Tu Lekisa Ndati Olopandu Omo Liocisembi?

1-2. Ocilumba cocisembi ca Yesu ci tu vetiya oku linga nye? (2 Va Korindo 5:​14, 15) (Talavo ociluvialuvia.)

NDA omunu umue wa ku yovola kovingululu viosapalalo yimue ya kupuka, nda kua lekisile hẽ olopandu komunu waco? Ndaño okuti kua kalavo omanu vakuavo va yovuiwa, citava okuti ove muẽle nda wa enda toke komunu waco, loku lekisa olopandu kuenda oku u sapuila okuti lalimue eteke o ka ivalako ovina eye a ku lingila.

² Ndomo tua lilongisa vocipama ca pita, ka tu pondola oku liyovola etu muẽle kekandu tua piñala. Pole, ocilumba cocisembi ca Yesu, ci pondola oku tu yovola momo (1) ci ecela akandu etu (2) ci tu ĩha elavoko lioku kuata omuenyo wa li pua kovaso yoloneke kuenda (3) oku kuata ukamba uwa la Yehova. Omo liocisembi, tu kuete elavoko lioku kala voluali luokaliye lua Suku. Ocili okuti, ocisembi ci situlula ocisola ka ci sokisiwa Yesu a kuetele omanu okuti, ocisola cimue eye a tu kuatelele osimbu keyile palo posi. (Olosap. 8:​30, 31) Upostolo Paulu wa soneha hati: “Ocisola ca Kristu ci tu vetiya.” (Tanga 2 Va Korindo 5:​14, 15.) Eci ci lomboloka okuti, tu sukila oku lekisa olopandu omo liocisola Yesu a tu kuetele kuenda lalimue eteke ka tu ka ivaliko ovina eye a tu lingila.

3. Momo lie omunu lomunu pokati ketu a ponduila oku lekisa olopandu kocisembi lonjila yimue ya litepa?

³ Nye ove o sukila oku linga oco o lekise olopandu viove omo liombanjaile yocisembi? Citava okuti etambululo liove, lia litepa leli liomanu vakuavo. Kũlĩhĩsa ocindekaise ci kuãimo: Sokolola okuti omanu vatatu va kasi oku linga ungende kocitumãlo cimuamue, pole, omunu lomunu wa tunda volupale lumue lua litepa. Handi vali, onjila ovo va ka pita, ya litepavo. Cimuamue haico okuti, onjila o ka kuama oco o lekise olopandu viove omo liocisembi ca Yesu, yi pondolavo oku litepa leyi yomanu vakuavo, omo liukamba o kuete la Yehova. Omo liaco, vocipama cilo, tu ka vangula eci catiamẽla kovimunga vitatu viomanu: (1) vana tu longisa Embimbiliya, (2) Akristão va papatisiwa kuenda (3) vana va tundisiwa vekongelo.

VANA TU LONGISA EMBIMBILIYA

4. Yehova o tenda ndati vana tu longisa Embimbiliya?

⁴ Nda o kasi oku lilongisa Embimbiliya Lombangi yimue ya Yehova, eci ci lekisa okuti Yehova o yongola okuti ove o kala ekamba liaye kuenda eye o kasi oku ku kuatisa oku ci linga. (Yoa. 6:44; Ovil. 13:48) “Yehova eye o kũlĩhĩsa eci ci kasi vutima womunu lomunu.” Eci ci lomboloka okuti, eye o lete alikolisilo wa siata oku linga oco o lilongise ovina viatiamẽla kokuaye. Kuenda eye o sanjuka calua omo liapongoloko o kasi oku linga oco o kale ekamba liaye. (Olosap. 17:3; 27:11) Ove o pondola oku kuata lika ukamba waco omo liocisembi. (Va Rom. 5:​10, 11) Lalimue eteke ku ka ivaleko ovina viaco.

