Oku Kala Ukristão ci Lomboloka Nye?—Nye Embimbiliya li Popia?

Omanu valua voluali koloneke vilo va litukula okuti Akristão. Pole, ndaño ndoco, ovo va linga ovina vi kokela vakuavo oku tala ohali. Ndeci omanu vamue vakuacipululu, olohembi ale olongangala. Vakuavo va linga ukahokolo. Omo liovina viaco, omanu vamue va lipula ndoco: ‘Oku kala Ukristão ci lomboloka nye?’

Ceci ci lomboloka oku kala Uristão

Ca leluka omunu umue oku popia okuti Ukristão. Pole, voku kala Ukristão mua kongela ovina vialua. Embimbiliya li lombolola okuti Ukristão, omunu umue okuti ondonge ya Yesu Kristu. (Ovilinga 11:26) Yesu wa popia hati: “Nda vu pandikisa vondaka yange, vulondonge viange muẽle ocili.” (Yoano 8:31) Ocili okuti ka kuli omunu umue o tẽla oku pokola kolondaka via Yesu lonjila yimue ya lipua. Pole, omunu una okuti Ukristão, o likolisilako oku kuama alongiso a Yesu kuenda o ci lekisa kovina a linga eteke leteke. Kũlĩhĩsa ovolandu amue.

Akristão va kapako calua vakuavo

Ceci Yesu a popia: “Ndu wĩhi ocihandeleko cokaliye, cokuti vu lisola pokati; ndeci ame ndo soli, ene lisolivo pokati. Poku ci linga, vosi va ka limbuka okuti vulondonge viange, nda wa lisoli pokati.”—Yoano 13:34, 35.

Ceci Yesu a linga: Yesu wa solele omanu vosi vakuekalo kuenda vakuavituwa via litepata. Eye wa sakula ava vavela, wa tekula omanu kuenda wa eca omuenyo waye oco a yovele vakuavo.—Mateo 14:14-21; 20:28.

Ovituwa Akristão va siata oku lekisa: Akristão va lekisa ocisola poku kala vakuahenda, oku yuvula ocame kuenda oku ecela. Ovo va kuatisa vana va suka kuenda va likapelako oku linga cosi citava oco va kuatise vakuavo.—1 Yoano 3:16.

Akristão vakuacili

Ceci Yesu a popia: “Haime ndicili.”—Yoano 14:6.

Ceci Yesu a linga: Yesu wa kala ukuacili kovina viosi a popia kuenda evi a linga. Eye lalimue eteke a kembele omanu. Eye wa kũlĩhĩwile okuti ukuakuvangula ocili, ndaño pamue ca ponduile oku u kokela ovitangi.—Mateo 22:16; 26:63-67.

Ovituwa Akristão va siata oku lekisa: Akristão ka va kembi. Ovo va feta alisimu avo, ka va nyãni, vakuacili kuenda olonalavãi viwa. (Va Roma 13:5-7; Va Efeso 4:28) Ovo ka va kembi vakuavo, poku linga oloseteko kosikola ka va kopiyala kuenda poku sokiya ovicapa vioku sanda upange, ovo ka va soneha ovina ka va lilongisile.—Va Heveru 13:18.

Akristão vakuahenda.

Ceci Yesu a popia: “Enjui kokuange, ene vosi wa kavi haene vu kuete ovilemo kuenje ndi vu kavuluisi. Tambuli okanga yange kuenda lilongisili kokuange, momo ame ndomboka haime ndonjuka vutima kuenje vu sanga ekavuluko. Momo okanga yange ya sunguluka kuenda ocitele cange ca lela.”—Mateo 11:28-30.

Ceci Yesu a linga: Yesu wa tataile ciwa omanu kuenda ovo va lianjele poku kala laye. Eye wa enda oku tambula ciwa omãla, oku lembeleka vana va sumua kuenda wa kapeleko vakuavo.—Marko 10:13-15; Luka 9:11.

Ovituwa Akristão va siata oku lekisa: Akristão va vangula ciwa lavakuavo kuenda ka va ci lingi lukãlu. (Va Efeso 4:29, 31, 32) Ovo va kapako calua vakuavo kuenda va sanda apuluvi oku va kuatisa.—Va Galatia 6:10.

Akristão vakuacili volohuela viavo

Ceci Yesu a popia: “Eci ca tokekisa Suku, lomue ka ka ci tepe.”—Marko 10:9.

Ceci Yesu a linga: Ndaño okuti Yesu lalimue eteke a kuelele eye wa popia okuti ulume lukãi va sukila oku kala vakuacili omunu lukuavo. (Mateo 19:9) Eye waca alungulo atiamẽla kovina vi pondola oku nyõla olohuela.—Mateo 5:28.

Ovituwa Akristão va siata oku lekisa: Akristão ka va lingi lacimue ci lekisa ekambo liesumbilo volohuela. (Va Heveru 13:4) Olohueli vi litata locisola kuenda lesumbilo.—Va Efeso 5:28, 33.