Kolela Okuti Yehova wa ku Ecela

1-2. Tu liyeva ndati eci tu limbuka okuti Yehova wa ecela akandu etu? (Talavo koñoño.)

SOMA Daviti wa kũlĩhĩle ciwa eci ci lomboloka oku livetela evelo. (Osa. 40:12; 51:​3, olondaka vioku fetika) Eye wa lingile akandu amue anene komuenyo waye. Pole, wa likekembela lutima wosi kuenje Yehova wo wecela. (2 Sam. 12:13) Omo liaco, Daviti wa yeva esanju eci a limbuka okuti Yehova wo wecela.—Osa. 32:1.

² Ndeci ca lipita la Daviti, tu pondolavo oku yeva esanju eci tu limbuka okuti Yehova wa lekisa ohenda kokuetu kuenda wa ecela akandu etu. Ci lembeleka calua oku kũlĩha okuti, nda tua likekembela lutima wosi akandu etu, ndaño muẽle ana anene kuenda oku sapuilako akulu vekongelo loku yuvula oku a pitulula, Yehova wa likapelako oku tu ecela! (Olosap. 28:13; Ovil. 26:20; 1 Yoa. 1:9) Ocili okuti ci sanjuisa calua oku kũlĩha okuti, eci Yehova a ecela akandu etu, lalimue eteke a ka tu vetela evelo ale oku tu kangisa omo liakandu aco!—Esek. 33:16.

3-4. Manji umue ukãi wa liyeva ndati noke lioku papatisiwa kuenda nye tu konomuisa vocipama cilo?

³ Olonjanja vimue pamue ka ci leluka kokuetu oku tava kongecelo ya Yehova. Kũlĩhĩsa ulandu wa manji Jennifer okuti wa kulila vocili. Eci eye a kala oku kula, wa fetika oku linga ovina ka via sungulukile kuenda wa enda oku limbika ovina viaco kolonjali viaye. Noke lianyamo amue wa linga apongoloko komuenyo waye, wa litumbika ku Yehova loku papatisiwa. Eye wa popia hati: “Kosimbu, nda litumbikile calua koku sanda olombongo, oku linga evĩho liukahonga, oku kolua kuenda oku tema calua. Nda kũlĩhĩle eci Embimbiliya li popia okuti, omo liocilumba ca Kristu, Yehova o pondola oku ecela akandu etu. Pole, ndaño okuti nda likekembelele loku pinga ku Yehova oco a ngecele, sia kolelele okuti eye wa ngecela.”

⁴ Anga hẽ olonjanja vimue ka ca lelukile kokuove oku tava okuti Yehova wa ecela akandu wa linga kosimbu? Yehova o yongola okuti tu limbuka ohenda yaye ndeci ca lipita la Daviti. Vocipama cilo, tu konomuisa esunga lieci tu sukilila oku tava ongecelo ya Yehova kuenda ovina vi pondola oku tu kuatisa oku ci linga.

MOMO LIE TU SUKILILA OKU KOLELA KONGECELO YA YEHOVA?

5. Satana o yongola okuti tu tava kuhembi upi? Tukula ulandu umue.

⁵ Eci tu kolela okuti Yehova o tu sole kuenda wa tu ecela, ka tu ka tava kuhembi wa Satana. Ivaluka okuti Satana o ka linga cosi a tẽla, oco a tu tateke oku vumba Yehova. Oco a tẽlise ocimãho caye, o seteka oku tu vetiya oku tava okuti Yehova lalimue eteke a ka ecela akandu etu. Kũlĩhĩsa eci ca lipita lulume umue ko Korindo wa tundisiwile vekongelo omo lievĩho liukahonga. (1 Va Kor. 5:​1, 5, 13) Noke lioku likekembela, Satana wa yonguile okuti vamanji va likala oku ecela ulume waco okuti, ka vo tambula vekongelo. Handi vali, Satana wa yonguile okuti ulume waco wa likekembela, o liyeva okuti Yehova lalimue eteke a ko ecela kuenda o yuliwa “lesumuo lialua” loku liwekapo oku vumba Yehova. Satana ka pongoluile ocimãho caye ale atutu aye. Pole, etu “ka tu kasi vonumbi yatutu aye.”—2 Va Kor. 2:​5-11.

