جس طرح سیمنٹ اینٹوں کو جوڑے رکھتا ہے اُسی طرح ایک دوسرے کے ساتھ احترام سے بات کرنے سے میاں بیوی کا بندھن مضبوط رہتا ہے۔
میاں بیوی کے لیے
3. ایک دوسرے کی عزت کریں
اِس کا کیا مطلب ہے؟
جو جوڑے ایک دوسرے کی عزت کرتے ہیں، وہ تب بھی ایک دوسرے کے احساسات کا لحاظ رکھتے ہیں جب اُن میں اِختلاف ہو جاتا ہے۔ ایک کتاب میں بتایا گیا ہے کہ ”ایسے جوڑے اپنی ضد پر اَڑے نہیں رہتے بلکہ آپس میں اپنے اِختلافات کے بارے میں باتچیت کرتے رہتے ہیں۔ وہ بڑے احترام سے اپنے شریکِحیات کی بات سنتے ہیں اور ایسا حل نکالتے ہیں جس پر دونوں راضی ہوں۔“—کتاب ”اپنے ازدواجی بندھن کو بہتر بنانے کے لیے دس سبق“ (انگریزی میں دستیاب)۔
پاک کلام کا اصول: ”محبت . . . مطلبی نہیں ہوتی۔“—1-کُرنتھیوں 13:4، 5۔
”میری نظر میں اپنی بیوی کی عزت کرنے کا مطلب یہ ہے کہ مَیں اُس کی قدر کروں اور کوئی ایسا کام نہ کروں جس سے اُسے تکلیف پہنچے یا ہماری شادی خطرے میں پڑ جائے۔“—مائیکا۔
یہ کیوں اہم ہے؟
اگر میاں بیوی کے رشتے میں احترام نہ ہو تو اُن کی باتچیت میں تنقید، طنز یہاں تک کہ نفرت شامل ہو سکتی ہے۔ تحقیقدانوں کا کہنا ہے کہ ایسی باتیں طلاق کی اِبتدائی علامات ہوتی ہیں۔
”اگر ایک شوہر اپنی بیوی کو سنانے کے لیے حقارتآمیز باتیں کہتا ہے یا اُس کا مذاق اُڑاتا ہے تو بیوی کی خوداعتمادی ختم ہو جائے گی، شوہر پر سے اُس کا بھروسا اُٹھ جائے گا اور اُن کی شادی خطرے میں پڑ جائے گی۔“—برائن۔
آپ کیا کر سکتے ہیں؟
اپنا جائزہ لیں
ایک ہفتے تک اپنی باتوں اور کاموں پر غور کریں۔ پھر خود سے پوچھیں:
”مَیں نے کتنی بار اپنے جیون ساتھی پر تنقید کی اور کتنی بار اُس کی تعریف کی؟“
”مَیں نے کن طریقوں سے اپنے جیون ساتھی کے لیے احترام ظاہر کِیا؟“
اپنے جیون ساتھی سے اِن سوالوں پر باتچیت کریں:
کن باتوں اور کاموں سے آپ دونوں کو محسوس ہوگا کہ آپ کا احترام کِیا جا رہا ہے؟
کن باتوں اور کاموں سے آپ دونوں کو محسوس ہوگا کہ آپ کا احترام نہیں کِیا جا رہا؟
کچھ مشورے:
تین طریقے لکھیں جن کے ذریعے آپ چاہتے ہیں کہ آپ کا جیون ساتھی آپ کی عزت کرے۔ اپنے جیون ساتھی کو بھی ایسا کرنے کو کہیں۔ پھر یہ فہرستیں ایک دوسرے کو دیں اور اُن طریقوں پر کام کریں جو آپ کے جیون ساتھی نے لکھے ہیں۔
اپنے جیون ساتھی کی وہ خوبیاں لکھیں جو آپ کو اچھی لگتی ہیں۔ پھر اُسے بتائیں کہ آپ اُس کی اِن خوبیوں کی کتنی قدر کرتے ہیں۔
”میرے لیے اپنے شوہر کی عزت کرنے میں یہ شامل ہے کہ مَیں اپنے کاموں سے ظاہر کروں کہ مَیں اُن کی قدر کرتی ہوں اور اُنہیں خوش دیکھنا چاہتی ہوں۔ لازمی نہیں کہ اِس کے لیے کوئی بڑا کام کِیا جائے۔ کبھی کبھار چھوٹی چھوٹی باتوں اور کاموں سے بھی اپنے جیون ساتھی کے لیے احترام ظاہر کِیا جا سکتا ہے۔“—میگن۔
اہم بات یہ نہیں ہے کہ آپ کو یہ محسوس ہو کہ آپ کی عزت کی جا رہی ہے بلکہ یہ ہے کہ آپ کا جیون ساتھی یہ محسوس کرے کہ اُس کی عزت کی جا رہی ہے۔
پاک کلام کا اصول: ”شفقت، ہمدردی، مہربانی، خاکساری، نرمی اور تحمل کا لباس پہنیں۔“—کُلسّیوں 3:12۔