Kolela ku Yehova Ombiali ya Velapo Voluali Luosi

1. Ovitangi vipi Yovi a liyaka lavio?

YOVI kotembo yimue okuti wa kukile ale, wa pumba cosi a kuatele ndeci: omãla vaye, uhayele kuenda ovokuasi aye. Handi vali, omo liovina viosi via lipita laye, omanu ka va lekisile vali esumbilo kokuaye. “Akamba” vaye vatatu, veyile oku u nyula pole, va vangula ovina vĩvi viatiamẽla kokuaye. Toke muẽle ukãi waye wa sumuile kuenda wo sapuila hati: “Siñala Suku kuenje fa.” (Yovi 2:9; 15:​4, 5; 19:​1-3) Ovitangi viaco, citava okuti via honguisa ekolelo Yovi a kuatelele Suku yocili, loku kuata atatahãi nda okuti Yehova wa laikele muẽle oku teyuila vana vo sole haevo vo vumba.

2-3. (a) Ovina vipi tu pondola oku sokolola eci tu liyaka lovitangi? (b) Nye tu ka lilongisa velivulu lia Yovi?

² Olonjanja vimue, tu liyakavo lovitangi ka via lelukile vi pondola oku seteka ekolelo tu kuetele Yehova. Momo tu kasi kotembo yimue okuti ‘ekalo lia tĩla calua halio li koka ohele.’ (2 Tim. 3:1) Eci tu liyaka lovitangi, tu pondola oku sumua loku kuata asakalalo kuenda tu liyeva ndu okuti ka tu ka tẽla oku pandikisa. Handi vali omo liovitangi viaco, omanu vamue va fetika oku sima okuti Yehova ka va sole vali kuenda ka yongola oku va kuatisa.

³ Nda okuti wa kuatele ale ovisimĩlo viaco, ku ka sumue. Yovi wa lilongisa okuti Yehova lalimue eteke a ka yanduluka vana va kolela Kokuaye. Cimuamue haico okuti, tu pondolavo oku kolela ku Yehova lutima wetu wosi kuenda oku kũlĩha okuti Isietu wo kilu o ka tu kuatisa loku tu sumũlũisa. Vocipama cilo, tu kũlĩhĩsa ovolandu a sangiwa velivulu lia Yovi loku limbuka ndomo ovolandu aco a pondola oku tu kuatisa volonepa vivali ndeci: Catete, Yehova eye lika Ombiali ya Velapo Voluali Luosi. Cavali, tu lilongisa okuti Yehova o kuete unene woku koka okuti ovina eye a popia vi tẽlisiwa. Handi vali, eye o tu teyuila poku tu ĩha ovina viosi tu sukila oco tu amameko oku kuata ukamba umue uwa laye.

SATANA WA MOLẼHA KOVASO A SUKU KUENDA KOVANGELO VAKUEKOLELO

4. Nye ca lipita eci Yehova kuenda ovangelo vakuekolelo va liongolola kilu?

⁴ Eteke limue, “omãla va Suku yocili” va liongolola kovaso a Yehova kilu. Ulandu wamisako hati: “Satana wa iñilavo pokati kavo.” (Yovi 1:6) Eyi onjanja yatete Embimbiliya li tukula onduko “Satana.” Eye o tukuiwa londuko yaco momo o ‘tamalãla’ la Yehova. Kotembo yaco, Satana ka kaile vali omõla ukuekolelo wa Suku. Eye wa linga unyãli wa Yehova, wovangelo kuenda womanu vosi vakuekolelo. Yehova wa lekisa okuti Satana ka pangele vali onepa kepata Liaye lio kilu eci a popia olondaka vi sangiwa kelivulu Liefetikilo 3:15. Omo liaco, tunde kotembo yaco Satana ka pangi vali onepa kocitumbulukila “cukãi,” okuti epata lioviluvo viespiritu lia Yehova, kuna kua laikele oku tunda “ocitumbulukila.”

5. Nye tu lilongisila kulandu wa lipita kohongele ya lingiwa kilu?

⁵ Yehova o yongola okuti tu kũlĩha ovina via li pita kohongele ya lingiwa kilu, eli olio esunga lieci okuti ulandu waco wa sonehiwila Vembimbiliya. Olondaka Satana a popia, via lekisa ciwa okuti eye ongangala kuenda o vangula ovohembi atiamẽla komanu vana va vumba Yehova. (Yovi 1:9; sokisa Lesituluilo 12:10.) Yehova poku kongela ulandu waco Vembimbiliya, ci tu longisa okuti olonjanja viosi eci eye a talavaya lunene waye ka u pui, o ci linga lonjila yimue ya li pua haiyo ya sunguluka. Ci tu longisavo okuti Yehova Ukuonene Wosi, eye o tumbika olongave koviluvo viosi, viatiamẽla kueci ovo va pondola oku linga.

