یسوع نے 12 رسولوں کو چُنا

تقریباً ڈیڑھ سال تک مُنادی کرنے کے بعد یسوع کو ایک اہم فیصلہ لینا تھا۔ وہ فیصلہ یہ تھا کہ وہ اپنے ساتھ مُنادی کرنے اور آگے چل کر مسیحی کلیسیا کی پیشوائی کرنے کے لیے کن کو چُنیں گے۔ یہ اہم فیصلے لینے کے لیے اُنہیں یہوواہ کی مدد کی ضرورت تھی۔ اِس لیے وہ اکیلے ایک پہاڑ پر گئے اور اُنہوں نے پوری رات دُعا کی۔ صبح اُنہوں نے اپنے کچھ شاگردوں کو بُلایا اور اُن میں سے 12 رسولوں کو چُنا۔ کیا آپ کو اُن کے نام یاد ہیں؟ اُن کے نام یہ تھے:‏ پطرس، اندریاس، یعقوب، یوحنا، فِلپّس، برتُلمائی، توما، متی، حلفئی کے بیٹے یعقوب، تدی، شمعون اور یہوداہ اِسکریوتی۔‏

اِن 12 رسولوں نے یسوع کے ساتھ سفر کرنا تھا۔ جب یسوع نے اُنہیں ٹریننگ دے دی تو اُنہوں نے اِن رسولوں کو مُنادی کرنے بھیجا۔ یہوواہ نے اِن 12 رسولوں کو لوگوں میں سے بُرے فرشتے نکالنے اور بیماروں کو ٹھیک کرنے کی طاقت دی۔‏

یسوع نے اِن 12 رسولوں کو اپنا دوست کہا اور یسوع کو اِن پر بھروسا تھا۔ فریسی سوچتے تھے کہ یہ رسول کم پڑھے لکھے اور معمولی ہیں۔ لیکن اُنہیں خود یسوع نے ٹریننگ دی تھی۔ اُنہوں نے یسوع کی زندگی کے اہم وقت میں اُن کے ساتھ ہونا تھا جیسے کہ اُن کی موت سے پہلے اور اُن کے زندہ ہو جانے کے بعد۔ یسوع کی طرح اُن کے 12 رسولوں میں سے زیادہ‌تر گلیل سے تھے اور اُن میں سے کچھ شادی‌شُدہ تھے۔‏

یہ 12 رسول عیب‌دار تھے اور اُن سے بھی غلطیاں ہوئیں۔ کبھی کبھار اُنہوں نے بغیر سوچے سمجھے بات کی اور غلط فیصلے لیے۔ کچھ موقعوں پر اُنہوں نے اپنا صبر کھو دیا۔ وہ تو اِس بات پر بحث کرنے لگے کہ اُن میں سے زیادہ اہم کون ہے۔ لیکن وہ اچھے اِنسان تھے اور یہوواہ سے محبت کرتے تھے۔ یسوع کے آسمان پر چلے جانے کے بعد اُنہی سے مسیحی کلیسیا کی شروعات ہونی تھی۔‏