Kolela Okuti Yehova o ku Sole

1. Momo lie wa litumbikila ku Yehova? (Talavo ociluvialuvia.)

OVE hẽ ivaluka otembo eci wa litumbika ku Yehova? Ove wa nõlapo onjila yaco momo, wa fetika oku u kũlĩha kuenda oku u sola. Ove wa likuminya kokuaye okuti, o ka pitisa kovaso oku linga ocipango caye komuenyo wove kuenda o ka amamako oku u sola lutima wove wosi, lomuenyo wove wosi, lolondunge viove viosi kuenda longusu yove yosi. (Mar. 12:30) Kuenje tunde kotembo yaco, ocisola o kuetele Yehova ca livokiya. Oco hẽ, o tambulula ndati nda omunu umue wa ku pula hati: “Wa kolela muẽle okuti ove o sole Yehova?” Ocili okuti lonjanga yalua ove nda wa tambulula hati: “Ame ndu u sole calua okuti omunu ukuavo ale ocina cimue ci sule!”

2-3. (a)  Yehova o yongola okuti tu kuata ekolelo lipi? (Yeremiya 31:3) (b) Nye tu ka konomuisa vocipama cilo?

² Ove hẽ nda wa tambulula ndati nda omunu umue wa ku pula hati: “Wa kolela muẽle okuti Yehova oku sole?” Anga hẽ nda wa suma suma poku sima okuti ku sesamẽla ocisola ca Yehova? Manji umue ukãi okuti vutila waye wa liyevele okuti ka soliwile, wa popia hati: “Ame nda kũlĩha okuti ndi sole Yehova kuenda si kuete atatahãi, pole, olonjanja vialua sia kolelele nda Yehova o ndi sole muẽle.” Pole, nye ci pondola oku ku kuatisa oku kũlĩha onjila ndomo Yehova a ku tenda?

³ Yehova o yongola okuti ove o kolela lutima wosi okuti eye o ku sole. (Tanga Yeremiya 31:3.) Ocili ceci okuti, Yehova eye wa ku kokela kokuaye kuenda eci ove wa litumbika kokuaye wa tambula ocina cimue ci kuete esilivilo okuti, ocisola caye ka ci pui. Eci ci lomboloka okuti eye o ku sole calua kuenda lalimue eteke a ka ku yanduluka. Omo okuti Yehova o kuetele afendeli vaye ocisola ka ci pui, eye o tenda vosi yavo ‘ndocipiñalo caye cilikasi.’ (Mal. 3:​17, etosi.) Yehova o yongola okuti ove o kolela kocisola a ku kuetele ndeci upostolo Paulu a kolelele kocisola caye. Paulu wa soneha hati: “Momo nda kolela okuti ndaño oku fa, ndaño omuenyo, ndaño ovangelo, olombiali pamue ovina via cilo, ale ovina vi laika oku iya, ndaño ovonene, ndaño ovina vio kilu, ale ovina vio posi, ndaño ociluvo cikuavo, ci ka tẽla oku tu tepa kocisola ca Suku.” (Va Rom. 8:​38, 39) Vocipama cilo, tu konomuisa esunga lieci ci kuetele esilivilo oku tava okuti Yehova o tu sole kuenda ovina tu sukila oku linga oco tu kolele okuti eye o tu sole calua.