6. Nye ci ka tu kuatisa oku yuvula oku livetela evelo?

⁶ Eci tu kolela okuti Yehova wa tu ecela, tu ka liwekapo oku livetela evelo. Ocili okuti eci tu linga ekandu limue, tu livetela evelo. (Osa. 51:17) Eci ocina cimue ciwa. Momo owanji wetu wovutima u pondola oku tu vetiya oku linga apongoloko kuenda oku linga eci ca sunguluka. (2 Va Kor. 7:​10, 11) Pole, nda tuamamako oku livetela evelo noke lioku likekembela ekandu limue, tu ka liwekapo oku vumba Yehova. Eci tu kolela okuti Yehova wa tu ecela, tu liwekapo oku livetela evelo. Kuenje tu ka amamako oku u vumba lutima wa yela loku kolela okuti eye wa tu sanjukila. (Va Kol. 1:​10, 11; 2 Tim. 1:3) Pole, nye ci pondola oku tu kuatisa oku kolela okuti Yehova wa tu ecela?

NYE CI PONDOLA OKU TU KUATISA OKU KOLELA OKUTI YEHOVA WA TU ECELA?

7-8. Yehova wa li situlula ndati ku Mose kuenda eci ci tu ĩha ekolelo lipi? (Etundilo 34:​6, 7)

⁷ Sokolola kueci Yehova a popia catiamẽla kokuaye muẽle. Kũlĩhĩsa eci Yehova a sapuila Mose komunda Sinai.a (Tanga Etundilo 34:​6, 7.) Ndaño okuti Yehova o kuete ovituwa vialua viwa, wa nõlapo oku sapuila lika Mose okuti eye o ‘Suku yimue ukuahenda, haeye ukuacikembe.’ Anga hẽ eye nda wa likala oku ecela ufendeli umue wa likekembela akandu aye? Sio! Momo nda ca lekisa okuti Yehova o Suku yimue ongangala haeye ka kuete ohenda. Eye lalimue eteke a ka lekisa ovituwa viaco.

⁸ Tu koleli okuti eci Yehova a popia okuti, eye o Suku yimue ukuahenda, o kasi oku vangula ocili. Eye lalimue eteke a kemba. (Osa. 31:5) Tu pondola oku tava kovina eye a popia. Nda okuti kokuove ka ca lelukile oku ivalako akandu wa linga kosimbu, lipula ndoco: ‘Nda kolela hẽ okuti Yehova ukuahenda haeye ukuacikembe kuenda lalimue eteke a ka likala oku ecela omunu umue wa linga ekandu pole, wa likekembela? Oco hẽ si pondola oku kolela okuti eye wa ngecela?’

9. Nye Osamo 32:5 yi tu longisa catiamẽla konjila ndomo Yehova a ecela akandu etu?

⁹ Sokolola lutate kovina Yehova a tu longisa Vembimbiliya, catiamẽla konjila ndomo eye a tu ecela. Ndeci, tu kũlĩhĩsi ndomo Daviti usonehi Wembimbiliya a situlula ongecelo ya Yehova. (Tanga Osamo 32:5.) Daviti wa popia hati: “Ove wa ecela okulueya kuange kuenda akandu ange.” Kelimi lio Heveru ondaka ya pongoluiwa okuti oku ecela, yi pondola oku lomboloka “oku votoka,” “oku upa” ale “oku ambata.” Omo liaco, eci Yehova a ecela Daviti ca kala ndu okuti, Yehova wo upa ocilemo cimue eye a kala oku ambata. Kuenje Daviti wa yeva ekavuluko poku kũlĩha okuti Yehova wa ecela akandu aye osi. (Osamo 32:​2-4) Tu pondolavo oku liyeva ndeci Daviti a liyeva. Eci tu likekembela akandu etu lutima wosi, ka tu sukila vali oku amamako oku livetela evelo omo liakandu aco, momo Yehova wa tu ecela ale.

10-11. Olondaka viokuti “wa likapelako oku ecela,” vi tu longisa nye catiamẽla ku Yehova? (Osamo 86:5)

