Esunga Lieci tu Sukilila Ocisembi

1-2. Momo lie tu sukilila okuti omunu umue o tu yovola? (Va Roma 7:​22-24) (Talavo ociluvialuvia.)

SOKOLOLA kocindekaise ci kuãimo. Osapalalo yimue yi kupuka kuenje ulume umue o sakatela kovingululu viaco. Eye handi o kasi lomuenyo, pole, ka tẽla oku tundamo lika liaye. Eye o pondola lika oku kaloloka oku pinga ekuatiso loku kevelela oco omunu umue u yovole.

² Omunu lomunu pokati ketu, o kasi vekalo ndeli liulume waco. Ndamupi? Omo okuti Adama wa sinila Ululiki waye, eye wa linga ukuakandu. Omo liaco, omo okuti tuvitumbulukila via Adama, tua lingavo vakuakandu. Ka tu pondola oku liyovola etu muẽle omo liovina via kokiwa lekandu. Upostolo Paulu kukanda a sonehela va Roma wa popia okuti omo tuakuakandu, vosi yetu ‘tuapika’ vekandu. (Tanga Va Roma 7:​22-24.) Eye wa pula ndoco: “Helie o ka ndi popela ketimba eli li ndi kokela oku fa?” Paulu wa kala upika wekandu lina a piñala okuti lia laikele oku u kokela olofa. (Va Rom. 6:23) Etu tu kasivo vekalo liaco. Tu sukila omunu umue o tu yovola kekandu kuenda kolofa!

3. Ocisembi ci tu kuatisa ndati?

³ Upostolo Paulu noke lioku vangula catiamẽla kekalo ka lia lelukile a kala, eye wa tu ĩhavo elavoko. Noke lioku linga epulilo liokuti: “Helie o ka ndi popela ketimba eli li ndi kokela oku fa?” lekolelo lialua eye wa tambulula hati: “Ngeca olopandu ku Suku pocakati ca Yesu Kristu Ñala yetu!” (Va Rom. 7:25) Upostolo Paulu wa kala oku tukula ocilumba cocisembi ca Yesu.a Ocisembi ci tu yovola momo (1) ci ecela akandu etu, (2) ci tu ĩha elavoko lioku kuata omuenyo wa li pua kovaso yoloneke kuenda (3) oku kuata ukamba uwa la Yehova. Oku lilongisa atosi aco, ci ka tu kuatisa oku vokiya ocisola tu kuetele Yehova, “Suku una eca eca elavoko.” (Va Rom. 15:13) Handi vali, tu ka lekisavo olopandu ku Yesu, una “wa tu yovola kuenda wa ecela akandu etu.”—Va Kol. 1:14.

OCISEMBI CI ECELA AKANDU ETU

4-5. Momo lie vosi yetu tu sukilila ocisembi? (Ukundi 7:20)

⁴ Etu tu sukila ocisembi oco akandu etu a eceliwe. Vosi yetu tua siata oku lueya, ci kale kovina tu popia ale kovina tu linga. (Tanga Ukundi 7:20.) Akandu amue tu linga, anene calua okuti akuavo ci sule. Ndeci, Ocihandeleko ca eciwile ku Mose ca lekisile okuti, nda u Isareli umue wa linga ukahokolo ale wa ponda omunu umue, wa sukilile oku pondiwa. (Ovis. 20:10; Ate. 35:​30, 31) Ocili okuti akandu amue ka a lisokele loku linga ukahokolo ale oku ponda omunu umue, pole, lopo ekandu. Ndeci, Daviti wa popia hati: “Ndi ka lava olonjila viange, oco ndi yuvule oku linga ekandu lelimi liange.” (Osa. 39:1) Eci ci lekisa okuti, tu pondola oku linga ekandu pocakati covina tu popia.—Tia. 3:2.

