Ndomo Amamako Oku Pitisa Kovaso Upange wa Yehova Komuenyo Wove

1-2. Tukula ocindekaise cimue ci lekisa okuti ocina cimue ci kuete esilivilo ci pondola oku tu tateka oku tiamisila utima kocina ca velapo.

SOKOLOLA okuti o kasi oku endisa ocendelo cimue kuenje o telefone yove yi sika. Ove o lipula nda omunu o kasi oku ku telefonalela o sukila ekuatiso, pole, ku pondola oku tambulula momo o sukila oku tiamisila utima vetapalo. Cimuamue haico okuti, eteke leteke tu sukila oku nõla ovina via velapo komuenyo wetu.

² Vosi yetu tu kuete ovina vialua via velapo tu sukila oku linga. Pole, tua kũlĩha okuti oku pitisa kovaso upange wa Yehova komuenyo wetu,a oco ocina ca velapo tu pondola oku linga. (Mat. 6:33) Eli olio esunga lieci okuti ndeci ongendisi yimue, Akristão va sokolola lutate kovina vi pondola oku va tateka oku pitisa kovaso upange wa Yehova komuenyo wavo.—Olosap. 4:25; Mat. 6:22.

3. Nye tu ka konomuisa vocipama cilo?

³ Lomue pokati ketu o yongola oku liwekapo oku pitisa kovaso upange wa Yehova komuenyo. Pole, vosi yetu tua siata oku liyaka lovitangi vi pondola oku tu tateka oku ci linga. (Luka 21:​34-36) Omo liaco, oco tu tẽle oku pitisa kovaso upange wa Yehova komuenyo wetu, tu ka konomuisa (1) ovina vimue vi pondola oku tu tateka oku ci linga, (2) ndomo Yesu a tẽla oku amamako oku linga ocipango ca Suku kuenda (3) ndomo tu pondola oku setukula ongangu ya Yesu.

OVINA VI PONDOLA OKU TU TATEKA OKU PITISA KOVASO UPANGE WA YEHOVA KOMUENYO WETU

4-6. Ovina vipi vi pondola oku tu tateka oku pitisa kovaso upange wa Yehova komuenyo wetu?

⁴ Kuli ovina vialua vi kuete esilivilo vosi yetu tu sukila oku linga. Ndeci, pamue tu kuete ocitangi cimue cuhayele, ovitangi vepata ale ovina vikuavo. Ocili okuti ovina viaco, vi kuete esilivilo kuenda tu sukila oku vi potolola. Pole, anga hẽ ovio vi pondola oku tu tateka oku pitisa kovaso upange wa Yehova komuenyo wetu? Eci ci pondola oku lipita nda okuti, tua pesela otembo yalua oku sokolola kovina viaco kuenda ka tu kuata vali otembo longusu yoku linga ovina vikuavo.

⁵ Handi vali, valua pokati ketu tu kasi kovitumãlo kuli ungangala walua, ekambo liolombongo, ovovei kuenda ovoyaki. (2 Tim. 3:1) Eci tu liyaka lovitangi viaco, tu pondola oku sakalala calua loku tiamisila lika utima kovina viaco.

⁶ Citava okuti tua kũlĩha omanu vamue va liyaka lovitangi viaco okuti, via pongolola omuenyo wavo. Ka ci tu komõhisa oku mola okuti omanu vaco va kasi lesumuo lialua omo liovina va lipita lavio. Momo Yehova ka lulikile omanu oco va tale ohali ale oku yeva esakalalo. Pamue omanu vamue va liyeva okuti ka va tẽla vali oku kuata ekalo limue liomuenyo va yonguile! Omo liaco, ovo va seteka oku ivalako ovitangi viaco poku pesela otembo yavo koku linga olomapalo ale ovitalukilo. Nye tu pondola oku linga nda tua limbuka okuti tu kasivo vekalo liaco? Tu konomuisi ovina tu lilongisila kulandu wa Yesu loku limbuka eci eye a linga oco amameko oku pitisa kovaso upange wa Yehova komuenyo waye.

