پولُس کا بہادر بھانجا

آئیں، ایک لڑکے کے بارے میں پڑھتے ہیں جس نے اپنے ماموں کی جان بچائی۔ اِس لڑکے کے ماموں پولُس رسول تھے۔ بائبل میں اِس لڑکے کا نام نہیں بتایا گیا۔ لیکن اِس میں بتایا گیا ہے کہ اِس لڑکے نے بڑی بہادری کا کام کِیا۔ کیا آپ جاننا چاہتے ہیں کہ اِس لڑکے نے کیا کِیا تھا؟—‏

پولُس شہر یروشلیم میں جیل میں تھے۔ پتہ ہے وہ جیل میں کیوں تھے؟ کیونکہ وہ لوگوں کو یسوع مسیح کے بارے میں بتاتے تھے اور اِس وجہ سے دُشمنوں نے اُن کو جیل میں ڈلوا دیا تھا۔ کچھ بُرے آدمی پولُس سے بہت نفرت کرتے تھے۔ اِس لیے اُنہوں نے پولُس کو مارنے کے لیے ایک چال سوچی۔ اُنہوں نے آپس میں کہا:‏ ”‏چلو، فوجی افسر سے کہتے ہیں کہ وہ پولُس کو جیل سے عدالت میں لانے کا حکم دے۔ ہم سڑک کے کنارے چھپ جائیں گے۔ جب سپاہی پولُس کو لے کر وہاں سے گزریں گے تو ہم پولُس کو مار دیں گے۔“‏

پولُس کے بھانجے نے اِن آدمیوں کی باتیں سُن لیں۔ پتہ ہے اُس نے کیا کِیا؟ وہ جیل میں گیا اور پولُس کو دُشمنوں کی چال بتائی۔ پولُس نے اُس سے کہا:‏ ”‏جلدی سے جا کر فوجی افسرکو یہ بات بتاؤ۔“‏ کیا پولُس کے بھانجے کے لیے فوجی افسر کو یہ بات بتانا آسان تھا؟—‏ نہیں۔ کیونکہ یہ افسر بہت بڑا آدمی تھا۔ لیکن پولُس کا بھانجا بہت بہادر تھا۔ اُس نے فوراً جا کر اُس افسر کو ساری بات بتائی۔‏

جب افسر کو یہ بات پتہ چلی تو اُس نے پانچ سو فوجیوں کو حکم دیا کہ ”‏آج رات ہی پولُس کو لے کر شہر قیصریہ چلے جاؤ۔“‏ کیا پولُس بچ گئے؟—‏ جی۔ اِس طرح دُشمن پولُس پر حملہ نہیں کر سکے اور اُن کی چال ناکام ہو گئی۔‏

آپ نے اِس کہانی سے کیا سیکھا؟—‏ آپ بھی پولُس کے بھانجے کی طرح بہادر بن سکتے ہیں۔ جب آپ دوسروں کو یہوواہ خدا کے بارے میں بتاتے ہیں تو آپ کو دلیر بننا چاہیے۔ کیا آپ دلیر بنیں گے اور لوگوں کو یہوواہ خدا کے بارے میں بتاتے رہیں گے؟—‏ اگر آپ ایسا کریں گے تو آپ بھی کسی کی جان بچا سکتے ہیں۔‏