⁵ Sokolola kovina wa popia levi wa linga kosimbu. Anga hẽ eteke limue wa popele ale cimue komunu umue okuti noke weya oku livela? Anga hẽ wa lingile ale ocina cimue cĩvi kuenje wa likekembela? Ocili okuti vosi yetu tua popele kuenda tua lingile ale ocina cimue okuti ka tua ci yonguile. Embimbiliya li popia okuti: “Nda tu popia hati: “Ka tu kuete ekandu,” tu kasi oku likemba etu muẽle kuenda ocili ka ci kasi vokuetu.”—1 Yoa. 1:8.

6-7. Nye ci ecelela okuti Yehova ecela akandu etu? (Talavo ociluvialuvia.)

⁶ Ocisembi ci ecelela okuti Yehova ecela akandu etu. (Va Efe. 1:7) Pole, eci ka ci lomboloka okuti Yehova ka kapiko akandu etu ndu okuti ovio ka vi kuete esilivilo kokuaye. Yehova ka yongola okuti tu linga ekandu, momo eye wa suvuka ekandu. (Isa. 59:2) Omo liesunga liaye lia li pua, eye wa sukilile oku linga cimue oco a ecele akandu etu.

⁷ Ocihandeleko ca eciwile ku Mose ca kisikile okuti, va Isareli va eca ovilumba viovinyama oco vi tuvike akandu avo. (Ovis. 4:​27-31; 17:11) Ovilumba viaco, via lekisile okuti omanu va sukilile ocilumba cimue ca velapo, okuti ocilumba ca Yesu cina ca laikele oku nena asumũlũho alua komanu. Ocilumba ca Yesu, ci ecelela okuti Yehova ecela akandu etu. Olondaka Paulu a popia eci a sonehela Akristão vo ko Korindo, vi lekisa okuti eye wa kuata elomboloko liesilivilo liocilumba ca Yesu. Noke lioku vangula catiamẽla kovina vĩvi ovo va lingile kosimbu, eye wa popia hati: “Pole, cilo wa sukuiwi; wa kolisiwi; kuenda wa tendiwi nda vakuesunga vonduko ya Ñala Yesu Kristu kuenda lespiritu lia Suku yetu.”—1 Va Kor. 6:​9-11.

8. Kocina cipi o pondola oku sokolola osimbu o lipongiyila Onjivaluko yunyamo ulo?

⁸ Osimbu o lipongiyila Onjivaluko yunyamo ulo, sanda otembo yoku sokolola kueci ongecelo ya Yehova yi lomboloka kokuove. Ndeci, omo liocisembi ku sukila oku livetela evelo omo liekandu limue wa linga kosimbu okuti wa likekembela ale. Anga hẽ ka ca lelukile kokuove oku tava okuti Yehova wa ku ecela? Pamue o popia hati: ‘Nda kũlĩha okuti Yehova o pondola oku ngecela, pole, ame si tẽla oku li ecela ame muẽle.’ Nda wa siata oku liyeva ndoco, ivaluka okuti Yehova eye ecela omanu kuenda wa eca ku Yesu omoko yoku sombisa. Yehova ka ecele kokuove ale komunu ukuavo ocikele coku nõla nda helie a ka ecela ale sio. Embimbiliya li popia hati: “Nda tu kasi oku endela vocinyi ndeci [Yehova] a kasi vocinyi, . . . osonde ya Yesu Omõlaye yi tu yelisa kakandu etu osi.” (1 Yoa. 1:​6, 7) Omo liaco, tu pondola oku kolela lutima wosi okuti olondaka evi viocili, ndeci tu kolela kalongiso akuavo Embimbiliya. Momo ocisembi ci ecelela okuti Yehova o lekisa ohenda kokuetu kuenda Ondaka yaye yi popia okuti, eye “wa likapelako oku ecela.”—Osa. 86:5.

