Yehova o Pondola Oku ku Kuatisa Oku Yula Esumuo

1-2. Upostolo Paulu olonjanja vimue wa enda oku liyeva ndati kuenda ekalo liaye lia lisoka ndati leli lietu? (Va Roma 7:​21-24)

NYE o sokolola eci o yeva catiamẽla kupostolo Paulu? Anga hẽ o sokolola ulume umue omisionaliu ukuotõi, ulongisi umue wa loñolõha ale usonehi umue Wembimbiliya wa soneha alivulu alua? Ocili okuti eye wa kala ulume umue ukuotõi haeye ukuekolelo. Pole, eye olonjanja vimue, wa endavo oku yeva esumuo kuenda esakalalo. Eci ci lekisa okuti ekalo liaye lia lisoka leli lietu.

² Tanga Va Roma 7:​21-24. Paulu kukanda a sonehela Va Roma, wa situlula ovisimĩlo viaye okuti, valua pokati ketu tua siatavo oku kuata ovisimĩlo viaco. Eye wa kala Ukristão umue ukuekolelo kuenda wa yonguile oku pokola ku Suku, pole, omo okuti ka lipuile, ka ca lelukile kokuaye oku linga ocipango ca Suku. Handi vali, eci Paulu a enda oku sokolola kovina a lingaile osimbu ka lingile Ukristão kuenda kocitangi cimue a kala oku liyaka laco komuenyo waye, wa enda oku livetela evelo kuenda oku yeva esumuo.

3. Nye tu konomuisa vocipama cilo? (Talavo “Olondaka Via Lomboluiwa.”)

³ Ndaño okuti Paulu olonjanja vimue wa enda oku yeva esumuo, pole, eye wa enda oku likolisilako oco ka ka sokolole calua kovina via enda oku u kokela esumuo liaco.a Vocipama cilo, tu konomuisa apulilo a kuãimo ndeci: Nye ca vetiya Paulu oku popia hati, “ngongo yange we?” Nye ca kuatisa Paulu oku yuvula oku sokolola calua kovina via enda oku u kokela esumuo? Nye tu sukila oku linga eci tu yeva esumuo?

ESUNGA LIECI UPOSTOLO PAULU OLONJANJA VIMUE A ENDAILE OKU YEVA ESUMUO

4. Momo lie Paulu olonjanja vimue a enda oku yevela esumuo?

⁴ Ovina ka via sungulukile a linga osimbu ka lingile Ukristão. Paulu osimbu ka lingile Ukristão okuti kotembo yaco wa kũlĩhĩwile londuko ya Saulu, wa lingaile ovina vialua ka via sungulukile. Ndeci, eci ndonge ukuekolelo Stefano a sosũiwa lovawe, Saulu opo a kala kuenda wa simĩle okuti elinga liaco lia sungulukile. (Ovil. 7:58; 8:1) Handi vali, Saulu wa lambalala Akristão valua kuenda wa va tata lungangala.—Ovil. 8:3; 26:​9-11.

5. Paulu wa enda oku liyeva ndati omo liovina a linga osimbu ka lingile Ukristão?

⁵ Upostolo Paulu noke yoku linga Ukristão, olonjanja vimue wa enda oku livetela evelo loku yeva esumuo omo liovina a lingaile kosimbu. Ovina ka via sungulukile a lingaile eci a enda oku lambalala Akristão, citava okuti vokuenda kuotembo via enda oku u sakalaisa calua. Ndeci, kunyamo 55 K.K. eci a sonehela ukanda watete ku va Korindo, eye wa popia hati: “Si sesamẽla oku tukuiwa upostolo, momo nda lambalalele ekongelo lia Suku.” (1 Va Kor. 15:9) Noke yoku pita anyamo atãlo, eci a sonehela ukanda umue va Efeso, eye wa va sapuila okuti ‘o sule pokati kolosandu viosi.’ (Va Efe. 3:8) Handi vali, eci a sonehela Timoteo, Paulu wa popia okuti kosimbu eye muẽle wa kala “ukuakupopia Suku atonãi, ukuakulambalala kuenda ukuakutondala.” (1 Tim. 1:13) Sokolola ndomo Paulu a enda oku liyeva, eci a nyula akongelo muna a enda oku sanga vamanji a lambalalele ale vakuepata liavo!

