔ ایسی بے‌حسی کا سامنا کرتے وقت کونسی چیز حوصلہ‌شکنی سے بچنے میں ہماری مدد کرے گی؟ کیسے ہم دوسروں میں خوشخبری کے لئے دلچسپی پیدا کر سکتے ہیں؟‏

^۲ اپنی خوشی کو برقرار رکھیں:‏ لوگوں کی بے‌حسی کی وجہ کو یاد رکھنا ہمیں اپنی خوشی کو برقرار رکھنے میں مدد دے گا۔ ارتقا کی تعلیم پانے یاپھر خدا پر ایمان نہ رکھنے والے خاندانوں میں پرورش پانے والے لوگ شاید بائبل کی اہمیت کو نہ سمجھ پائیں۔ دیگر شاید مذہبی لوگوں کی ریاکاری کے باعث بے‌حوصلہ ہو چکے ہیں۔ بعض لوگ اپنی بے‌حسی کی وجہ سے مایوس اور نااُمید دکھائی دے سکتے ہیں۔ (‏افس ۲:‏۱۲‏)‏ بعض شاید زندگی کی فکروں کے بوجھ تلے دب جانے کے باعث ہمارے پیغام پر دھیان نہ دیں۔—‏متی ۲۴:‏۳۷-‏۳۹‏۔‏

^۳ ہم منادی میں بعض لوگوں کے منفی ردِعمل کے باوجود اِس بات سے خوشی حاصل کر سکتے ہیں کہ ہماری کوششیں یہوواہ خدا کے لئے جلال کا باعث بنتی ہیں۔ (‏۱-‏پطر ۴:‏۱۱‏)‏ اگرچہ لوگ سچائی کے لئے قدردانی نہیں دکھاتے توبھی اِس کے بارے میں بتانے سے ہمارا اپنا ایمان مضبوط ہوتا ہے۔ ہمیں خوشخبری سناتے وقت لوگوں کے لئے یہوواہ خدا جیسا نظریہ اپنانے کی کوشش کرنی چاہئے۔ اُس نے نینوہ کے لوگوں کے لئے دُکھ محسوس کِیا کیونکہ وہ ”‏اپنے دہنے اور بائیں ہاتھ میں امتیاز نہیں کر سکتے“‏ تھے۔ (‏یوناہ ۴:‏۱۱‏)‏ ہمارے علاقے کے لوگوں کو خوشخبری کی ضرورت ہے!‏ اس لئے، ہمیں دلیری سے بائبل پیغام میں اُن کی دلچسپی کو اُبھارنے کے لئے مختلف طریقے تلاش کرنے کی کوشش کرنی چاہئے۔‏

^۴ مقامی حالات‌وواقعات پر بات کریں:‏ آپ اپنی بات‌چیت کا آغاز کسی حالیہ واقعے سے کرتے ہوئے صاحبِ‌خانہ کو اپنے خیالات کا اظہار کرنے کی دعوت دے سکتے ہیں۔ صاحبِ‌خانہ کی بات کو دھیان سے سنیں اور اُس کی پریشانیوں کو سننے کے بعد بائبل کا تسلی‌بخش پیغام دیں۔ ایک بھائی نے اپنے علاقے میں ایک حادثے کے بعد ہر دروازے پر جاکر اظہارِافسوس کِیا۔ وہ بیان کرتا ہے:‏ ”‏اچانک سے لوگوں نے میرے ساتھ بات‌چیت کرنا شروع کر دی۔ اُن کی زندگیوں میں دلچسپی لینے کی وجہ سے مَیں اُس دن بہت سے لوگوں کے ساتھ اچھی بات‌چیت کرنے کے قابل ہوا۔“‏

^۵ آجکل انسانوں کو درپیش مشکلات خدا کی بادشاہت میں ختم ہو جائیں گی۔ صاحبِ‌خانہ کی اُس مشکل کو سمجھنے کی کوشش کریں جس نے اُسے بے‌حد پریشان کر رکھا ہے۔ شاید وہ آپ کو بائبل کا اُمیدافزا پیغام سنانے دے۔ اگر وہ اُس وقت آپ کا پیغام نہیں سنتا تو ممکن ہے کہ ”‏پھر کبھی“‏ سننے کے لئے تیار ہو جائے۔—‏اعما ۱۷:‏۳۲‏۔‏