5. Vana tu kasi oku longisa Embimbiliya, va pondola oku kapako ndati elungulo li sangiwa kukanda ku va Filipoi 3:16?

⁵ Nda okuti ove o kasi oku longisiwa Embimbiliya, o lekisa ndati olopandu viove omo liocisembi? Onjila yimue yoku ci linga, oku kapako elungulo upostolo Paulu a eca ku va Filipoi liokuti: “Ndaño okuti wa kuli ale, amamiko oku ci linga lonjila ndeyi.” (Va Fil. 3:16) Embimbiliya limue li pongolola ocinimbu caco hati: “Tu sukila oku amamako oku endela vonjila tu kasi oku kuama.” Omo liaco, kapako elungulo liaco kuenda ku ka ecelele okuti cimue ci ku tateka oku endela vonjila yi tuala komuenyo ko pui.—Mat. 7:14; Luka 9:62.

6. Nye vana va kasi oku lilongisa Embimbiliya va pondola oku linga nda okuti ka ca lelukile kokuavo oku linga apongoloko? (Esinumuĩlo 30:​11-14) (Talavo ociluvialuvia.)

⁶ Anga hẽ ka ca lelukile kokuove oku tava kocili cimue Cembimbiliya wa lilongisa? Nda oco, linga akonomuiso kuenda likutilila ku Yehova oco a ku kuatise oku kuata elomboloko lia suapo liocili caco. (Osa. 86:11) Nda okuti wa ci linga ale, pole, lopo ku kasi oku kuata elomboloko, ku ka liwekepo. Amamako oku lilongisa Embimbiliya kuenje vokuenda kuotembo, o ka kuata elomboloko. Pole, nye ci popiwa nda okuti ocitangi cove oku liwekapo oku linga ocina cimue Yehova ka sole? Ivaluka okuti Yehova lalimue eteke a ka tu pinga oku linga ocina cimue okuti ka ci kasi vepondolo lietu. Ove o pondola oku ambata omuenyo umue u likuata lolonumbi viaye. (Tanga Esinumuĩlo 30:​11-14.) Kuenda Yehova wa likuminya oku ku kuatisa. (Isa. 41:​10, 13; 1 Va Kor. 10:13) Omo liaco, ku ka liwekepo kuenda likolisilako oku pokola ku Yehova. Ku ka tiamisile calua utima kovitangi o kasi oku liyaka lavio, pole, sokolola kovina viosi viwa Yehova a siata oku ku lingila oku kongelamo ocisembi. Osimbu ocisola o kuetele Yehova ci livokiya, o ka limbuka okuti “ovihandeleko viaye ka vi lemi.”—1 Yoa. 5:3.a

7. Nye amalẽhe vana va kasi oku kulila vepata limue Liolombangi Via Yehova va sukila oku kũlĩha?

⁷ Nye ci popiwa kokuove wumalẽhe o kasi oku kulila vepata limue okuti Olombangi Via Yehova? Kũlĩha okuti, ove o pangavo onepa komanu vana va kasi oku lilongisa Embimbiliya. Oku popia ocili, ove wundonge yimue ya velapo yolonjali viove. Embimbiliya li popia hati: “Ameli ku Suku kuenje eye amela kokuene.” (Tia. 4:8; 1 Asa. 28:9) Nda okuti ove eca enanga liatete oco o kale ekamba lia Yehova, eye o ka kalavo ekamba liove. Yehova ka ku kapeleko lika omo okuti o kasi oku kulila vepata limue Liolombangi Via Yehova. Pole, eye wa ku kapako calua momo o yongola okuti, ove o kala ekamba liaye. Nye Yehova a linga oco ove o kuate ukamba umue uwa laye? Eye wa eca omõlaye. Lalimue eteke ku ka ivaleko okuti eyi ombanjaile yimue yilikasi Yehova a eca kokuove. (Va Rom. 5:​1, 2) Omo liaco, osimbu kua endele Konjivaluko yunyamo ulo, sokiya otembo yimue oco o sokolole lutate kovina Yehova la Yesu va ku lingila. Noke, ecelela okuti ovina viaco vi vetiya utima wove kuenda ovimãho o pondola oku litumbikila oco o lekise ku Yehova olopandu viove.b

