Yesu Ocitunda Cetu Cinene, Ukuahenda

1-2. (a) Momo lie Yehova a tumila Omõlaye palo posi? (b) Nye tu konomuisa vocipama cilo? (Va Heveru 5:​7-9)

PA PITA ale 2.000 kanyamo, tunde eci Yehova a tumile Omõlaye Yesu palo posi. Momo lie a ci lingila? Esunga limue, oku yovola omanu kekandu kuenda kolofa, loku malako ũvi wa kokiwa la Satana. (Yoa. 3:16; 1 Yoa. 3:8) Yehova wa kũlĩhĩlevo okuti omuenyo wa Yesu palo posi, wa laikele oku u pongiya oco a kale Ocitunda cimue Cinene ca Velapo okuti, wa tu kapako kuenda ukuahenda. Yesu wa fetika oku tẽlisa ocikele caco noke yepapatiso liaye, kunyamo 29 K.K.a

² Vocipama cilo, tu konomuisa ndomo omuenyo wa Yesu palo posi wo kuatisa oku lipongiya oco a kale Ocitunda cimue Cinene ukuahenda. Ci kuete esilivilo oku kuata elomboloko lionjila ndomo Yesu a “kanguiwa” oco a tẽlise ocikele caco. Momo, ci ka leluka kokuetu oku kuata ukamba uwa la Yehova, ndaño ceci tu sumua omo liakulueya etu.—Tanga Va Heveru 5:​7-9.

OMÕLA O SOLIWE WA SUKU WEYA PALO POSI

3-4. Apongoloko api ka a lelukile Yesu a sukilile oku liyaka la-o eci eya palo posi?

³ Valua pokati ketu, tua li pita ale lapongoloko komuenyo, ndeci oku tunda kocitumãlo cimue tua solele calua, loku siapo epata kuenda akamba. Ocili okuti, apongoloko aco ka a lelukile. Pole, lalimue eteke omunu umue a lingile epongoloko limue komuenyo waye ndeci Yesu. Eye wa kala ungelo watete haeye wa velelepo kilu. Yesu wa soliwile calua la Yehova kuenda olonjanja viosi wa sanjukilile oku talavaya Laye. (Osa. 16:11; Olosap. 8:30) Pole, kukanda ku va Filipoi 2:7 ku popia okuti, Yesu wa nõlelepo oku ‘siapo cosi a kuatele’ kilu oco eye palo posi loku kala lomanu ka va lipuile.

⁴ Sokololavo ekalo liomuenyo wa Yesu vokuenda kuanyamo aye atete palo posi. Eye wa citiwila vepata limue lia kala olohukũi. Tua kũlĩha ovina viaco, omo liocilumba olonjali viaye via ecele noke lioku citiwa kuaye. (Ovis. 12:8; Luka 2:24) Handi vali, eci Soma Herode ondingaĩvi a yeva okuti Yesu wa citiwa, wa seteka oku u ponda. Pole, oco Yesu a puluke peka lia Herode, epata liaye lia sukilile oku kala ndovingendeleyi kofeka Yegito vokuenda kuotembo yimue. (Mat. 2:​13, 15) Ocili okuti, ekalo liomuenyo wa Yesu palo posi, lia litepele calua leli a kuatele kilu!

5. (a) Nye Yesu a mola eci a kala palo posi? (b) Ovina viaco vio pongiya ndati oco a kale Ocitunda cimue Cinene ukuahenda? (Talavo ociluvialuvia.)

⁵ Yesu osimbu a kala oku kula, wa mola omanu valua oku tala ohali. Eye wa fisavo omanu eye a solele calua. Citava okuti umue pokati komanu vaco Yosefe, isiaye wokatumba. Vokuenda kupange waye woku kunda, wa lisanga lomanu vakuavilundu, olomeke, vana va fa ovolu kuenda olonjali via kala oku tala ohali omo lioku fisa omãla vavo. Kuenje Yesu wa lekisa ohenda komanu vaco. (Mat. 9:​2, 6; 15:30; 20:34; Mar. 1:​40, 41; Luka 7:13) Ocili okuti, Yesu eci a kala kilu, wa muile ale ohali yomanu. Pole, eci eya palo posi, wa kuata elomboloko lia suapo konjila ndomo omanu va siata oku liyeva eci va tala ohali. (Isa. 53:4) Ovina Yesu a mola eci a kala palo posi, vio kuatisa oku kuata elomboloko liovitangi via litepa omanu va siata oku liyaka lavio komuenyo. Handi vali, ndeci ca siata oku lipita lomanu vakuavo, eye wa yevavo ekavo, esakalalo kuenda esumuo.