ESUNGA LIECI TU SUKILILA OKU KOLELA OKUTI YEHOVA O TU SOLE

4. Tu tamalãla ndati katutu a Satana?

⁴ Eci tu kolela okuti Yehova o tu sole, tu ka tẽla oku tamalãla “katutu” a Satana. (Va Efe. 6:11) Satana o ka linga cosi a tẽla oco tu liwekepo oku vumba Yehova. Limue pokati katutu a Satana, oku sandeka uhembi wokuti Yehova ka tu sole. Ku ka ivaleko okuti Satana ukuatutu. Eye olonjanja vialua o tu yapuisa ca piãla enene eci tu hongua omo liovolandu tua pita lao kosimbu, ovitangi tu kasi oku liyaka lavio cilo ale omo liatatahãi tu kuete atiamẽla kovaso yoloneke. (Olosap. 24:10) Satana o sokisiwa lohosi yimue yi sandiliya u a lia. Eye o kũlĩhĩsa oku hongua kuetu oco a tu konyuise. Pole, nda tua amamako oku pamisa ekolelo lietu liokuti Yehova o tu sole, tu ka lipongiya ciwa oco tu ‘tamalãle’ la Satana kuenda atutu aye.—1 Pet. 5:​8, 9; Tia. 4:7.

5. Momo lie tu sukilila oku liyeva okuti Yehova o tu sole kuenda wa tu kapako?

⁵ Eci tu kolela okuti Yehova o tu sole, ukamba wetu laye u pamisiwa. Momo lie tu popela ndoco? Momo Yehova wa tu lulika lonjongole yoku lekisa ocisola kuenda oku soliwa. Eci omunu umue a lekisa ocisola kokuetu, ci tu vetiyavo oku lekisa ocisola kokuaye. Omo liaco, eci tu liyeva okuti Yehova o tu sole kuenda wa tu kapako, ocisola tu u kuetele ci livokiya. (1 Yoa. 4:19) Osimbu ocisola tu u kuetele ci livokiya, ocisola caye kokuetu ci ka livokiyavo. Embimbiliya li tu sapuila hati: “Ameli ku Suku kuenje eye amela kokuene.” (Tia. 4:8) Oco hẽ, nye tu sukila oku linga oco tu kolele okuti Yehova o tu sole calua?

NYE CI PONDOLA OKU TU KUATISA OKU KOLELA OKUTI YEHOVA O TU SOLE?

6. Nye o sukila oku linga nda ove kua kolelele okuti Yehova oku sole?

⁶ Amamako oku likutilila ku Yehova oco a ku kuatise oku kuata elomboloko liesunga lieci a ku solile. (Luka 18:1; Va Rom. 12:12) Likutilila kokuaye olonjanja vialua veteke nda ci sukiliwa, oco a ku kuatise oku limbuka ndomo eye a ku tenda. Ocili okuti nda omunu umue o livetela calua evelo, ka ci leluka kokuaye oku limbuka okuti Yehova u sole. Pole, ivaluka okuti Yehova wa velapo, ovitima vietu vi sule. (1 Yoa. 3:​19, 20) Eye wa ku kũlĩha ciwa okuti ove muẽle ci sule kuenda o lete ovituwa viove viwa vina okuti ku tẽla oku vi limbuka. (1 Sam. 16:7; 2 Asa. 6:30) Omo liaco, ‘situlula’ ovisimĩlo viove kokuaye loku u pinga oco a ku kuatise oku tava okuti eye oku sole. (Osa. 62:8) Noke likolisilako oku kapako atosi a kuãimo.

7-8. Olosamo vi tu kuatisa ndati oku kolela okuti Yehova o tu sole?

⁷ Kolela kondaka ya Yehova. Yehova wa vetiya asonehi Vembimbiliya oku lombolola ndomo eye a tuwa. Limbuka ndomo ukualosamo Daviti a lombolola catiamẽla ku Yehova. Eye hati: “Yehova o kasi ocipepi la vakuavitima via teka; eye o popela vana va sumua.” (Osa. 34:18) Eci o kasi lesumuo, pamue o liyeva ndu okuti o kasi ulika. Pole, Yehova wa likuminya okuti kapuluvi aco, eye o kasi ocipepi love oco a ku kuatise momo eye o lete okuti ove o sukila ekuatiso. Kosamo yikuavo, Daviti wa soneha hati: “Kapa asuẽlẽla ange vonjeke yove yocipa.” (Osa. 56:8) Yehova o lete eci ove o sumua kuenda evalo liove. Eye wa ku kapako calua kuenda wa kũlĩha ovitangi o kasi oku liyaka lavio. Volondaka vikuavo, Yehova ongolola asuẽlẽla ove kuenda wa a kapako calua ndovava vongalafa yomunu umue o kasi oku linga ungende vekango. Kosamo 139:3 tu tangako ndoco: “Ove [a Yehova] wa kũlĩha ciwa olonjila viange viosi.” Yehova o lete ovina viosi o linga, pole, o tiamisila calua utima kovina viwa wa siata oku linga. (Va Hev. 6:10) Momo lie? Momo eye wa kapako calua alikolisilo osi wa siata oku linga oco u sanjuise.a

