داؤد اور جولیت

یہوواہ نے سموئیل سے کہا:‏ ”‏یسی کے گھر جاؤ۔ اُس کے بیٹوں میں سے ایک اِسرائیل کا اگلا بادشاہ ہوگا۔“‏ اِس لیے سموئیل یسی کے گھر گئے۔ جب اُنہوں نے یسی کے سب سے بڑے بیٹے کو دیکھا تو اُنہوں نے سوچا:‏ ”‏یہی وہ شخص ہوگا جسے یہوواہ نے چُنا ہے۔“‏ لیکن یہوواہ نے سموئیل سے کہا کہ اُس نے اِسے نہیں چُنا۔ یہوواہ نے کہا:‏ ”‏مَیں ایک شخص کے دل کو دیکھتا ہوں نہ صرف یہ کہ وہ دِکھنے میں کیسا ہے۔“‏

یسی اپنے چھ اَور بیٹوں کو لے کر آئے۔ لیکن سموئیل نے کہا:‏ ”‏یہوواہ نے اِن میں سے کسی کو نہیں چُنا۔کیا آپ کا کوئی اَور بیٹا ہے؟“‏ یسی نے کہا:‏ ”‏میرا ایک اَور بیٹا ہے جو سب سے چھوٹا ہے۔ اُس کا نام داؤد ہے۔ وہ میری بھیڑوں کو چرانے باہر گیا ہوا ہے۔“‏ جب داؤد گھر آئے تو یہوواہ نے سموئیل سے کہا:‏ ”‏مَیں نے اِسی کو چُنا ہے۔“‏ سموئیل نے داؤد کے سر پر تیل ڈالا اور اُنہیں اِسرائیل کے اگلے بادشاہ کے طور پر مسح کِیا۔‏

کچھ وقت بعد بنی‌اِسرائیل اور فِلِستیوں کے بیچ جنگ ہوئی۔ فِلِستی فوج کا ایک سپاہی بہت لمبا چوڑا تھا۔ اُس کا نام جولیت تھا۔ وہ ہر روز بنی‌اِسرائیل کا مذاق اُڑاتا تھا۔ وہ کہتا تھا:‏ ”‏اپنے کسی آدمی کو مجھ سے لڑنے بھیجو۔ اگر وہ جیت گیا تو ہم تمہارے غلام بن جائیں گے۔ لیکن اگر مَیں جیت گیا تو تُم ہمارے غلام بن جاؤ گے۔“‏

داؤد کے بھائی بنی‌اِسرائیل کی فوج میں تھے۔ داؤد اُنہیں کھانا دینے کے لیے اُس جگہ گئے جہاں بنی‌اِسرائیل کی فوج نے خیمے لگائے ہوئے تھے۔ اُنہوں نے جولیت کی بات سُن لی اور کہا:‏ ”‏مَیں اِس سے لڑوں گا۔“‏ بادشاہ ساؤل نے کہا:‏ ”‏تُم تو بس ایک چھوٹے لڑکے ہو۔“‏ داؤد نے جواب دیا:‏ ”‏یہوواہ میری مدد کرے گا۔“‏

ساؤل نے داؤد کو اپنا جنگی لباس اور ہتھیار دیے۔ لیکن داؤد نے کہا:‏ ”‏مَیں یہ چیزیں پہن کر نہیں لڑ سکتا۔“‏ داؤد نے اپنی فلاخن لی اور ندی کے کنارے گئے۔ اُنہوں نے پانچ چکنے پتھر اپنے تھیلے میں رکھے۔ پھر داؤد جولیت کی طرف بھاگے۔ جولیت چلّا کر کہنے لگا:‏ ”‏ذرا میرے پاس آؤ تو صحیح بیٹا!‏ مَیں تمہارا گوشت آسمان کے پرندوں اور جنگلی جانوروں کو کھلاؤں گا۔“‏ داؤد اُس سے نہیں ڈرے۔ داؤد نے اُسے جواب دیا:‏ ”‏تُم تلوار اور نیزہ لے کر مجھ سے لڑنے آ رہے ہو۔ لیکن مَیں یہوواہ کے نام سے آ رہا ہوں۔ تُم ہمارے خلاف نہیں بلکہ خدا کے خلاف لڑ رہے ہو۔ یہاں موجود سب لوگ جان جائیں گے کہ یہوواہ تلوار اور نیزے سے زیادہ طاقت‌ور ہے۔ وہ تُم سب کو ہمارے حوالے کر دے گا۔“‏

داؤد نے اپنے فلاخن میں ایک پتھر رکھا اور اُسے زور سے گھما کر پھینکا۔ وہ پتھر سیدھا جا کر جولیت کے ماتھے میں دھنس گیا۔ جولیت مُنہ کے بل زمین پر گِر گیا۔ یہ سب کچھ یہوواہ کی مدد سے ہی ہوا تھا۔ پھر فِلِستی اپنی جان بچانے کے لیے بھاگنے لگے۔ کیا آپ بھی یہوواہ پر اُتنا ہی بھروسا رکھتے ہیں جتنا داؤد رکھتے تھے؟‏