YEHOVA EYE O TUMBIKA OLONGAVE VIATIAMẼLA KUECI OVILUVO VIAYE VI PONDOLA OKU LINGA

6. Yehova wa lekisa ndati okuti eye Ombiali ya Velapo voluali luosi? (Yovi 1:​7, 8)

⁶ Tanga Yovi 1:​7, 8. Yehova wa lekisa okuti eye wa kuatele unene woku nõla ovina via laikele oku lipita kohongele yaco. Eye wa pula ku Satana hati: “Ove hẽ wa limbuka ukuenje wange Yovi?” Yehova wa kũlĩhĩle okuti ocimãho ca Satana ca kala coku seteka Yovi. Tu konomuisi ndomo Yehova Ombiali ya Velapo voluali luosi a ponduile oku talavaya lunene waye oco a kuatise Yovi.

7. Ndomo ca tangiwa kelivulu lia Yovi 1:​10, 11, nye Satana a popia catiamẽla komanu vana va vumba Yehova?

⁷ Tanga Yovi 1:​10, 11. Yehova eye Ombiali ya Velapo voluali luosi kuenda o talavaya lunene waye lonjila ndomo eye a yongola. (Yer. 32:17; Dan. 4:35) Pole, Satana wa popia okuti Yehova ka talavaya lunene Waye lonjila yimue ya sunguluka. Eye wa popiavo okuti Suku wa eca komanu ndeci ku Yovi, ovina vialua viwa oco vo vumbe. Handi vali, Satana wa popia okuti omanu vana va vumba Yehova, va ci lingila lika omo liovina viwa va pondola oku tambula Kokuaye. Yehova wa tambulula ndati Satana?

8-9. Olongave vipi Yehova a tumbika ku Satana kuenda momo lie? (Yovi 1:12) (Talavo ociluvialuvia.)

⁸ Tanga Yovi 1:12. Yehova wa ecelela okuti Satana o seteka Yovi oco a lekise nda Yovi wa solele muẽle Yehova ale sio. Pole, Yehova wa eca ku Satana ocihandeleko cimue a sukilile oku pokola. Suku wo handeleka hati: “Ku ko lambe!” Ovangelo vosi va kala kohongele yaco, va yeva eci Yehova a eca ocihandeleko caco ku Satana. Kuenje Satana wa sukilile oku pokola kocihandeleko caco. Eye ka ponduile oku pitahãla olongave viovina Yehova o handelekele. Koloneke vilo, Satana o pondola lika oku linga ovina Yehova o wecelela oku linga. Eci ci lekisa okuti, Yehova wa talavaya lunene Waye oco a teyuile Yovi kuenda wa lekisa okuti eye o Suku yimue ukuesunga haeye ukuacisola.

⁹ Satana ka litundile ciwa. Momo Yovi wa amamako oku lekisa ekolelo ku Isiaye wo kilu. (Yovi 1:22) Pole, Satana wa ponduile oku linga vali ocina cikuavo oco a koke okuti Yovi o liwekapo oku vumba Yehova.

10. Momo lie Yehova a ecelela okuti Satana o seteka vali Yovi? (Yovi 2:​2-6)

¹⁰ Tanga Yovi 2:​2-6. Noke, Satana wa yonguile vali oku linga ocina cimue cikuavo ca kãla okuti, oku seteka Yovi oco a liwekepo oku vumba Yehova. Satana wa popia okuti Yovi wa laikele oku siñala Suku oco a popele omuenyo waye. Yehova oco a lekise okuti Satana ohembi, wa ecelela okuti Satana o koka okuti Yovi o kuatiwa luvei. Pole, Yehova wa tumbika vali ongave yimue ku Satana poku u sapuila hati: “Ku ko upe omuenyo waye!” Omo liaco, Satana wa sukilile oku pokola kongave yaco Yehova a tumbikile. Yehova wa lekisa vali okuti eye Ombiali ya Velapo, momo wa kapele olongave viovina Satana a ponduile oku lingila Yovi.

YEHOVA WA MALAKO OHALI YOVI A KALA OKU TALA

11. Eci Yehova a malako ohali Yovi a kala oku tala, wo sumũlũisa ndati? (Yovi 42:​10-13)

¹¹ Tanga Yovi 42:​10-13. Eci Yovi a lekisa okuti wa laikele oku amamako lekolelo, Yehova ka ecelele vali okuti Satana o seteka Yovi. Kuenje wa malako ohali yosi Yovi a kala oku tala. Omo liaco, Satana ka kuatele vali unene oco a tateke Yehova oku teyuila loku sumũlũisa Yovi.