OCISEMBI CI TU ĨHA ELAVOKO LIOKU KUATA OMUENYO WA LI PUA KOVASO YOLONEKE

9. Vembimbiliya vondaka ekandu mua kongela nye? (Osamo 51:5 kuenda etosi.)

⁹ Vembimbiliya vondaka “ekandu,” ka mua kongelele lika ovilinga ka via sungulukile, pole, mua kongelavo ekalo ka lia li puile tua piñala tunde eci ina yetu a tu mina. (Tanga Osamo 51:5 kuenda etosi.) Omo liekalo lietu ka lia li puile, ka tu kuata lika ovisimĩlo vioku linga ovina ka via sungulukile, pole, etimba lietu ka li talavayavo lonjila ndomo Yehova a yonguile kuenje tu vela, tu kuka kuenda tu fa. Eli olio esunga lieci okuti, ndaño muẽle oloñaña via citiwa ndopo okuti handi ka via lingile ekandu, vi pondola oku vela kuenda oku fa. Handi vali, ci kaile omanu vawa ale olondingãivi, va siata oku tala ohali kuenda oku fa. Vosi yetu okuti tuvitumbulukila via Adama, tu kasi vekalo liaco ka lia lelukile.

10. Adama la Eva va liyeva ndati noke lioku linga ekandu?

¹⁰ Sokolola ndomo Adama la Eva va liyeva noke lioku linga ekandu. Ekandu lia va kokela oku kuata ovisimĩlo ka via sungulukile. Noke lioku linga ekandu, Adama la Eva va fetika oku limbuka ovitangi vi tunda koku sinila ocihandeleko ca Suku, cina ‘ca sonehiwile vovitima viavo.’ (Va Rom. 2:15) Ovo va limbuka okuti cimue kokuavo ca pongoloka. Ovo va limbukavo esukila lioku sikĩlila olonepa vimue vietimba liavo kuenda oku li salamisa kovaso Yululiki wavo ndu okuti va kala olongangala. (Efet. 3:​7, 8) Onjanja yatete komuenyo wavo, Adama la Eva va livetela evelo, va yeva esakalalo, ekambo lioku kolapo, evalo kuenda osõi. Omo liaco, oku upisa keteke liaco, ovo va sukilile oku liyaka lekalo liaco toke kolofa.—Efet. 3:​16-19.

11. Ovitangi vipi vi tunda kekambo lietu lioku li pua?

¹¹ Omo okuti vosi yetu ka tua li puile, olonjanja vimue tua siatavo oku livetela evelo, oku yeva osõi kuenda oku kuata asakalalo ndeci ca lipita lohueli yatete. Handi vali, tua siata oku tala ohali ci kaile ketimba ale kovisimĩlo. Ndaño okuti tu seteka oku mioñolõla ekalo liomuenyo wetu kuenda oku yuvula ovitangi, olonjanja vialua ku ka molẽha ovitangi vimue okuti ka tu ka tẽla oku vi tetulula. Momo lie? Momo ndomo Embimbiliya li popia, vosi yetu tua “tiamisua kuveke.” (Va Rom. 8:20) Eci ka ci lipiti lika letu, pole, ci lipitavo lomanu vosi. Ndeci, sokolola kalikolisilo osi a siata oku lingiwa oco ku tatiwe ciwa ongongo, oku malako ungangala, uhukũi kuenda oku kuata ombembua pokati kolofeka. Pole, ndaño lalikolisilo alua a siata oku lingiwa, omanu ka va tẽla oku malako ovitangi viaco. Oco hẽ, ocisembi ci pondola oku tu yovola ndati kekalo lietu liekandu?

12. Ocisembi ci tu ĩha elavoko lipi?

¹² Ocisembi ci tu ĩha elavoko liokuti, “oviluvo viaco vi ka yovuiwavo kupika wetimba li nyõleha.” (Va Rom. 8:21) Eci ci lomboloka okuti voluali luokaliye lua Suku eci tu ka li pua, ka tu ka liyaka vali lovovei o ketimba kuenda kovisimĩlo. Lalimue eteke tu ka kuata vali ovisimĩlo vi tu kokela esumuo ndeci, oku livetela evelo, oku kuata asakalalo, ekambo lioku kolapo, evalo ale osõi. Handi vali, alikolisilo etu oku tata ongongo kuenda oku kala lombembua lomanu vakuavo, ka a ka kala vali elivova. Pole, alikolisilo aco a ka kuata onima yiwa, eci tu ka kala vemẽhi liuviali wa una wa tu yovola okuti Yesu Kristu, “Mbiali Yombembua.”—Isa. 9:​6, 7.