NDOMO YESU A TẼLA OKU PITISA KOVASO UPANGE WA YEHOVA KOMUENYO WAYE

7. Nye nda ca tateka Yesu oku linga ocipango ca Suku?

⁷ Yesu wa kuatele ovina vialua via ponduile oku u tateka oku linga ocipango ca Suku ndeci, ovitangi viofeka, ale viopulitika. Eci a kala palo posi, omanu valua va kala olohukũi kuenda olombei. (Mat. 14:14; Mar. 14:7) Omanu vaco va enda oku tatiwa lekambo liesunga peka lia va Roma kuenda lia va Yudea vakuavo. Eci omanu va mola okuti Yesu wa kuatele unene woku linga ovikomo, va yonguile oku u lingisa osoma. (Yoa. 6:​14, 15) Handi vali, Satana wa seteka Yesu kuenda wa yonguile okuti u kuatisa oku kala ombiali yoluali. (Mat. 4:​8, 9) Upostolo Petulu, umue pokati kakamba Yesu a solele calua, onjanja yimue wa vetiya Yesu oco a kuame onjila yimue ya leluka, poku u sapuila hati: “A Ñala, likuatela ohenda.”—Mat. 16:​21, 22.

8. Yesu wa tẽla ndati oku yula ovina nda vio tateka oku pitisa kovaso upange wa Yehova komuenyo waye?

⁸ Nye ca kuatisa Yesu oku pitisa kovaso upange wa Yehova komuenyo waye? Ovina vitatu. Catete, eye wa kuatele ovisimĩlo ndevi via Yehova. (Yoa. 8:28; 14:9) Cavali, wa pitisile kovaso upange woku kunda komuenyo waye. (Mat. 9:35) Catatu, eye wa kuatele elomboloko liovina via velapo. (Yoa. 4:34) Yesu wa likala oloseteko via Satana kuenda wa kũlĩhĩle okuti ndaño Petulu wa kuatele ovisimĩlo vioku u kuatisa, pole, ovina Petulu a popia ka via likuatele locipango ca Yehova. (Mat. 4:10; 16:23) Yesu ka ecelelele okuti ovisimĩlo viomanu, ovina ovo va enda oku popia kuenda ovilinga viavo, vi u tateka oku linga ocipango ca Suku. Ocili okuti koloneke vilo, ovina vi pondola oku tu tateka oku pitisa kovaso upange wa Suku, via litepa levi Yesu a liyaka lavio. Pole, nda tua setukula Yesu poku linga ovina vitatu eye a linga, ci ka tu kuatisa.

NDOMO TU PITISA KOVASO UPANGE WA YEHOVA KOMUENYO WETU

9. Nye tu sukila oku linga oco tu ‘amameko oku limbuka cipi ocipango ca Yehova?’ (Va Efeso 5:17)

⁹ Kuata ovisimĩlo ndevi via Yehova. Oku kuata ovisimĩlo ndevi via Yehova, ci ka tu kuatisa oku ‘amamako oku limbuka cipi ocipango ca Yehova.’ (Tanga Va Efeso 5:17.) Tu pondola oku kũlĩha ovina vi sanjuisa Yehova poku tanga Embimbiliya kuenda oku sokolola lutate kovina tua tanga. Ndaño okuti Embimbiliya ka li tukula catiamẽla kocitangi cimue tu kasi oku liyaka laco, tu pondola oku kũlĩha ovina Yehova a tu yonguila. Ndamupi? Tu sukila oku tanga Embimbiliya oco tu kũlĩhe ciwa ovisimĩlo via Yehova viatiamẽla kocitangi caco kuenda oku likolisilako oku kapako ovina tu lilongisa.

