مہنگائی کا طوفان—سامنا کیسے کریں؟
اُن چیزوں پر راضی رہیں جو آپ کے پاس ہیں
جو لوگ اُن چیزوں سے مطمئن ہوتے ہیں جو اُن کے پاس ہیں، وہ خوش رہتے ہیں اور اگر اُن کے حالات بدل بھی جائیں تو وہ پھر بھی اپنی آمدنی کے مطابق گزارہ کر لیتے ہیں۔
یہ ضروری کیوں ہے؟
ایک بہت قابل ڈاکٹر (ماہرِ نفسیات جیسیکا کوہلر) نے دیکھا ہے کہ جو لوگ اُن چیزوں پر راضی ہوتے ہیں جو اُن کے پاس ہیں، وہ خوش رہتے ہیں۔ اُنہوں نے یہ بھی دیکھا ہے کہ ایسے لوگ دوسروں سے زیادہ حسد نہیں کرتے۔ اِس میں کوئی حیرانی کی بات نہیں کہ ایسے لوگ دوسروں کی نسبت زیادہ خوش رہ پاتے ہیں اور کم پریشان ہوتے ہیں۔ دیکھا گیا ہے کہ کچھ لوگ جو بہت خوش رہتے ہیں، اُن کے پاس زیادہ چیزیں نہیں ہوتیں۔ ایسا خاص طور پر اُن لوگوں کے حوالے سے کہا جا سکتا ہے جن کے لیے وہ چیزیں زیادہ اہمیت رکھتی ہیں جو پیسوں سے خریدی نہیں جا سکتیں جیسے کہ وہ خوشی جو اُنہیں اپنے گھر والوں اور دوستوں کے ساتھ وقت گزارنے سے ملتی ہے۔
آپ کیا کر سکتے ہیں؟
دوسروں کے ساتھ اپنا موازنہ نہ کریں۔ اگر آپ اپنے سادہ سے رہنسہن کا موازنہ اُن لوگوں کے رہنسہن سے کریں گے جن کے پاس بہت پیسہ ہے تو یاد رکھیں کہ ہر چمکتی ہوئی چیز سونا نہیں ہوتی۔ ایسے لوگ جو دِکھنے میں بہت امیر لگتے ہیں اور جن کے پاس بہت مہنگی چیزیں ہوتی ہیں، وہ اکثر قرضے میں ڈوبے ہوتے ہیں۔ ملک سینیگال میں رہنے والی نکول نے کہا: ”مجھے خوش رہنے کے لیے زیادہ چیزوں کی ضرورت نہیں ہے۔ اگر مَیں اُن چیزوں پر راضی ہوں جو میرے پاس ہیں تو مَیں اُس وقت بھی خوش رہ سکتی ہوں جب دوسروں کے پاس مجھ سے زیادہ چیزیں ہوں۔“
یہ کر کے دیکھیں: اِنٹرنیٹ پر ایسے اِشتہاریا ایڈ اور سوشل میڈیا پوسٹ نہ دیکھیں جن میں دِکھایا جاتا ہے کہ دوسروں کے پاس کتنے پیسے اور مہنگی چیزیں ہیں۔
شکرگزار ہوں۔ جو لوگ شکرگزار ہوتے ہیں، اُن کے لیے اُن چیزوں پر مطمئن رہنا زیادہ آسان ہوتا ہے جو اُن کے پاس ہوتی ہیں اور وہ یہ نہیں سوچتے کہ اُنہیں اَور بھی چیزوں کی ضرورت ہے یا وہ اِنہیں حاصل کرنے کا حق رکھتے ہیں۔ ملک ہیٹی میں رہنے والے رابرٹن نے کہا: ”مَیں اِس بات پر سوچ بچار کرنے کے لیے وقت نکالتا ہوں کہ دوسروں نے میرے اور میرے گھر والوں کے لیے کیا کچھ کِیا ہے۔ پھر مَیں اُن لوگوں کو بتاتا ہوں کہ مَیں اُن کا کتنا شکرگزار ہوں۔ مَیں نے اپنے آٹھ سال کے بیٹے کو بھی سکھایا ہے کہ جب دوسرے اُس کے لیے کچھ کرتے ہیں تو وہ اُن کا شکریہ ادا کرے۔“
یہ کر کے دیکھیں: ہر روز ایک ایسی چیز کے بارے میں لکھ لیں جس کے لیے آپ شکرگزار ہیں۔ آپ ایسی چیزوں کے لیے شکریہ ادا کر سکتے ہیں جیسے کہ آپ کی اچھی صحت، گھر والے، سچے دوست، یہاں تک کہ کسی خوبصورت شام میں ڈھلتے ہوئے سورج کا منظر۔
کبھی کبھار ہمارے لیے اُن چیزوں پر مطمئن رہنا مشکل ہو سکتا ہے جو ہمارے پاس ہیں۔ جب ہم مطمئن ہوتے ہیں تو اصل میں ہم خوش ہوتے ہیں اور یہ ایک ایسی نعمت ہے جو پیسے سے خریدی نہیں جا سکتی۔