AKRISTÃO VANA VA PAPATISIWA

8. Akristão vana va papatisiwa, va lekisa ndati okuti va kolela kombanjaile yocisembi?

⁸ Nda ove Wukristão umue wa papatisiwa, ci lekisa okuti o kuete ale ekolelo kombanjaile yocisembi volonjila via litepa. Ndeci, wa linga apongoloko komuenyo wove oco o sanjuise Yehova kuenda oku kala ekamba liaye. Ove wa pokola kocihandeleko ca Yesu catiamẽla koku kunda loku linga olondonge. Wa tumbikavo omuenyo wove ku Yehova kuenda oku papatisiwa. Handi vali, citava okuti wa liyaka lelambalalo omo lioku vumba Yehova. (2 Tim. 3:12) Pole, ove wa pandikisa kuenda wamamako oku vumba Yehova lekolelo. Eci ci lekisa okuti ove o sole Yehova kuenda wa sanjukila ombanjaile yocisembi.—Va Hev. 12:​2, 3.

9. Utate upi Akristão vana va papatisiwa va sukila oku kuata?

⁹ Akristão vana va papatisiwa, va sukila oku kuata utate momo kuli ohele yimue. Vokuenda kuotembo, tu pondola oku liwekapo oku sanjukila ombanjaile yocisembi. Eci ci pondola oku lipita ndati? Sokolola kulandu Wakristão vo kocita catete ko Efeso. Eci Yesu a pinduiwa, wa pandiya Akristão vaco omo liepandi liavo. Pole, eye wa va sapuila hati: “Ñuete love ondaka yoku ku pisa yokuti, ocisola wa kuatele tete wa ci yanduluka.” (Esit. 2:​3, 4) Olondaka via Yesu vi lekisa okuti Ukristão umue o pondola oku pumba esanju poku vumba Yehova. Omunu waco o pondola oku kuata ocituwa coku likutilila, oku endaenda kolohongele kuenda kupange woku kunda. Pole, o ci lingila lika omo okuti o kuete ale ocituwa coku linga ovina viaco. Eye ka ci lingi vali omo liocisola. Pole, nye ove o sukila oku linga nda wa limbuka okuti ocisola wa kuatelele Yehova ca tepuluka?

10. O pondola oku ‘Sokolola’ ndati loku “litumbika” kovopange Akristão? (1 Timoteo 4:​13, 15)

¹⁰ Upostolo Paulu wa sapuila Timoteo oco a ‘Sokolole’ kuenda oku “litumbika” kovopange Akristão. (Tanga 1 Timoteo 4:​13, 15.) Ndomo elungulo liaco lia lekisa, sokolola kovina o pondola oku linga oco wamameko oku vumba Yehova lesanju kuenda ‘ecelelavo okuti, espiritu sandu li ku vetiya oku kuata ombili.’ (Va Rom. 12:11) Ndeci, o pondola oku sanda otembo yoku pongiya olohongele kuenda oku tiamisila utima kokuavio. Ale, citava okuti poku linga elilongiso liove lio pokolika, o pondola oku sanda ocitumãlo cimue cõha kuna o pondola oku kala lika liove, oco o sokolole lutate kuenje o ka kuatisiwa lelilongiso liaco. Ndeci oku kapa olohũi vondalu ci kuatisa ondalu oku amamako oku taima, ove o sukilavo oku linga ovina viaco, oco amameko oku lekisa olopandu kovina viosi Yehova a ku lingila, oku kongelamo ombanjaile yocisembi. Handi vali, osimbu osemana Yonjivaluko ka ya pitĩlile, ove o pondola oku sokolola kovina viosi viwa Yehova a kasi oku lingila afendeli vaye koloneke vilo. Poku ci linga, o ka vetiyiwa oku lekisa olopandu kombanjaile yocisembi, okuti oco ci ku kuatisa oku kuata ukamba uwa la Yehova.