⁸ Yehova pocakati covinimbu evi vi lembeleka vi sangiwa Vondaka yaye Embimbiliya, o kasi oku tu sapuila hati: “Ndi yongola okuti o kũlĩha ocisola calua ndu ku kuetele kuenda ndomo nda ku kapako.” Pole, ndomo tua lilongisa ale, Satana wa siata oku sandeka uhembi wokuti Yehova ka ku sole. Omo liaco, nda olonjanja vimue o kuata atatahãi atiamẽla kocisola Yehova a ku kuetele, talama kuenda lipula ndoco: ‘Kulie ndi ka kolela? Anga hẽ ndi kolela ku Satana “isia yuhembi” ale ndi ka kolela ku Yehova, “Suku yocili?”’—Yoa. 8:44; Osa. 31:5.

9. Nye Yehova a likuminya komanu vosi vo sole? (Etundilo 20:​5, 6)

⁹ Sokolola lutate konjila ndomo Yehova a tenda omanu vana eye a sole. Kũlĩhĩsa olondaka Yehova a sapuila Mose kuenda va Isareli. (Tanga Etundilo 20:​5, 6.) Yehova wa likuminya okuti, eye o ka amamako oku lekisa ocisola ka ci pui komanu vana vo sole. Olondaka evi vi tu kuatisa oku kolela okuti, eye o lekisa ocisola komanu vana vo sole. (Neh. 1:5) Omo liaco, eci o fetika oku kuata atatahãi nda Yehova oku sole muẽle ale sio, li pula ndoco: ‘Ame hẽ ndi sole Yehova?’ Noke sokolola ndoco: Nda ove o sole Yehova kuenda o kasi oku likolisilako oku linga ovina vi u sanjuisa, o pondola oku kolela okuti eye o ku solevo calua. (Dan. 9:4; 1 Va Kor. 8:3) Volondaka vikuavo, nda ove ku kuete atatahãi vokuti o sole Yehova, momo lie o kuatela atatahãi vokuti eye o ku sole? Ove o pondola oku kolela okuti eye olonjanja viosi o ka ku sola kuenda lalimue eteke a ka ku yanduluka.

10-11. Yehova o yongola okuti ove o tenda ndati ocisembi? (Va Galatia 2:20)

¹⁰ Sokolola kocisembi. Ocilumba cocisembi ca Yesu Kristu, oco ombanjaile ya velapo Yehova a eca komanu. (Yoa. 3:16) Pole, anga hẽ ombanjaile yaco yi tiamisiwilavo kokuove? Oco! Sokolola kulandu wupostolo Paulu. Osimbu eye ka lingile Ukristão, wa linga ovina vialua vĩvi kuenje, noke yoku linga Ukristão wa sukilile oku likolisilako oco a yule ahonguo aye. (Va Rom. 7:​24, 25; 1 Tim. 1:​12-14) Pole, eye wa tendele ocisembi ndombanjaile Yehova a eca kokuaye. (Tanga Va Galatia 2:20.) Ivaluka okuti Yehova eye wa vetiya upostolo Paulu oku soneha olondaka evi kuenda ovina viosi vi sangiwa Vembimbiliya via sonehiwila oku tu longisa. (Va Rom. 15:4) Olondaka viupostolo Paulu, vi lekisa okuti Yehova o yongola okuti ove o tenda ocisembi ndombanjaile yimue eye a eca kokuove. Omo liaco, eci o tenda ocisembi lonjila yaco, o ka pamisa ekolelo liove liokuti Yehova o ku sole.