6. Ocina cipi cikuavo ca kokela Paulu esakalalo lialua? (Talavo etosi.)

⁶ Osongo ketimba. Paulu wa sokisa ocitangi cimue ca enda oku u sakalaisa calua, ‘ndosongo ketimba.’ (2 Va Kor. 12:7) Eye ka tukuile esunga lieci a kalela oku yeva evalo lialua. Pole, citava okuti wa kuatele uvei umue ale ocitangi cikuavo ca kala oku u kokela esakalalo.b

7. Momo lie ka ca lelukilile ku Paulu oku linga eci ca sunguluka? (Va Roma 7:​18, 19)

⁷ Ekambo liaye lioku li pua. Paulu wa liyakavo lekambo liaye lioku li pua. (Tanga Va Roma 7:​18, 19.) Ndaño okuti eye wa yonguile oku linga eci ca sunguluka, ekambo liaye lioku li pua lia enda oku u tateka oku ci linga. Eye wa popia okuti kua kala uyaki umue pokati kolonjongole vietimba kuenda onjongole yaye yoku linga eci ca sunguluka. Pole, Paulu wa likolisilako calua oco a linge apongoloko. (1 Va Kor. 9:27) Tu pondola oku sokolola esumuo eye a enda oku yeva poku popia ale oku linga ocina cimue okuti wa kala ale oku likolisilako oku ci yuvula!

NYE CA KUATISA PAULU OKU LIYAKA LESUMUO?

8. Ovikanda Paulu a soneha vi situlula nye catiamẽla konjila ndomo eye a liyaka lekambo liaye lioku li pua?

⁸ Upostolo Paulu wa sokolola lutate ndomo espiritu lia Suku li pondola oku kuatisa Akristão oku liwekapo oku sokolola kolonjongole ka via sungulukile kuenda oku linga apongoloko kovituwa viavo. Tu pondola oku kuata elomboloko liaco omo liovikanda eye a soneha. (Va Rom. 8:13; Va Gal. 5:​16, 17) Paulu wa tukula olonjongole kuenda ovituwa Akristão va sukila oku yuvula oco va sanjuise Yehova. (Va Gal. 5:​19-21, 26) Eci ci lekisa okuti Paulu wa sokolola lutate kahonguo aye, wa sanda alungulo Kovisonehua kuenda wa limbuka kolonepa a sukilile oku linga apongoloko oco a liyake lekambo liaye lioku li pua. Omo liaco, tu pondola oku kolela okuti Paulu wa kapeleko alungulo a ecele komanu vakuavo.

9-10. Nye ca kuatisa Paulu oku amamako oku vumba Yehova lesanju? (Va Efeso 1:7) (Talavo ociluvialuvia.)

⁹ Ndanõ okuti Paulu olonjanja vimue wa enda oku yeva esumuo, pole, eye wa endavo oku yeva esanju. Ndeci, eye wa enda oku kuata esanju poku yevelela ovolandu awa atiamẽla kakongelo ocipãla. (2 Va Kor. 7:​6, 7) Ukamba uwa a kuatele la vamanji, wa endavo oku u nenela esanju. (2 Tim. 1:4) Handi vali, Paulu wa kuatele esanju omo lioku kuata ukamba uwa la Yehova kuenda wa kũlĩhĩlevo okuti wa taviwile laye. (2 Tim. 1:3) Ndaño ceci a kapiwile vokayike ko Roma, Paulu wa vetiya vamanji oku ‘sanjukila vu Ñala.’ (Va Fil. 4:4) Eci tu tanga olondaka Paulu a soneha, tu pondola oku limbuka okuti eye ka tiamisilile utima kovitangi kuenda kakulueya aye. Pole, olonjanja viosi eci eye a enda oku sokolola kovina vi u kokela esumuo, wa enda oku likolisilako oku sokolola kovina viwa vi u nenela esanju.

