Ocisola ca Suku ci Kala Otembo ka yi Pui

1-2. Ovitangi vipi afendeli valua va Yehova va siata oku liyaka lavio?

SOKOLOLA okuti onaviyu yimue yi kasi oku endela vokalunga muli akimba alua. Akimba aco a koka okuti onaviyu yi pungoka calua. Nda onaviyu yaco ka yi kuete onjundo, oyo yi pondola oku kokiwa lakimba. Onjundo yi kuatisa onaviyu oku kolapo kuenda oku tateka okuti oyo ka yi kokiwa lakimba vokalunga muli ehunguhungu.

² Eci tu liyaka locitangi cimue ka ca lelukile, ekalo lietu li pondola oku sokisiwa lonaviyu yaco. Ovisimĩlo vietu vi pondola oku pongoloka vocipikipiki. Vepuluvi limue, tu sima okuti Yehova o tu sole kuenda o tu tata. Pole, vepuluvi likuavo, tu kuata atatahãi nda okuti Yehova o lete muẽle ovitangi tu kasi oku liyaka lavio. (Osa. 10:1; 13:1) Noke, pamue ekamba limue li tu sapuila ondaka yimue yi tu lembeleka kuenje tu liyeva ciwa vokuenda kuotembo yimue. (Olosap. 17:17; 25:11) Pole, noke tu fetika vali oku kuata atatahãi nda okuti Yehova o kasi muẽle oku tu kuatisa. Toke muẽle pamue tu sima okuti Yehova wa tu yanduluka. Oco hẽ, nye ci pondola oku kala ndonjundo kokuetu, oco ci tu kuatise oku kolapo poku liyaka lovitangi ka via lelukile? Volondaka vikuavo, tuamamako ndati oku kolela okuti Yehova o tu sole kuenda wa tu kapako?

3. Ondaka “ocisola ka ci pongoloka” yi lomboloka nye? (Osamo 31:7; 136:1) (b) Momo lie tu popela okuti Yehova eye ongangu ya velapo yoku lekisa ocisola ka ci pongoloka? (Talavo ociluvialuvia.)

³ Ocina cimue ci pondola oku kala ndonjundo kokuetu eci tu liyaka locitangi cimue, oku ivaluka ocisola ka ci pongoloka ca Yehova. (Tanga Osamo 31:7; 136:1.) Ondaka yokuti “ocisola ka ci pongoloka,” yi pitiya ocisimĩlo comunu umue amamako oku kakatela calua komunu ukuavo. Yehova eye ongangu ya velapo yoku lekisa ocisola ka ci pongoloka. Embimbiliya li tukula Yehova okuti, “ukuacisola calua haico ka ci pongoloka.” (Etu. 34:​6, 7) Embimbiliya li popiavo catiamẽla kokuaye hati: “Ocisola cove ka ci pongoloka, calua ku vosi vana va ku vilikiya.” (Osa. 86:5) Sokolola kueci olondaka viaco vi lomboloka: Yehova lalimue eteke a ka yanduluka afendeli vaye vakuekolelo! Oku ivaluka okuti Yehova ka pongoloka, ci ka kala ndonjundo yi ka tu kuatisa oku kolapo eci tu liyaka lovitangi komuenyo.—Osa. 23:4.

IVALUKA OKUTI OCISOLA CA YEHOVA CI KASI POKATI KOVINA VIATETE WA LILONGISA VEMBIMBILIYA

4. Tukula ovina viatete wa lilongisa Vembimbiliya kuenda lombolola esunga lieci tu kakatelela kokuavio.

⁴ Onjila yimue yoku pamisa ekolelo liove kocisola ca Yehova, oku ivaluka okuti ocisola caco ci kasi pokati kovina viatete wa lilongisa Vembimbiliya. Kokuove, ondaka yokuti, “ovina viatete wa lilongisa Vembimbiliya” yi lomboloka nye? Pamue o sokolola kalongiso atete wa lilongisa Vondaka ya Suku. Ndeci, ove wa lilongisa okuti onduko ya Suku Yehova, Yesu omõla wongunga wa Suku, omanu va fa ka va kũlĩhĩle vali lacimue kuenda ongongo yi ka pongoluiwa ocumbo celau, muna omanu va ka kala otembo ka yi pui. (Osa. 83:18; Uku. 9:5; Yoa. 3:16; Esit. 21:​3, 4) Ocili okuti noke lioku lilongisa ovina viaco, ka ci leluka kokuove oku liwekapo oku kakatela kokuavio. Momo lie? Momo wa kuata elomboloko liokuti alongiso aco ocili. Omo liaco, oku ivaluka okuti ocisola ca Yehova ci kasi pokati kalongiso aco, ci ku kuatisa oku yuvula ocisimĩlo cokuti, Eye ka lete ovitangi o kasi oku liyaka lavio kuenda ka vi kapeleko.

