Ndomo Yehova a tu Kuatisa Oku Pandikisa

1. Momo lie ka ca lelukilile kokuetu oku pandikisa kuenda ekuatiso lipi tu kuete? (1 Petulu 5:10)

KOLONEKE vilo via sulako, tua siata oku liyaka lovitangi vialua okuti, pamue ka ci leluka oku amamako oku pandikisa toke kesulilo. Vamue va kasi oku liyaka luvei umue vokuenda kuotembo yalua. Vakuavo va kasi oku tala ohali omo lioku fisa omunu umue va sole. Handi vali, vamue va siata oku liyaka lelambalalo li tunda kepata ale kolombiali. (Mat. 10:​18, 36, 37) Pole, kolela okuti Yehova o pondola oku ku kuatisa oku pandikisa kovitangi viosi o kasi oku liyaka lavio.—Tanga 1 Petulu 5:10.

2. Nye ci tu kuatisa oku pandikisa?

² Epandi li lomboloka oku amamako oku kolela ku Yehova kuenda oku u vumba lesanju ndaño ceci tu liyaka lovitangi, tu lambalaliwa ale ceci tu setekiwa. Pole, tu pondola lika oku pandikisa lekuatiso lia Yehova, una o tu ĩha “unene wa piãla.” (2 Va Kor. 4:7) Vocipama cilo, tu konomuisa aliangiliyo akuãla Yehova a tu ĩha oco a tu kuatise oku pandikisa. Tu konomuisavo eci tu sukila oku linga oco tu kuatisiwe laliangiliyo aco.

OHUTILILO

3. Momo lie tu popela okuti ohutililo eliangiliyo limue li komõhisa?

³ Yehova wa linga eliangiliyo limue li komõhisa, li pondola oku tu kuatisa oku pandikisa. Eye wa ecelela okuti tu sapela laye ndaño ka tua lipuile. (Va Hev. 4:16) Ivaluka okuti: Tu pondola oku likutilila ku Yehova kapuluvi osi kuenda oku u situluila ovina viosi vi tu sakalaisa. Eye o pondola oku tu yevelela kelimi liosi tu vangula kuenda kovitumãlo viosi tu sangiwa, ndaño ceci tu kasi lika lietu ale vokayike. (Yona 2:​1, 2; Ovil. 16:​25, 26) Ndaño tua sakalala calua okuti ka tu tẽla oku sanga olondaka vioku situlula ovisimĩlo vietu, Yehova o pondola oku kuata elomboloko liovina tu yongola oku popia. (Va Rom. 8:​26, 27) Ocili okuti, ohutililo eliangiliyo limue li komõhisa!

4. Tua kũlĩha ndati okuti eci tu likutilila ku Yehova oco tu pandikise, eye o tu kuatisa?

⁴ Yehova Vondaka yaye Embimbiliya wa tu likuminya okuti, “nda tu pinga ovina viosi vi likuata locipango caye, eye o tu yeva.” (1 Yoa. 5:14) Anga hẽ tu pondola oku pinga ekuatiso ku Yehova oco tu tẽle oku pandikisa? Ocili okuti tu pondola! Momo Yehova o yongola okuti tu amamako oku pandikisa. Tua ci kũlĩha ndati? Eci tu pandikisa koloseteko, tu kuatisa koku eca etambululo ku Satana Eliapu una wa siata oku sepula Yehova. (Olosap. 27:11) Handi vali, Embimbiliya li popia okuti Yehova o yongola oku ‘lekisa ongusu yaye koku kuatisa vana okuti, ovitima viavo via sunguluka kokuaye.’ (2 Asa. 16:9) Omo liaco, tu koleli okuti Yehova o kuete unene kuenda onjongole yoku tu kuatisa oku pandikisa.—Isa. 30:18; 41:10; Luka 11:13.

