تیمُتھیُس کی خوشیوں بھری زندگی

تیمُتھیُس ایک بہت اچھے آدمی تھے۔ اُن کو دوسروں کی مدد کرکے بہت خوشی ہوتی تھی۔ وہ بہت سے ملکوں میں گئے تاکہ وہ وہاں لوگوں کی مدد کر سکیں۔ اِس وجہ سے اُن کو بہت خوشیاں ملیں۔ کیا آپ تیمُتھیُس کے بارے میں جاننا چاہتے ہیں؟—‏

تیمُتھیُس شہر لِسترہ میں رہتے تھے۔ اُن کی امی کا نام  یُونیکے  تھا  اور اُن کی نانی کا نام لوئس تھا۔ تیمُتھیُس کی امی اور نانی نے اُن کو بچپن سے یہوواہ خدا کے بارے میں سکھایا۔ پھر جب تیمُتھیُس بڑے ہوئے تو وہ بھی دوسروں کو یہوواہ خدا کے بارے میں سکھانا چاہتے تھے۔‏

جب تیمُتھیُس جوان تھے تو پولُس نے اُن سے پوچھا:‏ ”‏کیا تُم میرے ساتھ دوسرے علاقوں میں مُنادی کرنے کے لیے چلو گے؟“‏ تیمُتھیُس نے اُن سے کہا:‏ ”‏جی، مَیں آپ کے ساتھ جاؤں گا۔“‏

تیمُتھیُس، پولُس کے ساتھ یونان کے شہر تھسلُنیکے گئے۔ وہاں  جانے کے لیے اُنہیں بہت دُور تک پیدل سفر کرنا تھا اور پھر کشتی میں سوار ہونا تھا۔ جب وہ شہر تھسلُنیکے پہنچے تو وہاں پر اُنہوں نے بہت سے لوگوں کو یہوواہ خدا کے بارے میں سکھایا۔ لیکن کچھ لوگ اُن پر بہت غصہ ہوئے اور اُن کو مارنے کی کوشش کی۔ اِس لیے پولُس اور تیمُتھیُس اُس شہر سے چلے گئے اور کسی اَور علاقے میں مُنادی کرنے لگے۔‏

کچھ مہینوں کے بعد پولُس نے تیمُتھیُس سے کہا کہ ”‏تھسلُنیکے واپس جاؤ اور دیکھو کہ وہاں پر بہن‌بھائیوں کا کیا حال ہے۔“‏ تیمُتھیُس کو پتہ تھا کہ اِس شہر کے لوگ پھر سے اُن کو مارنے کی کوشش کریں گے۔ لیکن وہ پھر بھی وہاں گئے کیونکہ اُن کو اِس شہر میں رہنے والے بہن‌بھائیوں کی فکر تھی۔ جب تیمُتھیُس شہر تھسلُنیکے سے واپس آئے تو اُنہوں نے پولُس کو بتایا کہ وہاں کے بہن‌بھائی بالکل ٹھیک ہیں۔‏

تیمُتھیُس نے بہت سالوں تک پولُس کے ساتھ مل کر مُنادی کی۔ ایک دفعہ پولُس نے اپنے ایک خط میں تیمُتھیُس کے بارے میں لکھا کہ ”‏تیمُتھیُس ہی سب سے اچھا شخص ہے جسے مَیں بہن‌بھائیوں کی مدد کرنے کے لیے بھیج سکتا ہوں۔“‏ تیمُتھیُس کو یہوواہ خدا اور لوگوں سے بہت پیار تھا۔‏

کیا آپ کو لوگوں سے پیار ہے اور کیا آپ اُن  کو  یہوواہ  خدا  کے بارے میں سکھانا چاہتے ہیں؟—‏ اگر آپ ایسا کریں گے تو آپ کو بھی تیمُتھیُس کی طرح بہت سی خوشیاں ملیں گی۔‏