Esapulo Limue Liondaka ya Suku—Elavoko ku Vana va Tila Uyaki!

Unyamo lunyamo, omanu va siata oku lambalaliwa loku siapo olonjo viavo. Anga hẽ ove o kasi oku liyakavo locitangi caco? Nda oco, ku sukila oku liyaka locitangi caco lika wove, kolela okuti o pondola oku kuata elavoko Suku a likuminya liomuenyo umue wa kolapo poku tanga Ovisonehua vi Kola.

“Vana va tila kuyaki kuenda vana ka va kuete olonjo,a ka va sukila lika ekuatiso lietu lionjanga, pole,b . . . va sukilavo oku kuata elavoko lio kovaso yoloneke. Oco ca popia Christos Stylianides wo ko União Européia.” Omanu va kuete elavoko lio kovaso yoloneke, va kuete ovisimĩlo via sunguluka poku sokolola kelavoko liavo. Ndaño lelavoko ovo va kuete handi va sukila ekuatiso konepa yoketimba kuenda kovisimĩlo.

“Eci nda kala oku tila volupale nda kala, loku siapo epata liange nda liyeva ulika. Ame nda yeva usumba, esumuo kuenda nda sakalalele calua.”—Emmanuel wo ko Haiti.

Ove hẽ o tẽla oku sokolola ndomo nda wa liyeva? Nda ove wa siapo onjo yove o sukila ocitumãlo cimue coku puyuka kuenda celavoko. Ondaka ya Suku Embimbiliya yi pondola oku ku kuatisa ndati?

Ondaka ya Suku yi lembeleka

Embimbiliya li popia okuti: “Yehovac . . . O lekisa ocisola kocingendeleyi.”—Esinumuĩlo 10:17, 18.

Embimbiliya li popia hati: “Yehova o kasi ocipepi la vosi vana vo vilikiya.”—Osamo 145:18.

Embimbiliya li popia hati: “Suku yocili lalimue eteke a linga eci cĩvi . . . Ukuonene Wosi lalimue eteke a linga eci ka ca sungulukile.”—Yovi 34:10, 12.

Eci ci lomboloka okuti Suku ka pondola oku ku kokela ohali. Eye ka kasi oku ku kangisa ale oku seteka oku ku kokela ovitangi komuenyo wove.

Ondaka ya Suku yeca elavoko

Embimbiliya li lombolola eci Suku a ka linga kovaso yoloneke. Sokolola ndomo elavoko eli li kasi oku kuatisa omanu vana va siapo olonjo viavo.

Embimbiliya li popia hati: “Eye [Suku] o ka puenya asuẽlẽla osi vovaso avo, oku fa ka ku ka kalako vali, ndaño oku lila loku liyula levalo ka vi ka kalako vali.”—Esituluilo 21:4.

Eci ci lomboloka okuti ohali yi kapua. Suku wa likuminya okuti o ka malako ovitangi viosi via siata oku tu kokela ohali koloneke vilo.

“Ndopo Suku o ka malako ekambo liesunga lia siata pokati komanu. Elavoko liaco lia siata oku ndi kuatisa oku tiamisila utima kelavoko lio kovaso yoloneke okuti ohali yosi yi kapua.”—Karla, wo ko El Salvador.

Embimbiliya li popia hati: “Ovina viosimbu ka vi ka ivalukiwa vali, ndaño oku iya vali kutima.”—Isaya 65:17.

Eci ci lomboloka okuti tu ka yovuiwa kovisimĩlo vi koka evalo. Suku wa likuminya okuti ove ku ka sakalaisua vali lovisimĩlo viesumuo viatiamẽla kovina vĩvi wa lingaile kosimbu.

“Embimbiliya li likuminya okuti ka tu ka ivaluka vali evalo, epese kuenda ohali tua siata oku tala. Elavoko eli li ndi kuatisa oku liyaka lovitangi vapuluvi ka a lelukile momo nda kũlĩha okuti ndopo ovina viosi evi vi ka pongoloka.”—Natalia, wo ko Ukrânia.

Embimbiliya li popia hati: “Suku yo kilu o ka tumbika usoma umue okuti . . . u ka nyanyõla loku kundula ovosoma aco osi.”—Daniele 2:44.

Eci ci lomboloka okuti uviali umue wa lipua wo kilu owo u ka viala ongongo. Ndopo uviali wa Suku u ka piñainya ovosoma osi omanu. Usoma waco u ka nena ombembua yocili loku kolapo kuenda esunga komanu vosi.—Mika 4:3, 4.

“Ndi kuete esanju omo lioku kũlĩha okuti oku lambalaliwa, oku tatiwa lãvi omo liakova a litepa, ka vi kala otembo yalua, momo Usoma wa Yehova ndopo u kamalako ovitangi viosi evi.”—Mustafa, wo ko Oriente Medio.