¹⁰ Tanga Osamo 86:5. Kocinimbu eci Daviti wa popia okuti Yehova “wa likapelako oku ecela.” Poku lombolola ondaka yaco, elivulu limue li popia eci catiamẽla ku Yehova hati: “[Eye] ‘ukuakuecela,’ oco ‘ocituwa caye.’” Momo lie Yehova a kuetele ocituwa coku ecela? Onepa yikuavo yocinimbu caco yi popia hati: “Ocisola cove ka ci pongoloka, calua ku vosi vana va ku vilikiya.” Ndomo tua lilongisa kocipama ca pita, Yehova wa likuminya oku lekisa ocisola ka ci pui komanu vosi vana vo sole haivo okuti lalimue eteke va ko yanduluka. Omo lioku vetiyiwa locisola caye ka ci pui, “eye o ka ecela lutima wosi” vosi vana va linga akandu kuenje va likekembela. (Isa. 55:7) Nda okuti kokuove ka ca lelukile oku kolela kongecelo ya Suku, o pondola oku lipula ndoco: ‘Nda kolela hẽ okuti Yehova wa likapelako oku ecela vosi vana va likekembela haivo va pinga ohenda yaye? Nda oco, si sukila hẽ oku kolela okuti eye wa ngecela eci nda likutilila kokuaye loku pinga ohenda yaye?’

¹¹ Tu pondola oku sanga elembeleko poku kũlĩha okuti, Yehova o kuete elomboloko liokuti etu ka tua lipuile. (Osa. 139:​1, 2) Tu kũlĩhĩsi eci Daviti a popia kosamo yikuavo kuenda ndomo olondaka viaco vi tu kuatisa oku kolela okuti, Yehova o yongola oku tu ecela.

NYE YEHOVA A IVALUKA CATIAMẼLA KOKUETU?

12-13. Ndomo ca tangiwa Kosamo 103:​14, nye Yehova a ivaluka catiamẽla kokuetu kuenda eci cu vetiya oku linga nye?

¹² Tanga Osamo 103:14. Daviti wa popia hati Yehova “ivaluka okuti, tuneketela.” Lolondaka evi, Daviti wa lombolola esunga lieci Yehova a likapelako oku ecela afendeli vaye va likekembela: Eye wa kũlĩha okuti tuakuakandu. Tu kũlĩhĩsi lutate eci ci lomboloka olondaka evi via Daviti.

¹³ Daviti wa popia okuti Yehova “wa kũlĩha ciwa ndomo tua pangiwa.” Yehova wa lulika Adama “loneketela yo posi.” Omo liaco, wa kũlĩha ciwa ndomo omanu va pangiwa kuenda ovina va sukila. Ndeci, ovo va sukila okulia, oku pekela kuenda oku fuima. Ndaño muẽle omanu va lipua va sukilavo ovina viaco. (Efet. 2:7) Pole, tunde eci Adama la Eva va linga ekandu, oku pangiwa loneketela ca kuata elomboloko likuavo. Omo okuti tu mãla va Adama, tua piñala ekandu lina li tu vetiya oku linga ovina ka via sungulukile. Yehova ka kũlĩhĩle lika okuti tuakuakandu; Daviti wa popia okuti eye o ci “ivaluka.” Kelimi lio Heveru ondaka yaco yi lomboloka okuti omo ka tua lipuile eye o tu tata lohenda. Omo liaco, olondaka via Daviti vi lomboloka okuti: Yehova wa kũlĩha okuti olonjanja vimue tu ka lueya kuenje eci a limbuka okuti tua likekembela lutima wosi, eye o lekisa ohenda kuenda o tu ecela.—Osa. 78:​38, 39.

14. (a) Nye Daviti a popia catiamẽla konjila ndomo Yehova a ecela akandu etu? (Osamo 103:12) (b) Nye tu lilongisila konjila ndomo Yehova a ecela Daviti? (Tala okakasia losapi hati: “Ndomo Yehova a Ecela Akandu Etu Loku a Ivala.”)

¹⁴ Nye Daviti a popia catiamẽla konjila ndomo Yehova a ecela akandu etu? (Tanga Osamo 103:12.) Daviti wa popia hati, eci Yehova a ecela, Eye o kapa akandu etu ocipãla “ndeci utundilo u kasi ocipãla lutakelo.” Utundilo u kasi ocipãla lutakelo kuenda lalimue eteke vi ka lisanga. Eci ci situlula nye catiamẽla kakandu ana Yehova a ecela? Elivulu limue li popia okuti: “Suku ambata akandu etu ocipãla, ndelemba limue lia pita. Tu pondola oku kolela okuti eye lalimue eteke a ka sokolola ale oku ivaluka akandu aco.” Olonjanja vimue, elemba limue li tu kokela oku sokolola kocina cimue ca pita kosimbu. Pole, eci Yehova a ecela ekandu limue, lacimue ci pondola oku u kokela oku sokolola kekandu liaco, ale oku tu kangisa omo liekandu liaco.—Esek. 18:​21, 22; Ovil. 3:19.