10. Tu kuata ndati ovisimĩlo ndevi via Yehova?

¹⁰ Tu pondola oku kuata ovisimĩlo ndevi via Yehova, poku lilongisa Embimbiliya kuenda oku sokolola konjila ndomo eye a lekisa ocisola poku kuatisa afendeli vaye. (Yer. 45:5) Eci tu tanga ovolandu a sangiwa Vembimbiliya, tu sukila oku lipula ndoco: ‘Ulandu owu u ndi longisa nye catiamẽla ku Yehova? Ndi talavaya ndati lulandu waco oco u ndi kuatise oku tenda ovina ndomo Yehova a vi tenda?’ Ocili okuti, olondunge via Yehova via velapo okuti vietu vi sule. (Isa. 55:9) Omo liaco, tu sukila oku likutilila ku Yehova oco a tu kuatise oku linga ocipango caye. (Osa. 143:10) Handi vali, tu sukilavo oku likutilila oco Yehova a tu kuatise oku kuata ovisimĩlo ndevi viaye.—1 Yoa. 5:14.

11. Nye Yehova a tu yonguila?

¹¹ Yehova o yongola okuti tu lipongiyila oku iya kueteke liaye. Eli olio esunga lieci eye a yonguila okuti, tu pitisa kovaso ovina via velapo komuenyo wetu. (Mat. 24:44) Eye ka yongola okuti tu sakalala calua lovina vieteke leteke. (Mat. 6:​31, 32) Omo liaco, eci tu sakalala calua omo liocitangi cimue cuhayele, upange woku sanda eteku, epata kuenda ovitangi vikuavo, Yehova o tu ĩha olonumbi vi tu kuatisa oku kũlĩha ovina tu sukila oku linga. Nda tua pinga kokuaye olondunge kuenda ongusu oco tu liyake lovitangi viaco, eye o ka tu kuatisa.—Osa. 55:22; Olosap. 3:​5-7.

12. Nye ci ka tu kuatisa oku amamako lesanju ndaño lovina vĩvi via siata oku lipita voluali? (Mateo 5:3)

¹² Pitisa kovaso upange wa Yehova komuenyo wove. Vosi yetu tua siata oku sakalala omo liovina vĩvi vi lipita voluali, pole, ka tu tẽla oku vi tateka. Omo liaco, oku pitisa kovaso upange wa Yehova komuenyo wetu, ci tu kuatisa oku yuvula oku sakalala calua lovina viaco. Nda okuti tua pamisa ukamba wetu la Yehova, tu pondola oku kuata esanju, momo eye wa tu lulika lonjongole yaco. (Tanga Mateo 5:3.) Tu kuata ukamba uwa la Yehova poku lilongisa Embimbiliya kuenda oku likolisilako oku linga cosi tu tẽla kupange waye. Nda tua ci linga, tu ka sanjuisa Yehova kuenda onjila yimue yiwa yoku talavaya ciwa lotembo yetu.—Olosap. 23:15.

13. Tu ‘talavaya ndati ciwa lotembo yetu?’

¹³ Omo okuti Tuakristão, tua nõlapo oku ‘talavaya ciwa lotembo yetu.’ (Va Efe. 5:​15, 16) Embimbiliya ka li lekisa lika catiamẽla konjila ndomo tu talavaya lotembo yetu kovopange eteke leteke. Pole, li tu vetiyavo oku talavaya ciwa lotembo yetu osimbu esulilo ka lieyile. Oco hẽ, tu talavaya ndati ciwa lotembo yetu? Nda okuti tua pesela otembo yalua koku tanga, oku tala ale oku yevelela asapulo atiamẽla kovina vĩvi vi kasi oku lipita voluali, ci pondola oku tu sumuisa kuenda ka tu kuata vali ombili yoku tẽlisa ciwa upange wa Yehova. Omo liaco, ci kuete esilivilo oku tumbika olongave viatiamẽla kotembo tu pesela poku yevelela ale oku tala asapulo aco! Nda tua ci linga, ci ka tu kuatisa oku kuata otembo kuenda ongusu yoku linga upange wa Yehova. Ci kuetevo esilivilo oku sokolola ndomo tu vokiya upange wetu woku kunda ndeci, oku linga apasu. Handi vali, tua kũlĩhavo okuti ci kuete esilivilo oku talavaya lapuluvi osi tu kuete, oco tu kuatise omanu oku ‘popeliwa kuenda oku kuata ukũlĩhĩso wa suapo wocili.’—1 Tim. 2:4.