13. Ovina vipi vikuavo o pondola oku sokolola osimbu o lipongiyila Onjivaluko yunyamo ulo?

¹³ Sokolola ndomo omuenyo wove u ka kala eci o ka li pua. Oloneke viosi eci o ka pasuka, o ka liyeva ciwa kuenda ku ka sukila vali oku sakalala nda okuti ove ale omunu umue o sole o kasi lonjala, o vela ale o fa. Ndaño muẽle cilo, o pondola oku kuata ombembua poku ‘kakatela kelavoko . . . ndonjundo komuenyo wove, lina lia kolapo hailio lia pama.’ (Va Hev. 6:​18, 19) Ndeci onjundo yimue yi pondola oku kuatisa onaviyu oku kolapo, elavoko liove li pondolavo oku ku kuatisa cilo oku pamisa ekolelo liove kuenda oku liyaka loloseteko. Ove o pondola oku kolela lutima wosi okuti Yehova, o ka “eca onima kuava vo sanda lutima wosi.” (Va Hev. 11:6) Elembeleko o tambula cilo kuenda elavoko liove lio kovaso yoloneke, vi tẽlisiwa lika omo liocisembi.

OCISEMBI CI TU KUATISA OKU KUATA UKAMBA UWA LA YEHOVA

14. Ekandu lia nyõla ndati ukamba tua kuatele Lululiki wetu kuenda momo lie?

¹⁴ Tunde eci Adama la Eva va linga ekandu, omanu va tepiwa ku Suku kuenda ka va ponduile vali oku kuata ukamba uwa laye. Embimbiliya li popia okuti, omanu vosi va kasi ocipãla Lululiki wavo. (Va Rom. 8:​7, 8; Va Kol. 1:21) Momo lie? Momo olonumbi via Yehova via li pua kuenje eye lalimue eteke a ka ecelela ekandu. Catiamẽla ku Yehova, Embimbiliya li popia hati: “Ovaso ove a kola calua oco o vanje kueci cĩvi, kuenda ku pondola oku ecelela evĩho.” (Hav. 1:13) Ekandu lia koka okuti ukamba wa kala pokati ka Yehova kuenda omanu li nyõleha. Lomue pokati ketu o pondola oku kuata ukamba umue uwa la Yehova, nda okuti ka tu kuete mitakati umue o tu kuatisa oku lisunguluisa laye. Omo liaco, ocisembi oco ci tu kuatisa oku lisunguluisa la Suku.

15. Ocisembi ca linga ndati ocilumba combembua?

¹⁵ Embimbiliya li popia okuti, Yesu “eye ocilumba cakandu etu.” (1 Yoa. 2:2) Kelimi lio Helasi ondaka ya pongoluiwa okuti “ocilumba cakandu etu,” yi tiamisiwila “kocilumba coku linga ombembua.” Ocisembi ca linga ndati ocilumba combembua? Ka tu ka simi okuti Yehova wa liyeva ciwa omo liolofa viomõlaye. Pole, ocisembi ca ecelela okuti omanu va kuata vali ukamba uwa la Yehova. (Va Rom. 3:​23-26 ) Yehova toke muẽle wa ponduile oku “tenda” ndukuesunga omanu vana vo fendela lekolelo osimbu Yesu ka file. (Efet. 15:​1, 6) Wa ci linga ndati? Wa ci linga pocakati cocisembi ca laikele oku eciwa. Yehova wa kolelele okuti omõlaye Yesu, wa ponduile oku feta ocisembi. (Isa. 46:10) Omo liaco, ocisembi ca yikula onjila oco omanu ka va li puile va kuate vali ukamba uwa la Suku.