Ukũlĩhĩso Wondaka ya Suku

Ukũlĩhĩso u sangiwa Vembimbiliya u pondola oku ku kuatisa oku limbuka ndomo wa pandikisa kovitangi wa liyaka lavio. U pondolavo oku ku kuatisa oku liyaka lapongoloko oku kongelamo oku pumba ovina o kuete. Limbuka ndomo olonumbi vi kuaĩmo via siata oku kuatisa vana va tila kofeka yavo omo liuyaki:

Embimbiliya li popia hati: “Momo ndaño omunu o kuete calua, omuenyo waye ka u tundi kovina a kuete.”—Luka 12:15.

Ndomo o pondola oku kuatisiwa lolondaka evi viukũlĩhĩso: Citava okuti, o yeva evalo lialua kuenda esumuo omo liepese. Pole, nda wa sokolola kesilivilo liomuenyo wove okuti ovina wa pumba vi sule, ci ku kuatisa oku yula esumuo.

“Omuenyo wa velapo calua okuti ovokuasi a sule. Ovina o kuete oku kongelamo olombongo ka vi pondola oku ku kuatisa oku tetulula ovitangi vimue.”—Natalia, wo ko Ukrania.

Embimbiliya li popia hati: “Ku ka pule hati: ‘Momo lie oloneke viosiahũlu via velelepo okuti, oloneke vilo vi sule?’”—Ukundi 7:10.

Ndomo o pondola oku kuatisiwa lolondaka evi viukũlĩhĩso: Citava okuti, ocitangi o kasi oku liyaka laco ca tĩla calua, pole, nda wa yuvula oku vi sokisa lekalo liove lio kosimbu, ci ka ku kuatisa oku yuvula esumuo lialua.

“Oku tava ekalo ndi sangiwa cilo, ci ndi kuatisa oku kuata ovisimĩlo via sunguluka.”—Eli, wo ko Rwanda.

Embimbiliya li popia hati: “Omo liaco, nda tu kuete okulia luwalo, tu sanjuka lovina viaco.”—1 Timoteo 6:8.

Ndomo o pondola oku kuatisiwa lolondaka evi viukũlĩhĩso: Likolisilako oku sanjukila ovina o kuete komuenyo. Esanju li pondola oku ku kuatisa oku yuvula asakalalo.

“Embimbiliya lia siata oku ndi kuatisa oku tenda ovina lonjila ya litepa okuti si tiamisila utima kovina tua pumba. Ame kumue lukãi wange tua sanjuka omo tu kasi kocitumalo cimue okuti ca kolapo.”—Ivan, wo ko Ukrania.

Embimbiliya li popia hati: “Omo liaco, ovina viosi vu yongola okuti omanu vo vi lingili, haivio vu linga kokuavo.”—Mateo 7:12.

Ndomo o pondola oku kuatisiwa lolondaka evi viukũlĩhĩso: Nda ove wa lekisa epandi kuenda ohenda, o ka kuata ukamba uwa la vakuene. Alikolisilo ove a ka ku kuatisa oku yuvula olonepele via kova kuenda oku taviwa pocitumãlo o kasi.

“Omanu va sole calua eci o va tata lesumbilo, ohenda kuenda ocisola. Eci ci ku kuatisa oku kuata ovituwa viwa kuenda ukamba lomanu vo pocitumãlo o kasi.”—Angelo, wo ko Sri Lanka.

Embimbiliya li popia hati: “Apingilo ene a kũlĩhĩwe la Suku kuenje ombembua ya Suku . . . yi ka lava ovitima viene kuenda ovisimĩlo viene.”—Va Filipoi 4:6, 7.

Ndomo o pondola oku kuatisiwa lolondaka evi viukũlĩhĩso: Li kutilila ku Suku catiamẽla kasakalalo ove, kasukila ove kuenda ovosumba. Olohutililo viaco vi pondola oku tepulula asakalalo kuenda oku likisa lekalo liove liokaliye.

“Olonjanja viosi ndi kuata ovitangi ndi likutilila ku Suku kuenda eye o ndi tambulula. Ovina nda lilongisa Vembimbiliya via ñuatisa oku kuata ombembua yovutima.”—Yol, wo ko Afrika do Sul.

“Alungulo awa a sangiwa Vembimbiliya a ndi kuatisa oku kuata ombembua yo vutima ndi sukila oco ndi tẽle oku liyaka lovitangi.”—Valentina, wo ko Ukrania.

“Oku kũlĩha okuti Yehova Suku wa likuminya omuenyo umue wa velapo ci ndi pamisa.”—Emmanuel, wo ko Haiti.

O yongola hẽ oku lilongisa catiamẽla kolohuminyo Viembimbiliya vi eca elavoko kuenda ndomo o pondola oku kolela ko kuavio? Pinga oco Olombangi Via Yehova vi ku nyule. Ovio vi ka sanjukila oku ku kuatisa.