¹¹ Tu pandula calua Yehova omo lioku tuma Yesu palo posi oco a tu file. Pole, esunga likuavo lieci Yesu eyilile palo posi, oku kunda ocili catiamẽla ku Suku komanu. (Yoa. 18:37) Vocili caco, mua kongela ocisola Yehova a kuetele omanu.

NDOMO YESU A TU KUATISA OKU KOLELA OKUTI YEHOVA O TU SOLE

12. Momo lie tu ponduila oku kolela kovina Yesu a popia viatiamẽla ku Yehova?

¹² Yesu eci a kala palo posi, wa solaile oku lomboluila komanu ovituwa via Yehova. (Luka 10:22) Tu kuete asunga awa oku tava kovina viosi Yesu a popia viatiamẽla ku Yehova, momo eye wa kala ale laye kilu vokuenda kuotembo yalua, osimbu keyile palo posi. (Va Kol. 1:15) Yesu wa liyevele okuti Yehova u sole calua kuenda wa molavo ndomo Yehova a sole omãla Vaye vakuekolelo. Pole, Yesu o tu kuatisa ndati oku kolela okuti Yehova o tu sole?

13. Yesu o yongola okuti tu tenda ndati Yehova?

¹³ Yesu o yongola okuti tu kũlĩha ndomo Yehova a tu tenda. Vavanjeliu, Yesu wa tukula Yehova hati “Isia” ci pitahãla 160 kolonjanja. Handi vali, poku vangula lolondonge viaye Yesu wa enda oku tukula Yehova hati, “Isiaye” kuenda “Isiene.” (Mat. 5:16; 6:26) Osimbu Yesu keyile palo posi, “afendeli va Yehova va enda oku tukula Yehova hati: ‘Suku Ukuonene Wosi,’ ‘Fũ,’ ‘Ululiki wa Velapo’ kuenda olonduko vikuavo. Pole, Yesu wa enda oku tukula calua ondaka Isia okuti oyo ya siatele. Poku ci linga, eye wa lekisa okuti Suku o yongola okuti afendeli vaye va kuata ukamba uwa laye.” Eci ci lekisa okuti, Yesu o yongola oku tu kuatisa oku limbuka okuti Yehova o tu sole calua ndeci Isia umue ukuahenda a sole omãla vaye. Tu konomuisi ovolandu avali a lekisa ndomo Yesu a tukula ondaka “Isia” oco a situlule ndomo Yehova a tuwa.

14. Yesu wa lekisa ndati okuti omunu lomunu pokati ketu o kuete esilivilo lialua kovaso a Isietu wokilu? (Mateo 10:​29-31) (Talavo ociluvialuvia.)

¹⁴ Catete, tu konomuisi olondaka Yesu a popia vi sangiwa kelivulu lia Mateo 10:​29-31. (Tanga.) Olongungu, olonjila vimue vitito kuenda lalimue eteke vi ka sola Yehova ale oku u fendela. Pole, Isietu wa vi kapako kuenda wa kũlĩha eci yimue pokati kavio yi kupukila posi. Nda Yehova wa kapako calua onjila yimue, tu pondola oku kolela okuti eye wa kapakovo calua omunu lomunu pokati ketu, momo tu u sole kuenda tu u vumba! Handi vali Yesu wa popiavo okuti, “Isietu wa kũlĩha etendelo liesinga li kasi vovitue vietu. Omo okuti Yehova wa kũlĩha ovina vitito viatiamẽla kokuetu, tu pondola oku kolela okuti eye wa tu kapako calua.” Omo liaco, Yesu o yongola oku tu kuatisa oku kolela okuti, omunu lomunu pokati ketu o kuete esilivilo lialua kovaso a Isietu wokilu.