¹⁰ Ocina cikuavo ca kuatisa Paulu oku amamako lesanju, ombanjaile yocisembi. Eye wa kũlĩhĩle okuti Yehova wo solele kuenda wa eca kokuaye ombanjaile yocisembi. (Va Gal. 2:20; Tanga Va Efeso 1:7.) Omo liaco, eye wa kolelele okuti omo liocilumba ca Yesu, Yehova wa ecela akandu aye kuenda wa laikele oku amamako oku ci linga. (Va Rom. 7:​24, 25) Ovina viaco, via kuatisa Paulu oku amamako oku ‘lingila Suku upange u kola’ lesanju, ndaño lakulueya aye kuenda ekambo lioku li pua.—Va Hev. 9:​12-14.

11. Momo lie ongangu ya Paulu yi ponduila oku tu pamisa?

¹¹ Ndeci ca lipita la Paulu, pamue tu liyeva okuti tu sukila oku likolisilako calua oco tu yuvule oku sokolola, oku popia ale oku linga ocina cimue ci sumuisa Yehova. Kuenje tu pondola oku yeva esumuo loku popiavo hati: “Ngongo yange we!” Manji umue ukãi o tukuiwa Elizac okuti o kuete eci ci pitahãla 20 kanyamo, wa lombolola onjila ndomo a liyevite poku popia hati: “Oku sokolola kulandu wupostolo Paulu, ci ndi pamisa calua. Ndi yeva ekavuluko poku kũlĩha okuti ndeci ame, eye wa sukililevo oku linga apongoloko. Ulandu wa Paulu u njivaluisa okuti Yehova wa kũlĩha ovitangi afendeli vaye va siata oku liyaka lavio.” Oco hẽ, nye tu sukila oku linga oco tu sanjuisevo Yehova loku kuata esanju ndaño okuti olonjanja vimue tu yeva esumuo, ndeci upostolo Paulu?

CECI TU SUKILA OKU LINGA ECI TU YEVA ESUMUO

12. Momo lie ci kuetelele esilivilo oku pamisa ukamba wetu la Yehova?

¹² Kuata ocituwa coku pamisa ukamba wove la Yehova. Oku kuata ocituwa coku pamisa ukamba wetu la Yehova, ci ka tu kuatisa oku tiamisila utima kovina viwa. Ocituwa caco, ci sokisiwa lovituwa vi tu kuatisa oku kuata uhayele uwa. Ocili okuti tu liyeva ciwa eci tu lia ovina vi nena uhayele, eci tu pindisa etimba kuenda oku pekela ciwa. Cimuamue haico okuti vosi yetu, tua siata oku liyeva ciwa eci tu tanga Ondaka ya Suku olonjanja viosi, oku pongiya loku endaenda kolohongele, oku eca atambululo kuenda oku endaenda kupange woku kunda. Ovina viaco, vi tu nenela esanju kuenda vi tu kuatisa oku yuvula esumuo.—Va Rom. 12:​11, 12.

13-14. Tukula ovolandu amue a lekisa esilivilo lioku pamisa ukamba wetu la Yehova.