12. Tukula ulandu umue u lekisa ndomo Yehova a popela afendeli vaye vakuekolelo.

¹² Koloneke vilo via sulako, Yehova wa siata oku talavaya lunene waye oco a kuatise afendeli vaye. Ndeci, kunyamo wo 1945, asualali va kisika eci ci soka 230 Kolombangi Via Yehova oco va linge ungende umue unene hawo u koka ohele, oku tunda vokayike kamue ko Alemanya toke vokalunga oco va pondiwe. Pole, Olombangi viosi via Yehova via puluka. Catiamẽla kulandu waco, ovo va soneha okuti, Yehova wa va popela ndeci a popela va Heveru vatatu va imbiwile velungulungu liondalu vofolono, okuti eci va tunda, ka va lẽhele ondalu. Cimuamue haico okuti Olombangi viaco via Yehova, via yovuiwa koseteko yimue ya kãla, pole, ekolelo liavo lia pamisiwa vali calua okuti kosimbu ci sule. Yehova wa va ĩha unene waye. Ovo va liyevavo okuti va yovuiwa ndeci Daniele a yovuiwa keleva liolohosi. Noke liulandu waco, ovo va nõlapo oku vumba Yehova otembo ka yi pui. Ovo va popiavo okuti, oku amamako oku vumba Yehova oyo onima ya velapo tua ponduile oku kuata.—Sokisa lelivulu lia Daniele 3:27; 6:22.

13. Ekolelo lipi tu pondola oku kuata eci tu liyaka lovitangi? (Talavo oviluvialuvia.)

¹³ Olonjanja vimue, tu pondolavo oku liyaka lovitangi komuenyo wetu vi sokisiwa loku imbiwa veleva liolohosi. (1 Pet. 5:​8-10) Kuenje tu pondola oku yeva esumuo lialua. Pamue tu pondola oku lipula nda eteke limue ovitangi viaco vi ka pua. Vapuluvi aco, oku ivaluka ulandu wa Yovi ci pondola oku tu kuatisa. Tu pondola oku kolela okuti, Yehova o kuete unene woku malako ohali yetu yosi kuenda o pondola oku ci linga ci kaile cilo ale voluali luokaliye. Eye wa sokiya ale otembo kuenda eteke oco a kundule oluali lulo lua vĩha!

YEHOVA O SOLE AFENDELI VAYE VAKUEKOLELO

14-15. Nye Yehova a yongola oku lingila afendeli vaye vakuekolelo? (Yovi 14:15) (Talavo ociluvialuvia.)

¹⁴ Tanga Yovi 14:15. Isietu wo kilu o sole lonjila yimue yi likasi vana va kolela kokuaye. Eye o va sole calua kuenda nda okuti ovo va fa, o ka va pindula. Eci Yehova a ka pindula afendeli vaye voluali luokaliye, vosi va ka yeva esanju lialua.—Isa. 65:17.

¹⁵ Eci ohali Yovi a kala oku tala ya pua, eye handi wa amamako oku kala voluali lua vialiwile la Satana. Pole, ulandu Wembimbiliya u lekisa okuti Yehova wa sumũlũisa Yovi lonjila yimue yi komõhisa. Eye wa sakula uvei waye kuenda wo wĩha ovina vialua okuti evi a kuatele kosimbu ci sule. Asumũlũho aco, a kala lika ocindekaise covina Yehova a ka lingila Yovi kovaso yoloneke. Yehova wa lekisa okuti o yongola okuti afendeli vaye va kuata esanju komuenyo. Omo liaco, Yehova o ka eca komanu vosi va kolela kokuaye, epuluvi lioku kuata omuenyo umue wa lipua voluali luokaliye palo posi. (Esit. 21:​3, 4) Omo okuti eye Ombiali ya Velapo voluali luosi, o kuete onjongole yoku ci linga. Ocili okuti oku sokolola konjila ndomo Yehova a ka tu sumũlũisa, ci pondola oku tu lembeleka calua eci tu tala ohali!

16. Esunga lipi likuavo tu kuete lioku kolela ku Yehova Ombiali ya Velapo Voluali Luosi?

¹⁶ Ndaño okuti Yehova wa sumũlũisa Yovi lanyamo alua komuenyo, Yovi weya oku fa. Pole, Yehova o kuete unene woku u pindula momo, eye Ukuonene wosi haeye Ombiali ya Velapo Voluali Luosi. (Esin. 32:39) Omo liaco, lomue o pondola oku u tateka oku pindula omanu vana eye a sole. Kuenje Yehova o ka ci linga vepuluvi kuenda votembo a sokiya.—Va Rom. 8:​38, 39.

