“ Ove Wumunu Umue o Soliwe Calua!”

1-2. Nye ci pondola oku tu kuatisa oku kolela okuti tu soliwe calua la Yehova?

YEHOVA o sole calua afendeli vaye vakuekolelo. Pole, vamue pokati kavo ka va kolelele okuti eye o va sole. Eci ci pondola oku li pita omo okuti pamue, ovo va tatiwile lãvi lomanu vakuavo. Anga hẽ wa li pitile ale locitangi caco? Nda oco, nye ci pondola oku ku kuatisa oku kolela okuti, o soliwe calua la Yehova?

² Ocina cimue ci pondola oku ku kuatisa, oku konomuisa ovolandu Embimbiliya a situlula onjila ndomo Yehova a yongola okuti oco omanu va tatiwa. Omõlaye Yesu, wa enda oku tata omanu lesumbilo kuenda locisola. Poku ci linga, Yesu wa lekisa okuti eye kumue la Isiaye va kapako calua ambombe vana va siata oku litenda ndu okuti ka va kuete esilivilo. (Yoa. 5:19; Va Hev. 1:3) Vocipama cilo, tu konomuisa: (1) ndomo Yesu a kuatisa omanu oku limbuka okuti ovo va soliwe calua la Yehova kuenda (2) ndomo tu pondola oku kolela lutima wosi okuti, Yehova o tu sole calua.—Hag. 2:7.

NDOMO YESU A KUATISA OMANU OKU LIMBUKA ESILIVILO VA KUETE

3. Yesu wa tata ndati omanu vo ko Galilea va sukilile ekuatiso liaye?

³ Yesu eci a kala oku kundila volupale luo Galilea, omanu valua veya kokuaye oco va longisiwe kuenda oku sakuiwa. Yesu wa limbuka okuti ovo, “va kala oku talisiwa ohali loku sakalaisua ndolomeme ka vi kuete ungombo.” (Mat. 9:36) Omanu vaco, ka va kapiwileko lasongui vavo vetavo, toke muẽle ovo va tendiwile ndomanu va “siñaliwa.” (Yoa. 7:​47-49) Pole, Yesu wa tata omanu vaco locisola kuenda lesumbilo, poku va longisa loku sakula ovovei avo. (Mat. 9:35) Handi vali, locimãho coku kuatisa omanu valua, eye wa pindisa ovapostolo vaye oco va kunde olondaka viwa Viusoma kuenda wa va ĩha unene woku sakula ava va vela. —Mat. 10:​5-8.

4. Nye tu lilongisila konjila ndomo Yesu a tata omanu vana ka va kapiwileko?

⁴ Yesu poku tata olonjeveleli viaye locisola kuenda lesumbilo, wa lekisa okuti eye kumue la Isiaye, va sole calua omanu vana ka va kapiwileko lomanu vakuavo. Nda okuti o kasi oku vumba Yehova, pole, o kuete atatahãi nda eye oku sole muẽle ale sio, sokolola konjila ndomo Yesu a tata omanu vana ambombe va yonguile oku longisiwa laye. Oku ci linga, ci ka ku kuatisa oku tava okuti, ove o soliwe calua la Yehova.

5. Ovina vipi tua kũlĩha viatiamẽla kukãi umue Yesu a sanga ko Galilea?

⁵ Yesu ka longisile lika owiñi, pole, wa ecavo ekuatiso komunu lomunu. Ndeci, eci eye a kala oku kundila ko Galilea, wa sanga ukãi umue wa kala oku tala ohali omo lioku pita osonde vokuenda kueci ci soka 12 kanyamo. (Mar. 5:25) Ndomo ca lekisiwile vocihandeleko, ukãi waco wa vĩhisiwile kuenda omunu wosi wo lambele wa ponduilevo oku vĩhisiwa. Eci ci lekisa okuti, ekalo liomuenyo liukãi waco, lia enda oku u tateka oku kala ocipepi lomanu kuenda citava okuti wa enda oku kala otembo yalua lika liaye. Handi vali, eye ka ponduile oku fendela Yehova kumue lomanu vakuavo vosunangonga kuenda kovipito. (Ovis. 15:​19, 25) Omo liaco, ukãi waco ka kaile lika oku tala ohali omo liuvei waco, pole, citava okuti wa endavo oku liyeva okuti, ka soliwile lomanu vakuavo.—Mar. 5:26.