14. Oku pitisa kovaso upange wa Yehova komuenyo wetu ci tu kuatisa ndati? (Talavo ociluvialuvia.)

¹⁴ Oku pitisa kovaso upange wa Yehova komuenyo wetu, ci tu kuatisa oku kuata ovisimĩlo via sunguluka viatiamẽla kovina vĩvi vi kasi oku lipita voluali. Osimbu tu mola ovitangi viopulitika oku livokiya, ekambo liolombongo kuenda ovovei, ka tu sakalala, momo tua kũlĩha okuti ovina viaco vi lekisa okuti ovitumasuku via tukuiwa Vembimbiliya, vi kasi oku tẽlisiwa. Etu ka tu kuata usumba omo liovina viaco, momo tua kolela okuti, ndopo Yehova o ka vi malako kuenda o ka nena oluali luokaliye. Pole, osimbu otembo yaco ka ya pitĩlile, tu pondola oku tula utima loku kũlĩha okuti Yehova o ka tu kuatisa oku pandikisa.—Osa. 16:8; 112:​1, 6-8.

15. Ndomo ca tukuiwa kukanda 1 Petulu 4:​7, nye tu sukila oku linga kuenda momo lie?

¹⁵ Ku ka ivaleko ovina vi kuete esilivilo lia velapo. Omanu valua koloneke vilo, va tiamisila calua utima kolomapalo kuenda ka va sokolola okuti oluali lulo lu panda kesulilo. Ocili okuti ka cĩviko oku linga olomapalo, pole, oco ka tu ka yapuisiwe lovisimĩlo ndevi violuali, tu sukila oku ‘lekisa olondunge.’ (Tanga 1 Petulu 4:7.) Eci ci lomboloka nye? Ci lomboloka okuti tu sukila oku nõla ciwa olomapalo vietu loku kuata ovisimĩlo via sunguluka viatiamẽla kokuavio. Poku ci linga, ci ka lekisa okuti tua kapako ovisimĩlo via Yehova kuenda tua kũlĩha ovina vi kuete esilivilo lia velapo.—2 Tim. 1:7.

16. Nye Yesu a linga osimbu ka file?

¹⁶ Yesu olonjanja viosi wa kũlĩhĩle ciwa ovina vi kuete esilivilo lia velapo. Osimbu eye ka file, wa limbukile okuti ocina ca velapo, oku amamako lekolelo kuenda oku linga ocipango ca Yehova. Eli olio esunga lieci okuti Yesu wamamako oku likutilila lutima wosi. Pole, olondonge viaye ka via kuatele ocituwa coku lavulula kuenje via pekela momo ovio, “via sumuile calua.”—Luka 22:​39-46; Yoa. 19:30.

17. Omanu valua koloneke vilo va siata oku talavaya ndati lo internet kuenda nye ci pondola oku lipita lavo? (Talavo ociluvialuvia.)

¹⁷ Ndeci ca lipita lolondonge via Yesu, etu tu kasivo voluali lumue luovitangi kuenje olonjanja vimue tu yeva ekavo kuenda esumuo. Ovina vi kasi oku lipita koloneke vilo via sulako, vi pondola oku tu nenela asakalalo. Omanu valua oco va ivaleko ovitangi viavo, va pesela otembo yalua vo internet. Ndeci, ovo va talavaya lo internet oco va tumise alitalatu ku vakuepata kuenda kakamba vavo locimãho coku va lomboluilako ovina vi kasi oku lipita komuenyo wavo. Handi vali, va talavayavo lo internet oco va tale olovideo kuenda oku imba olovideo game. Omo okuti kuli ovina vialua viokaliye vioku tala kuenda vioku tanga, omanu va pesela otembo yalua oku linga ovina viaco. Oco tu tẽle oku lekisa olondunge poku talavaya lo internet, tu sukila oku lipula ndoco: ‘Anga hẽ ovina ndi tala levi ndi linga vo internet, vi ndi kuatisa ale vi ndi tateka oku pitisa kovaso upange wa Yehova komuenyo wange?’