YESU WA LEKISA OHENDA KOMANU

6. Nye tu lilongisila kocitumasuku uprofeto Isaya a tukula catiamẽla kohenda Yesu a laikele oku lekisa? (Isaya 42:3)

⁶ Yesu vokuenda kupange waye woku kunda, wa lekisa ohenda yalua komanu vana va kala oku tatiwa lãvi. Poku ci linga, eye wa tẽlisa ocitumasuku cimue Yehova a ecele pocakati cuprofeto Isaya. Kovisonehua vio Heveru, vana va kuete ekolelo lia pama, olonjanja vimue va sokisiwa locumbo cimue colonelẽho ca tapeliwa ciwa haico ci kuete oviti vinene via pama. (Osa. 92:12; Isa. 61:3; Yer. 31:12) Pole, vana ka va kuete eteyuilo kuenda va tatiwa lekambo liesunga, va sokisiwa lolundeya lua penga kuenda omutusila u tuima okuti, ovina ka vi kuete esilivilo lialua. (Tanga Isaya 42:3; Mat 12:20) Yehova wa vetiya uprofeto Isaya oku linga esokiso liaco, oco a longise ocisola kuenda ohenda Yesu a laikele oku lekisa komanu vana okuti, ka va kapiwileko kuenda kovaso omanu, ka va kuatele esilivilo.

7-8. Yesu wa tẽlisa ndati ocitumasuku cuprofeto Isaya?

⁷ Evangeliu lia Mateo li lekisa okuti, Yesu wa tẽlisa ocitumasuku cuprofeto Isaya. Olio li popia hati: “Eye ka ka teya olundeya lua penga, ale oku ima omutusila u tuima.” Vimue pokati kovikomo Yesu a linga, via kuatisa omanu va enda oku tatiwa lãvi okuti, pamue va enda oku liyeva ndolundeya lua penga kuenda vana ka va kuatele elavoko okuti, va enda oku liyeva ndomutusila u tuima. Ndeci, onjanja yimue, Yesu wa li sanga lulume umue wa kuatiwile lovilundu. Citava okuti, ulume waco ka kuatele elavoko lioku sakuiwa ale lioku kala vali kumosi lepata liaye kuenda lakamba. (Luka 5:​12, 13) Kepuluvi likuavo, Yesu wa sangavo ulume umue wa kala ocisitatũi haeye wa kuatele onjanjo kelimi. Sokolola ndomo ulume waco a enda oku liyeva, eci omanu vakuavo va enda oku sapela lesanju omunu lukuavo, pole, eye ka ponduile oku kuata elomboloko liovina va kala oku popia. (Mar. 7:​32, 33) Pole, hacoko lika.

⁸ Koloneke via Yesu, va Yudea valua va tavele okuti omanu vana va vela kuenda ovilema, va kala oku kangisiwa omo liakandu avo, ale akandu olonjali viavo. (Yoa. 9:2) Omo lielongiso liaco liesanda, omanu vaco okuti va kala ale oku tala ohali, ka va kapiwileko lomanu vakuavo kuenda va enda oku liyeva okuti ka va kuete esilivilo. Pole, Yesu poku tẽlisa ocitumasuku cuprofeto Isaya, wa sakula omanu vaco kuenda wa lekisa okuti Suku wa va kapako calua. Oku kũlĩha ovina viaco, ci tu ĩha ekolelo lipi?

9. Ndomo ca tangiwa kukanda ku Va Heveru 4:​15, 16, tua kũlĩha ndati okuti Ocitunda cetu Cinene ca kapako omanu ka va lipuile?