6. Nye ukãi wa kala oku pita osonde a linga oco a sakuiwe?

⁶ Ukãi waco wa yonguile okuti Yesu u sakula kuvei waye. Pole, eye ka pingile ku Yesu oco o sakule. Momo lie? Momo eye pamue, wa kuatele osõi omo liuvei waye ale omo okuti wa vĩhisiwile, citava okuti wa kala lusumba wokuti Yesu, wa laikele oku u pisa omo lioku kala pokati komanu. Omo liaco, eye wa lamba lika kolunjenje wuwalo wa Yesu, lekolelo liokuti poku ci linga wa laikele oku sakuiwa. (Mar. 5:​27, 28) Omo liekolelo ukãi waco a lekisa, wa sumũlũisiwa loku sakuiwa kuvei waye. Kuenje, eci Yesu a pula nda helie wo lamba, ukãi waco wo lomboluila ovina a linga. Yesu wa tata ndati ukãi waco?

7. Yesu wa tata ndati ukãi una wa kala oku tala ohali yalua omo lioku pita osonde? (Marko 5:34)

⁷ Yesu wa tata ukãi waco locisola kuenda lesumbilo. Eye wa limbuka okuti ukãi waco wa kala oku “luluma omo liusumba.” (Mar. 5:33) Yesu wa vangula laye lesumbilo kuenda wo pamisa. Toke muẽle eye wo tukula hati, “amõlange.” Poku tukula ondaka yaco, Yesu ka lekisile lika ocisola kukãi waco, pole, wa lekisavo ocikembe kuenda esumbilo. (Tanga Marko 5:34.) Etosi limue lielilongiso liatiamẽla kondaka yaco li popia okuti, “eyi ya kala onjanja yatete haiyo ya sulako Vembimbiliya, Yesu a tukula ukãi umue hati, ‘amõlange.’ Citava okuti Yesu wa tukula ondaka yaco yocisola, momo wa limbuka okuti ukãi waco wa kala ‘lusumba’ walua.” Sokolola ekavuluko ukãi waco a yeva! Nda okuti Yesu ka vanguile laye locisola, citava okuti ukãi waco nda wa sakuiwa kuvei waye woketimba, pole, eye nda wamamako lesumuo kuenda oku livetela evelo omo liovina a linga. Omo liaco, Yesu wa kuatisa ukãi waco oku limbuka okuti, eye wa soliwile calua la Isiaye wokilu.

8. Ovitangi vipi manji umue kofeka yo Brasil a liyaka lavio?

⁸ Koloneke vilo, afendeli vamue va Yehova, va kasi oku liyaka luvei umue u va kokela esumuo lialua loku liyeva okuti ka va kuete esilivilo. Kũlĩhĩsa ulandu wa manji umue ukãi o tukuiwa Maria,a ukundi wotembo yosi kofeka yo Brasil okuti, ka citiwile lovolu kuenda okuokuo kuepĩli. Eye wa popia hati: “Olonjanja vialua nda enda oku sanumuiwa kosikola omo liulema wange. Vana tua tangela kumosi, va enda oku ndi tukula olonduko viesepu loku ndi sapuila ovina vi sumuisa calua. Kuenda olonjanja vimue, epata liange lia endavo oku ndi tata lonjila yimue ya ndi kokela oku liyeva okuti si kuete esilivilo.”

9. Manji Maria wa kuatisiwa ndati oku limbuka okuti o soliwe calua la Yehova?

⁹ Manji Maria wa kuatisiwa ndati? Eci eye a linga Ombangi ya Yehova, vamanji vo vekongelo vo lembeleka kuenda vo kuatisa oku litenda ndomo Yehova o tenda. Eye wa popia hati: “Nda tambula ekuatiso lia vamanji valua! Ndi pandula Yehova lutima wange wosi omo lioku nyĩha epata limue li komõhisa vekongelo.” Vamanji vaco vo vekongelo, va kuatisa manji Maria oku limbuka okuti eye o soliwe calua la Suku.