11-12. Anga hẽ nda ombili yove kupange wa Yehova ya tepuluka, ci lekisa okuti ku kuete vali espiritu sandu liaye? Ci lombolola. (Talavo ociluvialuvia.)

¹¹ Nda okuti pa pita ale otembo yimue tunde eci wa limbuka okuti ombili wa kuatelele efendelo liocili lia tepuluka, ku ka sumue kuenda ku ka sime okuti ku kuete vali espiritu sandu lia Yehova. Ivaluka olondaka upostolo Paulu a sonehela Akristão vo ko Korindo viatiamẽla kupange waye woku kunda. Eye hati: “Ndaño si ci lingi locipango cange haimo lumue, nda kundikiwa ocikele caco.” (1 Va Kor. 9:17) Olondaka evi vi lomboloka nye?

¹² Ombili Paulu a enda oku lekisa kupange woku kunda, olonjanja vimue ya endavo oku tepuluka. Pole, eye wa nõlelepo oku pandikisa kupange woku kunda ndaño okuti olonjanja vimue ka kuatele ombili. Ove o pondolavo oku lekisa ocituwa cimuamue. Nõlapo oku linga ovina via sunguluka ndaño ku kuete ombili yoku ci linga. Omo liaco, likutilila ku Yehova oco o kuate “onjongole longusu yoku linga ovina viosi eye a sole.” (Va Fil. 2:13) Amamako oku linga ovina vi ku kuatisa oku kuata ukamba uwa la Yehova. Kolela okuti vokuenda kuotembo, ocisola o kuetele Yehova ci ka pamisiwa.

13. Tu pondola oku li kũlĩhĩsa ndati etu muẽle nda “tu kasi vekolelo?”

¹³ Olonjanja vimue, ci kuete esilivilo oku li kũlĩhĩsa ndomo tu kasi oku ambata omuenyo wetu, ndeci upostolo Paulu a ci popia kukanda 2 Va Korindo 13:5 hati: “Amamiko oku li seteka nda vu kasi vekolelo; amamiko oku seteka eci ene muẽle wa tuwi.” Ndeci, omunu lomunu pokati ketu o sukila oku lipula ndoco: ‘Ñasi hẽ oku pitisa kovaso Usoma wa Suku komuenyo wange?’ (Mat. 6:33) ‘Olomapalo viange vi lekisa hẽ okuti nda suvuka eci cĩvi?’ (Osa. 97:10) ‘Ovina ndi popia levi ndi linga vi kasi hẽ oku kuatisa ekongelo oku amamako oku likuata omunga?’ (Va Efe. 4:​2, 3) Onjivaluko, epuluvi limue liwa lioku sokolola catiamẽla kombanjaile yocisembi Yehova a tu ĩha. Eci tu sokolola kovina Yehova la Yesu va tu lingila, tu ka vetiyiwa oku eca olopandu ku Yehova loku lekisa okuti ka tu kasi oku li sanjuisa etu muẽle, pole, tu kasi oku sanjuisa Kristu.c

VANA VA TUNDISIWA VEKONGELO

14. Ovina vipi vi koka okuti vamanji vamue va liwekapo oku endaenda kolohongele?

¹⁴ Vamue pokati ka vamanjetu, va liwekapo oku endaenda kolohongele. Olonjanja vimue, vamue va ci linga noke lioku vumba Yehova lekolelo vokuenda kuanyamo alua. Momo lie? Vamue va ci linga omo ‘liasakalalo omuenyo.’ (Luka 21:34) Vakuavo va liwekapo omo liocina cimue manji umue a popia ale a linga. (Tia. 3:2) Handi vali, vakuavo va linga ekandu limue linene kuenje omo liosõi ale ocina cimue cikuavo, va yuvula oku pinga ekuatiso. Nye ove o pondola oku linga nda cimue pokati kovina via tukuiwa via lipita love? Nye ombanjaile yocisembi yi ku vetiya oku linga?