15. Nye tu sukila oku linga nda tu kasi oku amamako oku livetela evelo omo liakandu tua linga kosimbu?

¹⁵ Olondaka via Daviti vi sangiwa Kosamo 103, vi tu kuatisa ndati oku kolela kongecelo ya Yehova? Nda tu kasi oku amamako oku livetela evelo omo liakandu tua linga kosimbu, tu sukila oku lipula ndoco: ‘Anga hẽ ñasi oku ivalako okuti Yehova ivaluka okuti sia lipuile kuenda o ka ecela akandu ange nda nda likekembela? Anga hẽ ndi ivalukavo okuti Yehova lalimue eteke a ka ndi kangisa omo liakandu nda linga kosimbu ana eye a ecela ale?’ Yehova ka tiamisila utima kakandu tua linga kosimbu. Cimuamue haico tu sukila oku linga. (Osa. 130:3) Eci tu kolela okuti Yehova wa tu ecela, tu ka liwekapo oku livetela evelo kuenda tu ka amamako oku u vumba lesanju.

16. Tukula ocindekaise cimue ci lekisa ohele yoku amamako oku livetela evelo omo liakandu tua linga kosimbu. (Talavo ociluvialuvia.)

¹⁶ Sokolola kocindekaise cimue. Eci omunu umue a kasi oku endisa ekãlu limue, eye o pondola oku vanja volumuilo luekãlu oco a mole ovina vi kasi oku iya konyima yaye. Ocili okuti eye o pondola oku ci linga olonjanja vimue. Pole, ci koka ohele nda eye amamako oku ci linga otembo yosi. Oco eye a endise lonjila yimue ya koka, o sukila oku amamako oku luluvalela vetapalo li kasi kovaso yaye. Cimuamue haico okuti, olonjanja vimue ciwa oku sokolola kakandu tua linga kosimbu. Momo ci tu kuatisa oku yuvula oku a pitulula. Pole, nda tua amamako oku sokolola kekandu limue Yehova a ecela ale, pamue tu pumba esanju kuenda ka tu ka tẽla oku u vumba ciwa. Omo liaco, tu sukila oku tiamisila utima koku vumba Yehova kuenda oku amamako oku sokolola kohuminyo yaye yo kovaso yoloneke, eci ovina vĩvi “ka vi ka ivalukiwa vali.”—Isa. 65:17; Olosap. 4:25.

AMAMAKO OKU VETIYA UTIMA WOVE OKU KOLELA OKUTI YEHOVA O KU SOLE KUENDA O KU ECELA

17. Momo lie tu sukilila oku amamako oku vetiya utima wetu oku kolela okuti Yehova o tu sole kuenda o tu ecela?

¹⁷ Tu sukila oku amamako oku kolela okuti Yehova o tu sole kuenda wa likapelako oku tu ecela. (1 Yoa. 3:19) Momo lie? Momo Satana o kamamako oku tu vetiya oku tava okuti, omo ka tua lipuile Yehova ka tu sole kuenda lalimue eteke eye a ka tu ecela. Ocimãho caye oku koka okuti tu liwekapo oku vumba Yehova. Handi vali, Satana o ka vokiya alikolisilo aye oco a tu yapuise, momo otembo yo kambelako yitito. (Esit. 12:12) Pole, ka tu ka eceleli okuti eye o yula!

18. Nye o pondola oku linga oco o kolele okuti Yehova o ku sole kuenda wa likapelako oku ku ecela?

¹⁸ Ocipama ca pita, ca lekisa ovina tu sukila oku linga oco tu kolele okuti Yehova o tu sole. Ocipama cilo, ca tu longisa ndomo tu kolela okuti Yehova wa tu ecela. Ndeci, sokolola kueci Yehova a popia catiamẽla kokuaye muẽle. Sokololavo lutate kueci Embimbiliya li popia catiamẽla konjila ndomo Yehova a tu ecela. Ku ka ivaleko okuti Yehova wa kũlĩha okuti ka tua lipuile kuenda o tu tata lohenda. Ivaluka okuti Yehova eci a ecela ekandu limue, ka sokolola vali ekandu liaco. Omo liaco, o pondola oku kuata esanju momo wa kolela okuti Yehova o lekisa ohenda kokuove kuenje ndeci Daviti, o ka popiavo hati: “Nda pandula a Yehova omo lioku ecela ‘okulueya kuange kuenda akandu ange’!”—Osa. 32:5.