¹³ Kũlĩhĩsa ulandu wa manji umue o tukuiwa John okuti, eci a kuata 39 kanyamo wa limbukiwa okuti o kuete uvei umue wo kanser okuti ka wa siatele. Kefetikilo eye wa yeva usumba walua kuenda esumuo. Eye wa enda oku sokolola ndoco: ‘Ka ca sungulukile! Momo lie ndi kuetele uvei owu nda handi ndumalẽhe?’ Kotembo yaco, omõlaye ulume wa kuatele lika anyamo atatu. Nye ca kuatisa manji John oku liyaka lesumuo? Eye wa lombolola ndoco: “Ndaño okuti nda enda oku yeva ekavo lialua, nda likolisilako oco okuti epata liange li kuata esokiyo liwa lioku pamisa ukamba wavo la Yehova. Olosemana viosi tua endaenda kolohongele, kupange woku kunda kuenda oku linga efendelo liepata, ndaño ceci tua kuatele ale ovina vialua vioku linga.” Poku sokolola kovina via pita, manji John wamisako hati: “Eci tu liyaka locitangi cimue, ocisola kuenda unene wa Yehova vi tu kuatisa oku yuvula esumuo. Yehova wa nyĩha ongusu kuenda o ka lingavo cimuamue love.”

¹⁴ Manji Eliza wa tukuiwa ale wa popia hati: “Olonjanja viosi eci ngenda kolohongele viekongelo ale ceci ndi linga elilongiso liange lio pokolika, ndi ivaluka okuti Yehova o ndi yevelela kuenda o ndi sole. Eci ci ndi kuatisa oku kuata esanju.” Manji umue ukuakunyula akongelo vo Afrika o tukuiwa Nolan, wa lombolola ovina via siata oku u kuatisa leci ca siatavo oku kuatisa ukãi waye Diane. Eye wa popia hati: “Tua siata oku likutilila, oku tanga Embimbiliya, oku endaenda kolohongele kuenda kupange woku kunda ndaño ceci tu yeva esumuo. Poku ci linga, Yehova wa siata oku tu kuatisa oku yeva esanju.”

15. Ovina vipi vikuavo tu pondola oku linga eci tu yeva esumuo? Tukula ocindekaise cimue.

¹⁵ Kuli ovina vikuavo tu pondola oku linga nda okuti tu kasi oku amamako lesumuo. Ndeci, sokolola okuti o kasi oku yeva evalo limue vonyima. Oco evalo liaco li pite, ku sukila lika oku pindisa etimba eteke leteke. Pole, pamue o sukila oku linga akonomuiso atiamẽla kevalo liaco ale oku sandiliya ondotolo yimue. Cimuamue haico okuti, oco tu yuvule ovisimĩlo vi koka esumuo, tu sukila oku linga akonomuiso Vembimbiliya kuenda valivulu etu ale oku sapela la manji umue o pondola oku tu ĩha alungulo awa atiamẽla kocitangi cetu. Tu konomuisi olonumbi vikuavo vi pondola oku tu kuatisa.

16. Nye ci pondola oku tu kuatisa oku limbuka ono yesumuo lietu? (Osamo 139:​1-4, 23, 24)

¹⁶ Likutilila ku Yehova oco a ku kuatise oku kuata elomboloko liocitangi cove. Soma Daviti wa kolelele okuti Yehova wo kũlĩha ciwa. Omo liaco, wa pinga ku Yehova oco o kuatise oku limbuka ono ‘yovisimĩlo viaye viesakalalo.’ (Tanga Osamo 139:​1-4, 23, 24.) Cimuamue haico okuti, tu pondolavo oku pinga ku Yehova oco a tu kuatise oku limbuka ovina via siata oku tu kokela esumuo kuenda ndomo tu liyaka lavio. O pondola oku lipula ndoco: ‘Nye ci kasi oku ndi kokela esakalalo? Kuli hẽ ocina cimue ca siata oku ndi kokela esumuo? Eci ndi fetika oku sokolola kovina vi sumuisa, nda siata hẽ oku likolisilako oku sokolola kovina vi ndi nenela esanju?’

17. Ovina vipi tu pondola oku konomuisa velilongiso lietu lio pokolika oco tu sokolole kovina vi pamisa? (Talavo ociluvialuvia.)