15. Olondaka via Yesu vi sangiwa kelivulu lia Yoano 6:​44, vi tu longisa nye catiamẽla ku Isietu wokilu?

¹⁵ Tu kũlĩhĩsi ulandu wavali watiamẽla kepuluvi Yesu a tukula ondaka “Isia.” (Tanga Yoano 6:44.) Yehova locisola calua kuenda ohenda wa ku kokela vocili. Momo lie a ci lingila? Momo eye wa mola kokuove utima umue wa sunguluka kuenda ovituwa viove viwa. (Ovil. 13:48) Eci Yesu a popia olondaka vi sangiwa kelivulu lia Yoano 6:​44, wa kala oku tukula olondaka via Yehova vi sangiwa kelivulu lia Yeremiya 31:3 kuna Yehova a popia hati: “Nda ku sola locisola ka ci pui, [ale ndamamako oku lekisa ocisola ka ci pongoloka kokuove.]” (Yer. 31:3; etosi; ci sokisa lelivulu lia Hosea 11:4) Sokolola kueci olondaka viaco vi lomboloka. Isietu wokilu, o lete ovituwa viove viwa ndaño okuti ove ku vi limbuka.

16. (a) Nye Yesu a tu longisa catiamẽla ku Yehova kuenda momo lie tu sukilila oku kolela kokuaye? (b) O pamisa ndati ekolelo liove liokuti Yehova eye Isia wa velapo o pondola oku kuata? (Tala okakasia losapi hati: “Isia tu Sukila Oku Kuata Vosi Yetu.”)

¹⁶ Yesu poku tukula Yehova hati Isietu, ca kala ndu a popia okuti: “Yehova a Isiangeko lika, pole, Isienevo. Yesu o yongola okuti ove o kolela okuti Yehova o ku sole kuenda wa ku kapako calua.” Omo liaco, nda okuti olonjanja vimue o kuata atatahãi atiamẽla kocisola Yehova a ku kuetele, li pula ndoco: ‘Ka ciwako hẽ ame oku kolela kolondaka via Yesu una wa kũlĩha ciwa Isietu haeye o vangula ocili olonjanja viosi?’—1 Pet. 2:22.

AMAMAKO OKU PAMISA EKOLELO LIOVE LIOKUTI YEHOVA O KU SOLE

17. Momo lie tu sukilila oku amamako oku pamisa ekolelo lietu liokuti Yehova o tu sole?

¹⁷ Tu sukila oku amamako oku pamisa ekolelo lietu liokuti Yehova o tu sole. Ndomo tua lilongisa vocipama cilo, Satana unyãli umue ukuatutu kuenda o yongola okuti tu hongua loku liwekapo oku vumba Yehova. Omo liaco, eye o ka amamako oku tu seteka oco ka tu ka kolele okuti Yehova o tu sole. Pole, ka tu ka tavi kuhembi waco wa Satana!—Yovi 27:5.

18. O pamisa ndati ekolelo liove liokuti Yehova o ku sole?

¹⁸ Oco o pamise ekolelo liove liokuti Yehova o ku sole, amamako oku likutilila oco a ku kuatise oku limbuka ovituwa viwa eye a mola kokuove. Sokolola lutate kovinimbu Viembimbiliya vi lekisa okuti Yehova o sole kuenda wa kapakovo vana va lekisa ocisola kokuaye. Ivaluka okuti nda omunu umue o sole Yehova, eye o ko solavo. Lalimue eteke ku ka ivaleko okuti ocisembi ombanjaile yimue Yehova a eca kokuove. Handi vali, kolela kolondaka Yesu a popia viokuti Yehova Isiove wokilu. Omo liaco, nda umue wa ku pula hati: “Wa kolela muẽle okuti Yehova o ku sole?” Lonjanga yalua ove o ka tambulula hati: “Ocili okuti eye o ndi sole! Momo, oloneke viosi nda siata oku likolisilako oco ndi lekise ocisola cange kokuaye!”