KOLELA YEHOVA LUTIMA WOVE WOSI

17. Nye ci lekisa okuti Satana ka tẽlele oku tu tateka oku vumba Yehova?

¹⁷ Ulandu wa Yovi, u lekisa okuti tu kuete asunga alua oku kolela ku Yehova lutima wetu wosi. Tu pandula calua Yehova omo ka ecelelele okuti Satana o kundula afendeli vaye! Koloneke vilo, tua kũlĩha okuti Yehova eye Ombiali ya Velapo Voluali Luosi momo, ci soka olohuluwa eceya viomanu va kasi oku u fendela lekolelo. Olombiali vialua violuali kuenda asongui vatavo, olonjanja vialua va seteka oku tu tateka oku fendela Yehova loku kunda olondaka viwa. Pole, ovo ka va ci tẽlele momo Yehova wa tu kuatisa. (Isa. 54:17) Handi vali, lacimue ci pondola oku tu tateka oku sapuila komanu vakuavo okuti Yehova eye Suku yocili kuenda Satana ohembi haeye omondi. Kuenda ndaño okuti tua fa, Yehova o ka pindula vosi va amamako oku kolela kokuaye.—Hos. 13:14.

18. Momo lie ka tu sukilila oku kuata usumba omo liovina vi laika oku lipita kovaso yoloneke?

¹⁸ Eci tu sokolola lutate kulandu wa Yovi, tu pamisa ekolelo lietu liokuti, Yehova o ka kala letu ndaño lovitangi tu ka liyaka lavio kovaso yoloneke. Ka tu sukila oku kuata usumba. Vokuenda kuohali ya piãla, Satana kumue lomanu vana vatiamẽla kokuaye, va ka sima okuti ca leluka oku kundula afendeli va Suku. Pole, ndeci ca lipita la Yovi, Yehova o ka talavaya lunene waye kuenda ka ka ecelela okuti Satana o kundula afendeli vaye otembo ka yi pui. Ndopo, Yehova o ka malako ohali yosi Satana a siata oku kokela omanu. Eliapu kumue lolondele viaye, va ka imbiwa vekungu vokuenda kueci ci soka 1.000 yanyamo. (Luka 8:31; Esit. 20:​1-3) Oku sulako, Satana kuenda vosi vana va sinila Yehova, va ka kunduiwa otembo ka yi pui ndomo Yehova a ci popia.—Efet. 3:15; Va Rom. 16:20; Esit. 20:10.

19. Asumũlũho api omanu vana va kolela ku Yehova va ka tambula? (Talavo ociluvialuvia.)

¹⁹ Akristão vocili, va lavoka lesanju oluali luokaliye lu laika oku iya, muna vosi yetu tu ka li pua kuenda tu ka kuata esanju liocili. Tu ka kuata ekalo limue liomuenyo okuti, lalimue eteke tua li simile. Yehova wa likuminya hati: “Tala! Ovina viosi ndi vi lingisa viokaliye.” (Esit. 21:5) Olondaka evi vi lomboloka nye? Vi lomboloka okuti Satana kumue lolondele viaye, ka va ka kokela vali ovina vĩvi komanu ale oku va yapuisa. Kuenje tu ka yeva ekavuluko liocili! Lalimue eteke tu ka yeva vali asakalalo oluali lulo, ana a siata oku tu tateka oku kuata otulo. Omanu vana va ka puluka ko Harmagedo, va ka mola ovikomo vialua. Vana va vela, va ka kuata uhayele uwa. Vangandietu vana va fa, va ka pinduiwavo. Kotembo yaco, tu ka kuata omuenyo umue uwa hawo wesanju okuti, omuenyo una Isietu wo kilu a tu yonguilile!

20. Nye wa nõlapo oku linga?

²⁰ Koloneke vilo via sulako, pamue tu ka liyaka lovitangi vialua kuenda tu ka sukila utõi oco tu amameko lekolelo. Omo liaco, tu yongola oku amamako oku kolela Yehova lutima wetu wosi, loku pokola kokuaye omo okuti eye Ombiali yetu ya Velapo Voluali Luosi. Tu lekisi okuti tu sole Yehova Isietu wo kilu, loku eca uvangi wokuti ovina Satana a popia viatiamẽla kokuaye kuenda kafendeli vaye viuhembi. Omo liaco, nda tua amamako oku kolela Yehova Ombiali ya Velapo, tu ka kuata ekalo liwa kovaso yoloneke momo, eye o yongola oku sumũlũisa afendeli vaye vakuekolelo kuenda o ka ci linga muẽle!