5. Ohutililo yi pondola oku tu kuatisa ndati oku liyeva ciwa? (Isaya 26:3)

⁵ Embimbiliya li popia okuti eci tu likutilila catiamẽla kasakalalo etu, ‘ombembua ya Yehova Suku yina ya piãla olondunge viosi, yi ka lava ovitima vietu kuenda ovisimĩlo vietu.’ (Va Fil. 4:7) Tu pandula calua omo lieliangiliyo liaco. Omanu vana ka va vumbi Yehova, va siatavo oku liyaka lovitangi vialua kuenda va seteka olonjila vialua vioku kuata ombembua yo vutima. Ndeci, omanu vamue va siata oku kuama onjila yimue ka ya sungulukile yoku sokolola, oco va imũle ovisimĩlo viosi vi va sakalaisa loku liyeva ciwa. Pole, oku kuama onjila yaco, ci kapa kohele ekolelo lietu momo, ci lekisa okuti tu kasi oku vetiyiwa lolondele. (Ci sokisa lelivulu lia Mateo 12:​43-45.) Ndaño okuti omanu vamue va siata oku liyeva ciwa noke yoku kuama onjila yaco yoku sokolola, pole, ovo ka va kuete ombembua yocili yi tunda ku Yehova yina okuti oyo ya velapo. Eci tu likutilila ku Yehova tu lekisa okuti, tua kolela kokuaye lutima wosi kuenda eye o ka tu ĩha “ombembua ka yi pui.” (Tanga Isaya 26:3.) Onjila yimue Yehova a kuama oco a tu ĩhe ombembua yo vutima, oku tu kuatisa oku ivaluka ovisonehua Viembimbiliya vi tu lembeleka. Ovisonehua viaco, vi lava ovitima kuenda ovisimĩlo vietu, momo tua kũlĩha okuti Yehova wa tu kapako kuenda o yongola okuti, tu li yeva ciwa.—Osa. 62:​1, 2.

6. Ovina vipi o pondola oku kongela volohutililo viove? (Talavo ociluvialuvia.)

⁶ Ceci o pondola oku linga. Eci o liyaka locitangi cimue ci seteka ekolelo liove, “imba ocilemo cove ku Yehova” kuenda likutilila oku pinga ombembua yaye. (Osa. 55:22) Likutililavo oku pinga olondunge o sukila oco o kũlĩhe ndomo o liyaka locitangi caco. (Olosap. 2:​10, 11) Eci o likutilila ku Yehova oco o tẽle oku pandikisa, ku ka ivaleko oku eca olopandu kokuaye. (Va Fil. 4:6) Sokolola ndomo Yehova a siata oku ku kuatisa oku pandikisa eteke leteke kuenda eca olopandu kokuaye omo liekuatiso a siata oku ku ĩha. Ku ka ecelele okuti ovitangi o kasi oku liyaka lavio, vi ku tateka oku limbuka asumũlũho wa tambula ale ku Yehova.—Osa. 16:​5, 6.

EMBIMBILIYA

7. Oku kuata ocituwa coku lilongisa Embimbiliya ci tu kuatisa ndati oku pandikisa?

⁷ Yehova wa tu ĩha Ondaka yaye Embimbiliya oco li tu kuatise oku pandikisa. Vembimbiliya mu sangiwa ovinimbu vialua vi lekisa okuti Yehova o ka tu kuatisa. Tu kũlĩhĩsi ulandu umue. Kelivulu lia Mateo 6:8 ku popia hati: “Isiene wa kũlĩha ovina vu sukila osimbu ka wo pingili.” Yesu eye wa vangula olondaka evi kuenda wa kũlĩha ciwa Yehova okuti omunu ukuavo ci sule. Omo liaco, tu pondola oku kolela okuti eci tu kasi oku liyaka lovitangi, Yehova wa kũlĩha ovina tu sukila kuenda o ka tu kuatisa. Vembimbiliya mu sangiwa olohuminyo vialua via Yehova vi tu ĩha ongusu tu sukila, oco tu tẽle oku pandikisa kovitangi.—Osa. 94:19.