15. Yehova o lekisa ndati okuti wa kapako omanu vana va liwekapo oku u vumba? (Esekiele 34:​11, 12, 16)

¹⁵ Sokolola ndomo Yehova a liyeva catiamẽla komanu vana va liwekapo oku u vumba. Eye ka temẽla omanu vaco ale oku va ivala. Pole, eye o sandiliya omanu vaco. Yehova o va tata kuenda o va kuatisa oku tiuka kokuaye. (Tanga Esekiele 34:​11, 12, 16.) Anga hẽ Yehova o kasi oku linga cimuamue love? Ocili okuti oco! Omo okuti o kasi oku tanga ocipama cilo, ci lekisa okuti ove handi o yongola oku u sanjuisa. Yehova wa mola ovina viwa kokuove eci a ku kuatisa oku u kũlĩha loku panga onepa kafendeli vaye. Eye handi o lete ovina viwa kokuove kuenda o yongola okuti ove o tiuka kokuaye.

16. Nye ci pondola oku kuatisa vana va liwekapo oku vumba Yehova oku tiuka kokuaye? (Talavo ociluvialuvia.)

¹⁶ Vombrochura losapi hati,Tiuka ku Yehova, tu sangamo olondaka vi pamisa viokuti: “Kolela okuti eci o tiuka ku Yehova eye o ku tambula. Eye o ku kuatisa oku liyaka lasakalalo, oku yula evalo kutima kuenda oku sanga ombembua yi tunda koku kuata utima wa yela. O vetiyiwavo oku vumba Yehova kumue lafendeli vakuavo.” Handi vali, ivaluka okuti akulu vekongelo va yongola calua oku ku kuatisa. Ovo va pondola oku kala kokuove “ndocitumãlo coku tila ofela, ndocitumãlo cimue coku vunda ombela yenda lofela yalua.” (Isa. 32:2) Omo liaco, oco o lekise olopandu kombanjaile yocisembi, lipula ndoco: ‘Nye ndi sukila oku linga cilo oco ndi tiuke ku Yehova?’ (Isa. 1:18; 1 Pet. 2:25) Ndeci, ove hẽ o pondola oku enda kohongele yimue Vonjango Yusoma? O pondola hẽ oku vangula lukulu umue wekongelo loku u sapuila okuti ove o yongola oku tiuka ku Yehova? Citava okuti ovo va sapela lomunu umue oco a ku longise Embimbiliya vokuenda kuotembo yimue. Kolela okuti nda wa likutilila ku Yehova catiamẽla koku tiuka kokuaye, loku likolisilako oku eca olopandu kombanjaile yocisembi ca Yesu, eye o ka ku sumũlũisa.

NYE OVE O KA LINGA?

17-18. Tu pondola oku talavaya ndati ciwa lotembo yetu osimbu ku kamba oloneke vimue oco Onjivaluko yunyamo ulo yi lingiwe?

¹⁷ Yesu wa popia okuti Yehova wo tuma oco a ece omuenyo waye “okuti, wosi o kolela kokuaye ka nyõliwa, pole, o kuata omuenyo ko pui.” (Yoa. 3:16) Omo liocisembi, Yehova o pondola oku tu yovola kekandu kuenda kolofa. Omo liaco, tu amamiko oku lekisa olopandu vietu kombanjaile yocisembi. (Va Rom. 3:​23, 24; 2 Va Kor. 6:1) Osimbu ku kamba oloneke vimue oco onjivaluko yunyamo ulo yi lingiwe, tu kuata epuluvi lioku sokolola kocisola Yehova kuenda Yesu va lekisa kuenje ocisola caco, ci ka tu vetiya oku linga cimue oco tu ece olopandu kokuavo omo liovina va tu lingila.

¹⁸ Ove o ka lekisa ndati olopandu omo liombanjaile yocisembi? Etambululo liove kepulilo eli, li pondola oku litepa leli liomanu vakuavo. Pole, kolela okuti Yehova o ka sumũlũisa alikolisilo ove kuenda violohuluwa viafendeli vaye vakuavo, vana okuti ‘ka va li sanjuisa ovo muẽle, pole, va sanjuisa una wa va fila.’—2 Va Kor. 5:15.