5. Lombolola ndomo omunu umue a pondola oku likala alongiso esanda.

⁵ Nye ca ku kuatisa oku likala alongiso esanda eci wa fetika oku lilongisa Embimbiliya? Citava okuti, wa sokisa ovina wa lilongisa ketavo liove leci Embimbiliya li longisa. Kũlĩhĩsa ulandu u kuãimo: Sokolola okuti ove wa longisiwa okuti Yesu eye Suku Ukuonene Wosi. Pole, poku lilongisa Embimbiliya, wa fetika oku lipula ndoco: ‘Anga hẽ, elongiso eli liocili muẽle?’ Noke lioku kũlĩhĩsa eci Embimbiliya li popia, wa limbuka okuti haliociliko. Omo liaco, elongiso liaco liesanda wa li piñainya locili cokuti: Yesu eye “uveli woviluvo viosi” kuenda ‘omõla wongunga wa Suku.’ (Va Kol. 1:15; Yoa. 3:18) Ocili okuti alongiso esanda a sokisiwa ‘lombonge ya pama’ kuenda ka a lelukile oku a nyõla. (2 Va Kor. 10:​4, 5) Pole, noke lioku lilongisa ocili, wa liwekapo oku kolela kalongiso aco osimbu.—Va Fil. 3:13.

6. Momo lie o kolelela okuti ‘ocisola ka ci pongoloka ca Yehova ci kala otembo ka yi pui?’

⁶ Ove o pondolavo oku linga cimuamue leci Embimbiliya li longisa catiamẽla kocisola ca Yehova. Nda okuti poku liyaka locitangi cimue wa fetika oku kuata atatahãi atiamẽla kocisola ca Yehova, li pula ndoco: ‘Anga hẽ ovina ndi kasi oku sima via sunguluka?’ Sokisa atatahãi o kuete lolondaka vi sangiwa Kosamo 136:​1, okuti oko kua kunamẽla osapi yocipama cilo. Momo lie Yehova a popela okuti ocisola caye ka ci “pongoloka?” Momo lie Kosamo yaco ondaka yokuti, “ocisola caye ka ci pongoloka” ya pituluiwila 26 kolonjanja? Ndomo tua lilongisa, ocisola ka ci pongoloka Yehova a kuetele afendeli vaye, ci panga onepa kovina viatete tua lilongisa Vembimbiliya, ndeci ovina vikuavo tua lilongisa okuti ka tua kuatele atatahãi oco tu vi tave. Ocisimĩlo cokuti Yehova ka tu sole kuenda ka tu kapeleko, cuhembi. Omo liaco, ove o sesamẽla oku likala ocisimĩlo caco lonjanga ndeci nda wa likala elongiso likuavo liesanda!

7. Tukula ovisonehua vimue Viembimbiliya vi eca uvangi wokuti Yehova o tu sole.

⁷ Vembimbiliya mu sangiwa ovovangi akuavo a lekisa okuti Yehova o tu sole. Ndeci, Yesu wa sapuila kolondonge viaye hati: “Ene wa velipo okuti olongungu vialua vi sule.” (Mat. 10:31) Yehova wa sapuilavo kafendeli vaye hati: “Ndi ka ku kolisa, ocili, ndi ka ku kuatisa, ndi ka ku kuata muẽle leka liange liondio liesunga.” (Isa. 41:10) Sokolola kueci olondaka viaco vi lomboloka kokuetu. Yesu ka popele okuti: ‘Pamue ene wa velipo okuti olongungu vialua vi sule.’ Kuenda Yehova ka popelevo hati: ‘Pamue ndi ka ku kuatisi.’ Pole, Yesu wa popia hati: “Ene wa velipo” kuenda Yehova hati: “Ndi ka ku kuatisa.” Nda okuti poku liyaka locitangi cimue ove wa fetika oku kuata atatahãi atiamẽla kocisola Yehova a ku kuetele, ovisonehua evi ka vi ku kuatisa lika oku liyeva okuti Yehova o ku sole, pole, vi ku kuatisavo oku kũlĩha kuenda oku kolela kocili caco. Ovisonehua viaco via kunamẽla kocili. Omo liaco, nda wa likutilila ku Yehova catiamẽla katatahãi ove kuenda oku sokolola lutate kovisonehua viaco, o ka popiavo olondaka ndevi vi sangiwa kukanda 1 Yoano 4:16 viokuti: “Tua kũlĩha kuenda tua kolela kocisola Suku a tu kuetele.”a

8. Nye o sukila oku linga nda okuti olonjanja vimue o kuata atatahãi atiamẽla kocisola Yehova a ku kuetele?

⁸ Nye o sukila oku linga nda okuti olonjanja vimue o kuata atatahãi atiamẽla kocisola Yehova a ku kuetele? Sokisa ocisimĩlo caco lovina wa kũlĩha viatiamẽla kokuaye. Halonjanja viosiko tu pondola oku kolela kovisimĩlo vietu muẽle, pole, tu pondola oku kolela kovina viocili. Ovina Embimbiliya li longisa viatiamẽla kocisola ca Yehova, viocili. Omo liaco, nda ka tua kolelele okuti Yehova o tu sole, tu kasi oku pembula ocituwa caye ca velapo okuti ocisola.—1 Yoa. 4:8.