18. Momo lie tu sukilila oku lekisa olondunge poku nõla olomapalo?

¹⁸ Olonjanja vimue ciwa oku linga olomapalo, momo vi tu kuatisa oku kavuluka, pole, tu sukila oku lekisa olondunge poku nõla olofilme tu tala vo televisãu ale olovideo tu tala vo internet kuenda otembo tu pesela poku tala ovina viaco. Ndeci, eci tu mala oku tala ovideo yimue vo internet, ku molẽha vali olovideo vikuavo kuenje tu setekiwa oku tala olovideo viosi. Vimue pokati kolovideo viaco, vi lekisa ungangala kuenda evĩho liukahonga. Eci oco ca lipita la manji umue ulume ko Asia. Kefetikilo eye wa enda oku tala olonepa vi lekisiwa volo filme vimue. Noke, omo okuti eye wa amamako oku tala olonepa viaco, weya oku vetiyiwa oku tala olofilme vi lekisa evĩho liukahonga. Kuenje wa fetika oku tala omanu va kasi epolõla haivo va linga ukahonga. Pole, lekuatiso liakulu vekongelo kuenda akamba vaye, wa liwekapo oku ci linga. Eye wa imũla ovipama vi lekisa olovideo viaco kuenda wa tumbika olongave viotembo a ponduile oku talavaya lotelefone yaye. Ulandu owu u situlula ciwa esunga lieci ci kuetele esilivilo oku lekisa olondunge poku nõla olomapalo.

19. Nye ci pondola oku lipita nda tua pesela otembo yalua koku linga olomapalo?

¹⁹ Tu sukilavo oku lekisa olondunge poku nõla otembo tu pesela kepuyuko ale kolomapalo. Vosi yetu olonjanja vimue tu sukila oku puyuka omo liovopange tua siata oku linga, momo ci tu kuatisa oku kuata uhayele uwa. Pole, nda tua tiamisila calua utima kovina viaco, ka tu kuata otembo yoku linga ovina via velapo. (Va Fil. 1:10) Vosi yetu tu sukila oku nõla etu muẽle ovina tu linga kuenda otembo tu pesela poku linga ovina viaco. Omo liaco, poku nõla olomapalo vietu, tu sukila oku lipula ndoco: ‘Anga hẽ nda siata oku lekisa olondunge kotembo ndi pesela koku linga olomapalo kuenda kepuyuko? Poku ci linga, ndi kasi hẽ oku pitisa kovaso ovina vi kuete esilivilo lia velapo kuenda oku lipongiyila “esulilo liovina viosi?”’

20. Tu kuatisiwa ndati nda tua yuvula okuti lacimue ci tu tateka oku linga upange wa Yehova?

²⁰ Tu kuatisiwa calua nda tua likolisilako oku yuvula okuti lacimue ci tu tateka oku linga upange wa Yehova. (Isa. 48:17) Lekuatiso lia Yehova, tu pondola oku pandikisa kovitangi tu liyaka lavio. Handi vali, ka tu ka sakalala calua omo liovina via siata oku lipita voluali. Tu ka yuvulavo oku pesela otembo yalua kolomapalo. Omo liaco, tu nõlipo oku kuata ovisimĩlo ndevi via Yehova, oku pitisa kovaso upange waye komuenyo wetu kuenda oku kuata ovisimĩlo via sunguluka viatiamẽla kovina vi kuete esilivilo lia velapo. Nda tua ci linga, tu ka lekisa okuti tua pitisa kovaso upange wa Yehova komuenyo wetu loku ‘kakatela komuenyo wocili.’—1 Tim. 6:19.