یہوواہ نے یرمیاہ کو مُنادی کرنے بھیجا

یہوواہ نے یرمیاہ کو نبی بنایا تاکہ وہ یہوداہ کے لوگوں میں مُنادی کریں۔ یہوواہ نے یرمیاہ سے کہا کہ وہ لوگوں کو اُن کے بُرے کاموں سے خبردار کریں۔ یرمیاہ نے کہا:‏ ”‏لیکن یہوواہ!‏ میری تو عمر بہت کم ہے۔ مجھے لوگوں سے بات کرنی نہیں آتی۔“‏ یہوواہ نے اُن سے کہا:‏ ”‏ڈرو نہیں۔ مَیں تمہیں بتاؤں گا کہ تمہیں کیا کہنا ہے۔ مَیں تمہاری مدد کروں گا۔“‏

یہوواہ نے یرمیاہ سے کہا کہ وہ قوم کے بزرگوں کو جمع کریں اور اُن کے سامنے مٹی کی صراحی توڑ دیں اور پھر کہیں:‏ ”‏یروشلم بھی ایسے ہی ختم ہو جائے گا۔“‏ جب یرمیاہ نے ایسا کِیا تو وہاں کہ بزرگوں کو بہت غصہ آیا۔ فشحور نام کے ایک کاہن نے یرمیاہ کو مارا اور اُن کے ہاتھ پاؤں لکڑی کی کاٹھ میں جکڑ دیے۔ پوری رات یرمیاہ اِسی حالت میں رہے۔ وہ ہل بھی نہیں پا رہے تھے۔ اگلی صبح فشحور نے اُنہیں چھوڑ دیا۔ یرمیاہ نے کہا:‏ ”‏بس اب بہت ہوا!‏ مَیں اَور مُنادی نہیں کروں گا۔“‏ لیکن کیا اُنہوں نے مُنادی کرنی چھوڑ دی؟ جی نہیں۔ جب یرمیاہ نے اِس بارے میں تھوڑا اَور سوچا تو اُنہوں نے کہا:‏ ”‏یہوواہ کا پیغام میرے اندر ایک آگ کی طرح ہے۔ مَیں مُنادی کرنا نہیں چھوڑ سکتا۔“‏ یرمیاہ لوگوں کو خبردار کرنے کے لیے مُنادی کرتے رہے۔‏

پھر کئی سال گزر گئے اور یہوداہ پر ایک نیا بادشاہ حکومت کرنے لگا۔ کاہنوں اور جھوٹے نبیوں کو یرمیاہ کا پیغام بالکل پسند نہیں تھا۔ اُنہوں نے حاکموں سے کہا:‏ ”‏یہ آدمی موت کی سزا کے لائق ہے!‏“‏ یرمیاہ نے کہا:‏ ”‏اگر آپ مجھے مار ڈالیں گے تو آپ ایک بے‌گُناہ شخص کی جان لے رہے ہوں گے۔ مَیں اپنی طرف سے کچھ نہیں کہتا بلکہ وہی کہتا ہوں جو یہوواہ نے کہا ہے۔“‏ جب حاکموں نے یہ سنا تو اُنہوں نے کہا:‏ ”‏اِس آدمی نے ایسا کچھ نہیں کِیا کہ اِسے موت کی سزا ملے۔“‏

یرمیاہ مُنادی کرتے رہے اور حاکموں کو اُن پر بہت غصہ آیا۔ اُنہوں نے بادشاہ سے کہا کہ وہ یرمیاہ کو مروا ڈالے۔ بادشاہ نے اُن سے کہا کہ وہ یرمیاہ کے ساتھ جو کرنا چاہیں، کریں۔ اِس لیے اُنہوں نے یرمیاہ کو ایک گہرے کنوئیں میں پھینک دیا جس میں صرف کیچڑ تھا۔ اُنہوں نے ایسا اِس لیے کِیا تھا تاکہ یرمیاہ وہاں مر جائیں۔ یرمیاہ اُس کیچڑ میں دھنسنے لگے۔‏

لیکن پھر عبدمَلِک نام کے ایک درباری نے بادشاہ کو یہ بتایا:‏ ”‏حاکموں نے یرمیاہ کو ایک کنوئیں میں پھینک دیا ہے۔ اگر ہم نے اُنہیں وہاں سے نہیں نکالا تو وہ مر جائیں گے۔“‏ بادشاہ نے عبدمَلِک سے کہا کہ وہ اپنے ساتھ 30 آدمیوں کو لے کر جائیں اور یرمیاہ کو کنوئیں سے باہر نکالیں۔ ہمیں بھی یرمیاہ کی طرح بننا چاہیے جنہوں نے مشکل سے مشکل وقت میں بھی مُنادی کرنی نہیں چھوڑی۔‏