8. (a) Onumbi yipi Yembimbiliya yi tu kuatisa oku pandikisa kovitangi? (b) Nye ci tu kuatisa oku ivaluka olonumbi Viembimbiliya eci tu sukila oku nõla onjila yimue?

⁸ Embimbiliya li tu ĩha olonumbi vi tu kuatisa oku pandikisa kovitangi. Olonumbi viaco vi tu ĩha olondunge tu sukila oco tu nõle olonjila viwa. (Olosap. 2:​6, 7) Ndeci, Embimbiliya li tu vetiya oku liwekapo oku sakalala lovina vi pondola oku lipita letu, pole, tu sukila oku kolela ku Yehova eteke leteke. (Mat. 6:34) Omo liaco, nda tua kuata ocituwa coku tanga Embimbiliya eteke leteke loku sokolola kovina tua tanga, ci ka leluka kokuetu oku ivaluka olonumbi Viembimbiliya eci tu sukila oku nõla onjila yimue.

9. Ovolandu a sangiwa Vembimbiliya a pondola oku vokiya ndati ekolelo lietu kekuatiso lia Yehova?

⁹ Vembimbiliya mu sangiwavo ovolandu omanu va kolelele ku Yehova haivo va kuatisiwa laye. (Va Hev. 11:​32-34; Tia. 5:17) Eci tu sokolola kovolandu aco, tu vokiya ekolelo lietu liokuti, Yehova “ocitililo haeye ongusu yetu, olonjanja viosi tu pondola oku kuata ekuatiso liaye kotembo yohali.” (Osa. 46:1) Poku konomuisa ongangu yekolelo yafendeli va Yehova vo kosimbu, tu vetiyiwa oku setukula ekolelo kuenda epandi liavo.—Tia. 5:​10, 11.

10. Nye o sukila oku linga oco o kuatisiwe Lembimbiliya?

¹⁰ Ceci o pondola oku linga. Tanga Embimbiliya eteke leteke kuenda soneha ulala umue wovinimbu o sima okuti vi pondola oku ku kuatisa. Omanu valua va limbuka okuti, oku tanga ocisonehua ceteke leteke, onjila yimue yiwa yoku fetika eteke locisimĩlo cimue Cembimbiliya ci vetiya. Manji umue ukãi o tukuiwa Mariea wa limbuka esilivilo liaco eci olonjali viaye via limbukiwa okuti vi kuete uvei wo kancer. Nye co kuatisa oku pandikisa osimbu a kala oku va tata vokuenda kuolosãi viavo via sulako? Eye hati: “Ocina cimue ca ñuatisa, oku tanga Ocisonehua Ceteke oloneke viosi lomẽle kuenda oku sokolola kocisonehua caco. Eci ca ñuatisa oku sokolola ku Yehova eteke leteke kuenda kovina vi komõhisa eye a tu longisa vondaka yaye okuti, si tiamisila utima kovitangi nda kala oku liyaka lavio.”—Osa. 61:2.

VAMANJETU

11. Tu liyeva ndati eci tu sokolola okuti vamanjetu va kasi oku pandikisa poku liyaka lovitangi?

¹¹ Yehova wa tu ĩha ongongela ya vamanji voluali luosi oco va tu kuatise oku pandikisa. Oku kũlĩha okuti “vamanji vosi voluali va kasi oku tala ohali yimuamue,” ci tu kuatisa oku kolela okuti ka tu kasi ulika. (1 Pet. 5:9) Ci lembeleka oku kũlĩha okuti, ovitangi viosi tua siata oku liyaka lavio, vamanji vakuavo va kasivo oku liyaka lavio kuenda va kasi oku pandikisa. Eci ci lekisa okuti tu pondolavo oku pandikisa!—Ovil. 14:22.