SOKOLOLA ‘KOCISOLA YEHOVA A KU KUETELE’

9-10. Nye Yesu a yonguile oku popia poku tukula olondaka viokuti: “Isia o vu sole,” vi sangiwa ku Yoano 16:​26, 27? (Talavo ociluvialuvia.)

⁹ Tu pondola oku lilongisa ovina vikuavo viatiamẽla kocisola ca Yehova, poku konomuisa olondaka Yesu a sapuila kolondonge viaye viokuti: “Isia o vu sole.” (Tanga Yoano 16:​26, 27.) Yesu ka popele lika olondaka viaco oco a sanjuise olondonge viaye. Pole, eci tu tanga olondaka via livangako, tu limbuka okuti Yesu wa kala oku popia catiamẽla kohutililo.

¹⁰ Vepuluvi liaco, Yesu wa kala oku malusula oku sapuila kolondonge viaye oco vi likutilile vonduko yaye, okuti kokuaye hakoko. (Yoa. 16:​23, 24) Ca kuatele esilivilo kokuavo oku kũlĩha ovina viaco. Noke liepinduko lia Yesu, olondonge pamue nda via setekiwa oku likutilila ku Yesu momo, ovo va kala akamba vaye. Ovo nda va sokolola okuti, omo Yesu a va solele calua, eye nda wa yevelela apingilo avo loku pinga ku Isiaye oco a va kuatise. Pole, Yesu wa va sapuila oco ka va ka kuate ovisimĩlo viaco. Momo lie? Momo Yesu wa popia hati: “Isia o vu sole.” Ocili eci ci panga onepa kovina viatete tua lilongisa Vembimbiliya viatiamẽla kohutililo. Eci ci lomboloka nye kokuove? Pocakati celilongiso Liembimbiliya, ove wa lilongisa eci catiamẽla ku Yesu kuenda wa linga ekamba liaye. (Yoa. 14:21) Pole, ndeci olondonge viaye via linga kocita catete, ove o pondolavo oku likutilila ku Suku lekolelo loku kũlĩha okuti, ‘Eye o ku sole.’ Olonjanja viosi eci o likutilila ku Yehova, ove o lekisa okuti wa kolela kolondaka viaco.—1 Yoa. 5:14.

KŨLĨHA OVINA VIA SIATA OKU KU KOKELA ATATAHÃI

11. Momo lie Satana a sanjukilila nda okuti tua kuata atatahãi atiamẽla kocisola Yehova a tu kuetele?

¹¹ Nye ci pondola oku tu kokela oku kuata atatahãi atiamẽla kocisola Yehova a tu kuetele? Pamue o pondola oku popia okuti Satana eye wa siata oku tu vetiya oku kuata ovisimĩlo viaco, kuenje eci ocili. Momo Satana, o “ñuala ñuala ndohosi yi koma, oku sandiliya u a lia” kuenda eye o sanjuka calua nda etu tu fetika oku kuata atatahãi atiamẽla kocisola Yehova a tu kuetele. (1 Pet. 5:8) Ocisola caco, oco ca vetiya Yehova oku tu ĩha ombanjaile yocisembi. Pole, Satana o yongola okuti tu kuata ocisimĩlo cokuti ka tu sesamẽla ocisola caco. (Va Hev. 2:9) Oco hẽ, helie o sanjuka nda tua kuata atatahãi atiamẽla kocisola Yehova a tu kuetele? Satana. Kuenda helie o sanjukavo nda tua liwekapo oku vumba Yehova omo liesumuo? Ocili okuti Satana. Satana o yongola okuti, tu kuata ovisimĩlo viokuti Yehova ka tu sole, pole Yehova eye ka sole Satana. Omo liaco, Satana o seteka oku tu vetiya oku sima okuti Yehova ka tu sole kuenda ka tu taviwa laye. (Va Efe. 6:11) Eci tu limbuka ovina unyãli wetu Satana a kasi oku seteka oku linga, onjongole yetu yoku ‘tamalãla Leliapu,’ yi livokiya.—Tia. 4:7.