⁹ Tanga Va Heveru 4:​15, 16. Tu pondola oku kolela okuti, Yesu olonjanja viosi o ka lekisa ohenda kokuetu. Eci ci lomboloka nye? Ci lomboloka okuti, omunu umue ukuahenda, wa kapako ohali kuenda ekalo liomuenyo liomunu ukuavo. Kelimi lio Helasi, ondaka ya pongoluiwa okuti “ohenda” yi sangiwa kukanda ku va Heveru 4:​15, yi lomboloka oku yeva esumuo kuenda evalo omanu vakuavo va yevite. (Sokisa lukanda ku va Heveru 10:​34, kuna upostolo Paulu a tukula ondaka yimuamue kelimi lio Helasi, oco a lekise okuti tu sukila oku lekisa ohenda ku vana va kasi vokayike.) Eci tu tanga Vembimbiliya catiamẽla kovikomo via Yesu, tu limbuka okuti eye wa lekisa ohenda komanu vakuavo. Eye ka ci lingile omo liekisika. Wa ci linga, omo wa kapeleko omanu vaco kuenje wa yonguile oku va kuatisa. Ndeci, poku sakula ulume umue ukuavilundu, eye wa ponduile oku ci linga ocipãla, pole, wa nõlapo oku lamba kulume waco. Citava okuti ya kala onjanja yatete okuti omunu umue wa lamba kulume waco ukuavilundu vokuenda kuanyamo alua! Sokololavo epuluvi eci Yesu a sakula ulume umue ocisitatũi. Yesu lohenda wa ambata ulume waco kocitumãlo cimue okuti va kala ulika. Handi vali, sokolola kovina via li pita eci ukãi umue wa enda oku linga ovina vĩvi, pole, wa likekembela, a sukula olomãi via Yesu lasuẽlela aye. Ulume umue u Fariseu ka lekisile ohenda kukãi waco, pole, Yesu wo teyuila kuenda wa pisa ulume waco. (Mat. 8:3; Mar. 7:33; Luka 7:44) Yesu ka yuvuile oku kala ocipepi lomanu va kala oku vela ale la vana va lingile akandu anene. Pole, eye wa ecelela okuti omanu vaco veya kokuaye kuenda wa lekisa kokuavo ohenda a va kuatelele. Omo liaco, tu pondola oku kolela okuti toke cilo, Yesu wa siatavo oku lekisa ohenda yaco kokuetu.

NDOMO TU SETUKULA OCITUNDA CETU CINENE KOLONEKE VILO

10. Ovina vipi tu pondola oku talavaya lavio oco tu kuatise olomeke kuenda ovisitatũi? (Talavo oviluvialuvia.)

¹⁰ Omo okuti tulondonge via Yesu, tua siata oku likolisilako oku u setukula poku lekisa ocisola, ohenda kuenda ocikembe komanu vakuavo. (1 Pet. 2:21; 3:8) Ocili okuti ka tu pondola oku sakula ovisitatũi ale olomeke, pole, tu pondola oku kuatisa omanu vaco konepa yespiritu. Ndeci, alivulu etu a kunamẽla Kembimbiliya, a sandekiwa kueci ci pitahãla 100 kalimi oku ilaika. Handi vali, komanu vana okuti ka va lete ciwa ale olomeke, kua sandekiwa alivulu obraile kueci ci pitahãla 60 kalimi kuenda olo audio vi lombolola oviluvialuvia, via sandekiwa kueci ci pitahãla 100 kalimi. Ovina viaco via sokiyiwila oco vi kuatise ovisitatũi lolomeke oku kala akamba va Yehova kuenda Viomõlaye Yesu.

11. Ocisoko ca Yehova ca siata oku setukula ndati Yesu poku lekisa ohenda komanu vosi? (Ovilinga 2:​5-7, 33) (Talavo oviluvialuvia.)

¹¹ Ocisoko ca Yehova, ca siata oku likolisilako oku kuatisa omanu vosi. Ivaluka okuti eci Yesu a pinduiwa, wa eca espiritu sandu oco okuti vosi vana va liongoluilile Kocipito Copendekoste, va yeva olondaka viwa “velimi liavo muẽle.” (Tanga Ovilinga 2:​5-7, 33.) Poku kuama olonumbi via Yesu, ocisoko ca siata oku sandeka alivulu a kunamẽla Vembimbiliya kueci ci pitahãla 1.000 kalimi, okuti amue pokati kalimi aco, a vanguiwa lika letendelo limue litito liomanu. Ndeci, alimi amue o ko Amerika, a vanguiwa lika letendelo limue litito liomanu va sangiwa ko Amerika yo Konano kuenda yo Kombuelo. Pole, kua sandekiwa alivulu kueci ci pitahãla 160 kalimi aco, oco okuti vosi va vangula alimi aco va kuata epuluvi lioku yeva olondaka viwa Viusoma. Alivulu etu, a sandekiwavo kueci ci pitahãla 20 kalimi o Romani. Omo liaco, valua pokati komanu va vangula alimi aco, va kasi ale oku vumba Yehova.

12. Ovina vipi vikuavo ocisoko ca Yehova ca siata oku lingila omanu koloneke vilo?

¹² Ocisoko ca Yehova ka ca siatele lika oku kuatisa omanu oku yeva olondaka viwa, pole, ca siatavo oku kuatisa omanu vana va lipita lovilunga. Oco ku eciwe ekuatiso liaco, Olombangi vialua Via Yehova via siata oku lieca olumue oco vi kuatise vana va lipita lovilunga viaco. Handi vali, ocisoko ca Yehova ca siatavo oku tunga ovitumãlo viefendelo oco omanu va liongoluilemo locimãho coku lilongisa catiamẽla kocisola Suku a va kuetele.