12. Vamanjetu va pondola oku tu kuatisa ndati kuenda nye tu sukilavo oku va lingila? (2 Va Korindo 1:​3, 4)

¹² Vamanjetu va pondola oku tu kuatisa oku pandikisa, pocakati covina va popia kuenda eci va linga. Upostolo Paulu wa limbuka okuti olondaka evi viocili. Vovikanda eye a soneha, wa tukula olonduko via vana vo kuatisa eci a kala vokayike konjo yaye muẽle kuenda wa eca olopandu kokuavo. Vamanji vaco va lembeleka Paulu, vo pamisa kuenda vo kuatisa. (Va Fil. 2:​25, 29, 30; Va Kol. 4:​10, 11) Koloneke vilo, vamanjetu va pondolavo oku tu lembeleka loku tu kuatisa oku pandikisa kovitangi kuenda tu pondolavo oku linga cimuamue eci ovo va liyaka lovitangi.—Tanga 2 Va Korindo 1:​3, 4.

13. Nye ca kuatisa manji Maya oku pandikisa?

¹³ Ongongela yetu ya vamanji, ya pamisa calua manji umue ukãi ko Rusia o tukuiwa Maya. Kunyamo wo 2020 akuenje velombe vocipikipiki va iñila vonjo yaye loku nyañomõla ovina. Noke eye wa tualiwa kombonge loku sombisiwa omo lioku kunda. Manji Maya wa popia hati: “Vamanji va ndi pamisa calua vokuenda kuotembo yaco ka ya lelukile. Olonjanja viosi nda kũlĩhĩle okuti, ovo va ndi sole kuenda va kasi ndepata kokuange. Ovina ovo va ndingila via mbetiya oku ci kolela.”

14. Nye tu sukila oku linga oco tu kuatisiwe la vamanji? (Talavo ociluvialuvia.)

¹⁴ Ceci o pondola oku linga. Eci ove o kasi oku liyaka locitangi cimue, ci kuete esilivilo oku sapela la vamanji loku pita otembo lavo. Ku ka kuate ohele yoku pinga ekuatiso kakulu vekongelo. Momo ovo va pondola oku kala “ndocitumãlo cimue coku vunda ombela yenda lofela yalua.” (Isa. 32:​2, etosi.) Ivaluka okuti, vamanji vakuavo va kasivo oku liyaka lovitangi. Omo liaco, eci o lingila ocina cimue ciwa komunu umue o sukila ekuatiso, ove o ka yeva esanju kuenda ci ka ku kuatisa oku pandikisa kovitangi.—Ovil. 20:35.

ELAVOKO LIO KOVASO YOLONEKE

15. Elavoko lio kovaso yoloneke lia kuatisa ndati Yesu kuenda li tu kuatisavo ndati? (Va Heveru 12:2)

¹⁵ Yehova wa tu ĩha elavoko limue lia koleliwa, oco li tu kuatise oku pandikisa. (Va Rom. 15:13) Ivaluka okuti elavoko, olio lia kuatisa Yesu oku pandikisa keteke ka lia lelukile liomuenyo waye palo posi. (Tanga Va Heveru 12:2.) Yesu wa kũlĩhĩle okuti nda eye wamamako lekolelo, nda wa lekisa okuti ovina viosi Satana a popia viatiamẽla ku Yehova viuhembi kuenda Yehova o sesamẽla oku sumbiwa. Handi vali, Yesu wa lavokailevo oku tiukila kilu ku isiaye kuenda otembo a ka linga osoma, loku viala kumue la vamanjaye olombuavekua. Cimuamue haico okuti, elavoko lietu lioku ka kala otembo ka yi pui voluali luokaliye lua Suku, li tu kuatisa oku pandikisa kovitangi viosi tu liyaka lavio voluali lulo lua Satana.