¹⁷ Kelilongiso lio pokolika, lilongisa ovina vi pondola oku ku kuatisa kocitangi o kasi oku liyaka laco. Olonjanja vimue, ci kuete esilivilo oku lilongisa vimue pokati kovituwa via Yehova. Ndeci, upostolo Paulu wa kuatisiwa calua poku sokolola eci catiamẽla kocisembi kuenda kongecelo ya Yehova. Omo liaco, tu pondolavo oku setukula ongangu yaye. Tu pondola oku talavaya Lelivulu Lioku Konomuisa Liolombangi Via Yehova, o Indice das Publicações da Torre de Vigia ale ovimalẽho vikuavo via sandekiwa kelimi lietu oco tu lilongise ovina vikuavo viatiamẽla kohenda, kongecelo kuenda kocisola ka ci pongoloka ca Suku. Eci o sanga ovipama vi pondola oku ku kuatisa, soneha ulala umue wovipama viaco. Noke vi kapa kocitumãlo cimue ocipepi kuenje eci o yeva esumuo, tanga ovipama wa soneha vulala waco. Seteka oku kapako ovina wa tanga kocitangi o kasi oku liyaka laco.—Va Fil. 4:8.

18. Ocimãho cipi celilongiso Akristão vamue va tumbika?

¹⁸ Manji Eliza wa tukuiwa ale, wa tumbika ocimãho coku lilongisa ovina viatiamẽla komuenyo wa Yovi. Eye wa popia hati: “Ovitangi viange via lisoka levi via Yovi. Eye wa liyaka lovitangi vialua kuenda ka kũlĩhĩle esunga lieci a kalela oku tala ohali. Pole, ndaño lohali yalua, Yovi ka liwekelepo oku kolela kekuatiso lia Yehova.” (Yovi 42:​1-6) Manji Diane wa tukuiwa ale wa popia hati: “Ame kumue lulume wange, tua tumbika ocimãho coku lilongisa elivulu losapi hati: Kuata Ukamba Wocili la Yehova. Tu pandula calua Yehova omo a pongolola ovisimĩlo vietu ndeci ukuakutalavaya lotuma a linga lotuma. Tu yuvula oku tiamisila utima kakulueya etu, pole, tu seteka oku sokolola ndomo Yehova a pongolola ovisimĩlo vietu loku tu kuatisa oku kuata ovituwa viwa. Eci ca tu kuatisa oku kuata ukamba uwa laye.”—Isa. 64:8.

KOLELA OKUTI YEHOVA O KA KU KUATISA LOKU KU SUMŨLŨISA

19. Olonjanja vimue tu ka liyeva ndati, pole, ekolelo lipi tu kuete?

¹⁹ Oku kuata ocituwa ciwa coku pamisa ukamba wetu la Yehova kuenda esokiyo liwa lielilongiso li likuata locitangi tu kasi oku liyaka laco, ka ci ka imula ovisimĩlo kuenda esumuo tu yevite. Ocili okuti olonjanja vimue handi tu ka yeva esumuo! Pole, lekuatiso lia Yehova tu pondola oku yuvula esumuo. Omo liaco, tua kolela okuti olonjanja vialua komuenyo wetu tu ka kuata esanju momo, tu kuete utima umue wa yela kuenda ukamba uwa la Yehova.

20. Nye tua nõlapo oku linga?

²⁰ Tu sukila oku likolisilako oco ka tu ka eceleli okuti ovitangi vietu, ovina vĩvi via lipita letu kosimbu ale akulueya etu, a tu tateka oku kuata esanju komuenyo. Lekuatiso lia Yehova, tu pondola oku yula esumuo. (Osa. 143:10) Ocili okuti tu lavoka lesanju omuenyo voluali luokaliye, eci ovina viosi tu ka sokolola vi ka tu nenela esanju. Kuenda lacimue ci ka tu kokela vali esakalalo kuenje oloneke viosi tu ka pasuka lesanju momo tu ka amamako oku vumba Suku yetu ukuacisola, Yehova!