OCITUNDA CETU CINENE CI PONDOLA OKU KU KUATISA

13. Yesu wa siata oku tu kuatisa ndati?

¹³ Yesu ungombo wetu uwa, wa kapako asukila omunu lomunu pokati ketu a kuete konepa yespiritu. (Yoa. 10:14; Va Efe. 4:7) Olonjanja vimue omo liekalo liomuenyo wetu, tu pondola oku liyeva ndomutusila u tuima ale ndolundeya lua penga. Pamue tu sumua calua omo liuvei umue ka u kuete esaku, ekandu limue tua linga ale omo tua li tatamisa la manji umue. Omo liovitangi tu kasi oku liyaka lavio, tu pondola oku sima okuti ka ca lelukile oku tiamisila utima kelavoko lietu lio kovaso yoloneke. Pole, ivaluka okuti Yesu o lete ovitangi viosi o kasi oku liyaka lavio kuenda onjila ndomo o liyevite. Omo liohenda kuenda ocikembe a ku kuetele, eye o yongola oku ku kuatisa. Ndeci, eye o pondola oku talavaya lespiritu sandu oco a ku ĩhe ongusu eci ohongua. (Yoa. 16:7; Tito 3:6) Handi vali, Yesu wa eca “alume ndolombanjaile” okuti akulu vekongelo kuenda wa ecavo vamanji vakuavo, oco va ku pamise loku ku kuatisa.—Va Efe. 4:8.

14. Nye tu sukila oku linga eci tu sumua?

¹⁴ Nda okuti wa sumua, ivaluka okuti Yesu eye Ocitunda cetu Cinene kuenda sokolola lutate kueci olondaka viaco vi lomboloka kokuove. Ivalukavo okuti Yehova, ka tumile lika omõlaye palo posi oco a ece omuenyo waye ndocisembi, pole, wa ci lingilavo oco a kuatise Yesu oku kuata elomboloko lia suapo liovitangi tua siata oku liyaka lavio omo liekambo lioku lipua. Omo liaco, eci tu sumua omo liakulueya etu, Yesu wa li kapelako oku tu kuatisa olonjanja viosi “tu sukila ekuatiso.”—Va Hev. 4:​15, 16.

15. Nye ca kuatisa manji umue ulume oku tiuka ku Yehova?

¹⁵ Yesu o songuilavo omanu vana va kasi oku likolisilako oku sandiliya kuenda oku kuatisa vana va liwekapo oku vumba Yehova oco va tiuke kokuaye. (Mat. 18:​12, 13) Kũlĩhĩsa ovina via lipita la manji umue ulume o tukuiwa Stefano.b Noke lioku pita 12 kanyamo tunde eci a tundisiwa vekongelo, eye wa nõlapo oku enda kohongele yimue. Eye wa popia hati: “Kokuange ka ca lelukile, pole, nda yonguile vali oku vumba Yehova kumue la vamanjange vakuacisola. Akulu vekongelo va liongoluile lame kuenda va ndi kuatisa oku lianja. Olonjanja vimue, nda enda oku sumua omo lioku yanduluka Yehova kuenda nda yonguile oku liwekapo. Pole, vamanji va ndi ivaluisa okuti Yehova la Yesu va yongola okuti ame ndi pandikisa. Eci nda tambuiwa vekongelo, vamanji vosi va tu yolela lesanju, ame kumue lepata liange. Noke ukãi wange wa fetika oku lilongisa Embimbiliya kuenje cilo, tu kasi oku vumbila kumosi Yehova.” Ocitunda cetu Cinene, ci kuata esanju lialua eci a mola okuti omanu vosi vekongelo va kasi oku kuatisa vana va tundisiwa vekongelo oco va likekembele loku tiuka ku Yehova!

16. Momo lie tu sukilila oku eca olopandu omo lioku kuata Ocitunda cimue Cinene okuti ukuahenda?

¹⁶ Yesu vokuenda kuomuenyo waye palo posi, wa eca ekuatiso komanu valua votembo ya sokiyiwa. Koloneke vilo, tu pondolavo oku kuata ekolelo liokuti, eye olonjanja viosi o ka tu ĩha ekuatiso tu sukila. Kuenje voluali luokaliye, Yesu o ka tu kuatisa oku kuata omuenyo umue wa li pua. Omo liaco, tu eca olopandu vialua ku Yehova, Suku yetu ukuacisola calua haeye ukuahenda, wa tu ĩha Ocitunda Cinene Yesu Kristu, una okuti ukuahenda!