16. Elavoko lia kuatisa ndati manji umue ukãi oku pandikisa kuenda nye wa lilongisa kovina eye a popia?

¹⁶ Kũlĩhĩsa ndomo elavoko liatiamẽla Kusoma lia kuatisa manji umue ukãi wo ko Rusia o tukuiwa Alla okuti, ulume waye wa kapiwa vokayike. Eci ovina viaco via lipita, manji Alla wa popia hati: “Eci ndi likutilila ku Yehova catiamẽla kelavoko lietu lio kovaso yoloneke kuenda oku sokolola lutate kelavoko liaco, ci ndi kuatisa oku yuvula oku sumua calua. Nda kũlĩha okuti noke liovitangi viaco, kuiya ovina viwa. Yehova o ka kundula ovanyãli vaye vosi kuenda o ka tu sumũlũisa.”

17. Tu lekisa ndati olopandu vietu omo lielavoko Yehova a tu ĩha? (Talavo ociluvialuvia.)

¹⁷ Ceci o pondola oku linga. Sanda otembo yoku sokolola lutate kelavoko li komõhisa Yehova a likuminya lio kovaso yoloneke. Sokolola ndomo ove o ka kala voluali luokaliye lua posoka, kumue lakamba vove kuenda epata okuti, vosi va ka kuata esanju. Ohali yosi tu kasi oku tala, “yotembo yimue yitito.” (2 Va Kor. 4:17) Handi vali, likolisilako oku sapuilako vakuene olohuminyo via Suku viatiamẽla kovaso yoloneke. Sokolola ndomo ka ca lelukile kokuavo oku liyaka lovitangi violuali lulo lua Satana okuti, omanu vaco ka va kũlĩhĩle ocipango ca Suku catiamẽla kovaso yoloneke. Ndaño okuti o va sapuila lika ovina vimue, o ka va vetiya oku kũlĩha ovina vikuavo viatiamẽla Kusoma wa Yehova kuenda kolohuminyo viaye.

18. Momo lie tu kolelela kolohuminyo via Yehova?

¹⁸ Yovi noke yoku pandikisa kovitangi, eye wa sapuila Yehova hati: “Kaliye nda kũlĩha okuti, ove o kuete epondolo lioku linga ovina viosi, kuenda lacimue o sokolola oku linga okuti, ku ci tẽla.” (Yovi 42:2) Yovi wa lilongisa okuti, lacimue ci pondola oku tateka Yehova oku tẽlisa olohuminyo viaye. Eci tu ivaluka okuti Yehova o ka tẽlisa olohuminyo viaye kuenda o ka malako ovitangi vietu, ci tu ĩha ongusu yoku pandikisa. Ndeci, sokolola okuti ukãi umue o kasi oku vela vokuenda kuotembo yalua. Eye wa sumua calua omo okuti wa pita ale peka liolondotolo vialua, pole, lomue wa tẽla oku u sakula. Noke eci eye a sanga ondotolo yimue yiwa yu sapuila eci ci kasi oku u kokela oku vela kuenda ndomo a ko kuatisa oku kaya, eye o yeva ekavuluko ndaño okuti ci pondola oku ambata otembo yalua. Kaliye, ci leluka kokuaye oku pandikisa kuvei waco, momo wa kũlĩha okuti o ka sakuiwa. Cimuamue haico okuti, ekolelo tu kuete liatiamẽla kelavoko lioluali luokaliye lu keya, li tu kuatisa oku pandikisa.

19. Nye tu sukila oku linga oco tu pandikise?

¹⁹ Ndomo tua ci konomuisa, Yehova o tu kuatisa oku pandikisa kovitangi pocakati cohutililo, Embimbiliya, vamanjetu kuenda pocakati celavoko lietu lio kovaso yoloneke. Nda tua likolisilako oku talavaya ciwa laliangiliyo aco, Yehova o ka tu kuatisa kovitangi viosi tu liyaka lavio, toke kotembo eci oluali lua Satana lu ka kunduiwa.—Va Fil. 4:13.