12-13. Momo lie ekambo lioku lipua li tu kokelela oku kuata atatahãi atiamẽla kocisola Yehova a tu kuetele?

¹² Kuli ocina cikuavo ci pondola oku tu kokela oku kuata atatahãi atiamẽla kocisola Yehova a tu kuetele. Ocina caco nye? Ekambo lietu lioku lipua. (Osa. 51:5; Va Rom. 5:12) Ekandu lia nyõla ukamba wa kala pokati komanu la Suku. Handi vali, olio lia nyõlavo ovisimĩlo vietu, olonjongole kuenda uhayele wetu.

¹³ Ekandu li pondolavo oku tu kokela oku kuata ovisimĩlo ka via sungulukile, ndeci, oku livetela evelo, esakalalo, ekambo lioku kolapo kuenda osõi. Ovina viaco vi pondola oku lipita letu eci tu linga ekandu limue. Handi vali, ovina viaco vi pondolavo oku lipita letu momo, olonjanja viosi tua siata oku ivaluka ekambo lietu lioku lipua, okuti ekalo limue ka li likuata leci Yehova a yonguile eci a tu lulika. (Va Rom. 8:​20, 21) Ndeci ci lipita lekãlu limue okuti nda elola liaco lia tuika ka li endi ciwa, cimuamue haico okuti, omo liekambo lietu lioku lipua, ka tu tẽla oku linga ovina lonjila yimue ya lipua ndomo Yehova a tu lulika. Omo liaco, ka ci tu komõhisa nda okuti olonjanja vimue tu kuata atatahãi atiamẽla kocisola Yehova a tu kuetele. Eci ku lipita ovina viaco, tu sukila oku ivaluka okuti Yehova, “Suku unene haeye o komõhisa, . . . o lekisa ocisola ka ci pongoloka ku vana vo sole haivo va kapako ovihandeleko viaye.”—Neh. 1:5.

14. Oku sokolola kocisembi ci tu kuatisa ndati oku kolela okuti Yehova o tu sole? (Va Roma 5:8) (Talavo okakasia losapi hati: “Ku ka Yapuisiwe ‘Lunene Wekandu.’”)

¹⁴ Olonjanja vimue, tu pondola oku liyeva okuti ka tu sesamẽla ocisola ca Yeova. Ocili okuti, ka tua sesamelẽle muẽle ocisola caco. Handi vali, lacimue tu pondola oku linga oco tu sesamẽle ocisola ca Yehova. Pole, Yehova omo locisola, wa tu ĩha ombanjaile yocisembi oco akandu etu a ecelue. (1 Yoa. 4:10) Tu ivalukivo okuti, Yesu keyilile palo posi oco a yovole omanu va li pua, pole, weyilile vakuakandu. (Tanga Va Roma 5:8.) Lomue pokati ketu o pondola oku linga ovina lonjila yimue ya li pua kuenda Yehova, ka lavoka ovina viaco kokuetu. Eci tu kuata elomboloko liokuti, ekambo lietu lioku li pua li pondola oku tu kokela oku kuata atatahãi atiamẽla kocisola Yehova a tu kuetele, tu likolisilako oku yuvula ovisimĩlo viaco.—Va Rom. 7:​24, 25.

AMAMAKO OKU KALA UKUACILI

15-16. Ekolelo lipi tu pondola oku kuata nda tuamamako oku kala vakuacili ku Yehova kuenda momo lie? (2 Samuele 22:26)

¹⁵ Yehova o yongola okuti tu nõla onjila ya sunguluka okuti: “Oku kakatela kokuaye.” (Esin. 30:​19, 20) Nda tua ci linga, tu pondola oku kolela okuti eye o kamamako oku lekisa ocisola ka ci pongoloka kokuetu. (Tanga 2 Samuele 22:26.) Osimbu tu amamako oku kala vakuacili ku Yehova, tu pondola oku kolela okuti eye o ka tu kuatisa kovitangi viosi tu liyaka lavio komuenyo wetu.

¹⁶ Ndomo tua ci konomuisa, tu kuete asunga alua oku amamako oku pandikisa kovitangi tu liyaka lavio komuenyo, ndeci onaviyu yimue yi kuete onjundo. Tua kũlĩha okuti Yehova o tu sole kuenda o kamamako oku tu kuatisa. Eci oco Embimbiliya li longisa. Nda okuti eteke limue tua kuata atatahãi atiamẽla kocisola caco, tu sukila oku ivaluka ovina tua kũlĩha viatiamẽla kocisola ca Yehova, okuti ka tu kolela kovina tu kasi oku sima vepuluvi liaco. Tu yongola oku amamako oku kolela kocili Cembimbiliya cokuti, ocisola ka ci pongoloka ca Yehova ci kala otembo ka yi pui.