16. Ovina vipi vikuavo o pondola oku sokolola osimbu o lipongiyila Onjivaluko yunyamo ulo? (Talavo ociluvialuvia.)

¹⁶ Sokolola ndomo omuenyo wove u kasi cilo omo lioku kuata ukamba umue uwa la Yehova. Ndeci, ove pamue o tukula Yehova hati “Isiove” ndeci Yesu a tu longisa. (Mat. 6:9) Kuenda citava okuti olonjanja vimue, ove o tukula Yehova okuti “Ekamba” liove. Poku tukula olondaka ndeci “Isia” ale “Ekamba,” tu sukila oku ci linga lesumbilo kuenda umbombe. Momo lie? Momo etu ka tua li puile kuenda omo liekambo lietu lioku li pua, ka tu ci sesamẽla. Tu pondola lika oku kuata ukamba uwa la Yehova omo liocisembi. Pocakati ca Yesu, Yehova wa ecelela okuti tu “inalisa kokuaye ovina viosi vikuavo poku linga ombembua omo liosonde [Yesu] a pesela kuti wekangiso.” (Va Kol. 1:​19, 20) Eli olio esunga lieci okuti ndaño muẽle cilo okuti ka tua li puile, tu pondola oku kuata esanju omo liukamba uwa tu kuete la Yehova.

OCISEMBI CI SITULULA OHENDA YA YEHOVA

17. Ocisembi ci situlula ndati ohenda ya piãla ya Yehova? (Va Efeso 2:​4, 5)

¹⁷ Ocisembi ceca uvangi wokuti Yehova “ukuahenda ya piãla.” Eye “wa tu muisa omuenyo . . . ndaño ceci tua file kakulueya.” (Tanga Va Efeso 2:​4, 5.) Ndeci omunu umue wa sakatela kovingululu viosapalalo yimue ya kupuka a sukila ekuatiso, cimuamue haico okuti, “vana vakuotima wa sungulukila omuenyo ko pui” okuti handi va sakatela kovilinga viekandu, va sukilavo oku yovuiwa. Ovo va kasi oku pinga ekuatiso. (Ovil. 13:48) Pocakati cesapulo Liusoma, Yehova o tambulula apingilo avo ekuatiso oco vo kũlĩhe kuenda oku kũlĩhavo omõlaye, Yesu. (Yoa. 17:3) Satana wa kala oku likemba eye muẽle poku sima okuti ovitangi a kokela Adama la Eva, via ponduile oku tateka Yehova oku tẽlisa ocipango caye.

18. Nye tu sukila oku ivaluka eci tu sokolola kocisembi?

¹⁸ Osimbu tu sokolola kasumũlũho tu kuete omo liocisembi, tu sukila oku ivaluka esunga lia velapo lieci Yehova a lingila eliangiliyo liaco. Eye ka ecele lika ocisembi oco a tu yovole, pole, wa ci lingilavo omo liesunga limue lia velapo. Ocisembi onjila yimue Yehova a talavaya layo oco a tambulule alundi Satana a linga vocumbo Cedene. (Efet. 3:​1-5, 15) Handi vali, omo liocisembi, Yehova wa lekisa okuti ovina Satana a popia viatiamẽla kokuaye viuhembi. Omo okuti ocisembi ci tu yovola kekandu kuenda kolofa, oyo, onjila yimue yi lekisa okuti Yehova, o Suku yimue ukuacisola. Ndaño okuti ka tua li puile, Yehova omo liohenda yaye ya piãla, o tu ecelela oku lekisa okuti ovina Satana a popia viatiamẽla kokuaye viuhembi. (Olosap. 27:11) Oco hẽ, o pondola oku lekisa ndati olopandu viove omo liocisembi? Tu ka tambulula epulilo eli vocipama ci kuãimo.