10. Ocitangi cipi Maria Magadala a kuatele kuenda wa enda oku liyeva ndati? (Talavo oviluvialuvia.)

¹⁰ Kũlĩhĩsavo ndomo Yesu a kuatisa Maria Magadala. Ukãi waco wa kuatiwile lolondele epanduvali! (Luka 8:2) Citava okuti omo liolondele viaco, eye wa enda oku linga ovina ka via sungulukile kuenje omanu va enda oku yuvula oku kala laye. Vokuenda kuotembo yaco, eye wa tala ohali yalua. Citava okuti eye wa kuatele usumba walua, loku sima okuti lomue wo solele kuenda wa enda oku liyeva ulika. Pole Yesu, wa tundisa kokuaye olondele viaco via kala oku u talisa ohali yalua kuenje eye wa linga ondonge ukuambili ya Yesu. Onjila yipi yikuavo Yesu a kuatisa Maria Magadala oku kuata elomboloko liokuti wa soliwile calua la Suku?

11. Yesu wa kuatisa ndati Maria Magadala oku limbuka okuti eye wa soliwile calua la Yehova? (Talavo oviluvialuvia.)

¹¹ Yesu wa eca ku Maria Magadala esumũlũho lioku u kuama kovongende aye wupange woku kunda.b Omo liaco, Maria Magadala wamamako oku kuatisiwa eci a enda oku yeva Yesu oku longisa omanu vakuavo. Handi vali, Yesu wa molẽhela kokuaye keteke a pinduiwa. Maria Magadala wa kala umue pokati kolondonge viatete viakãi Yesu a sapela lavo keteke liaco. Toke muẽle Yesu, wa eca kokuaye ocikele coku ka sapuila kovapostolo okuti Yesu wa pinduiwa. Ovina Yesu o lingila, vio kuatisa oku limbuka okuti eye wa soliwile calua la Yehova!—Yoa. 20:​11-18.

12. Lombolola esunga lieci manji Lidia a enda oku liyeva okuti ka soliwe.

¹² Ndeci ca lipita la Maria Magadala, omanu valua koloneke vilo va siatavo oku liyeva ndu okuti ka va kuete esilivilo kuenda ka va soliwe. Manji umue ukãi o tukuiwa Lidia wo kofeka yo Espanya, wa popia okuti osimbu ka citiwile, inaye wa yonguile oku u pulumũla. Manji Lidia ivalukavo okuti eci a kala omõla, inaye ko kapeleko kuenda wa enda oku u popia lãvi. Eye wa popia hati: “Ocina cimue nda yonguile komuenyo, oku taviwa lomanu vakuavo kuenda oku soliwa. Nda kuatele usumba wokuti omanu lalimue eteke va ka ndi sola momo, ina yange wa ndi vetiya oku sima okuti ndumunu umue ũvi.”

13. Nye ca kuatisa manji Lidia oku limbuka okuti eye o soliwe calua la Yehova?

¹³ Eci manji Lidia a fetika oku lilongisa Embimbiliya, ovina via pongoloka. Oku likutilila ku Yehova, oku tanga Embimbiliya kuenda ovituwa viwa via vamanji, vio kuatisa oku kuata elomboloko liokuti o soliwe calua la Yehova. Eye wa popia hati: “Ulume wange olonjanja viosi wa siata oku ndi sapuila okuti o ndi sole calua. Wa siatavo oku ndi ivaluisa ovituwa viwa ndi kuete. Vamue pokati kakamba vetu va siatavo oku ci linga.” Anga hẽ ove wa kũlĩha manji umue vekongelo, o sukilavo ekuatiso oco a limbuke okuti o soliwe calua la Yehova ndeci ca lipita la manji Lidia?

TU LITENDA NDATI NDOMO YEHOVA A TU TENDA?

14. Elivulu lia 1 Samuele 16:7 li tu kuatisa ndati oku litenda ndomo Yehova a tu tenda? (Talavo okakasia losapi hati: “Momo Lie Afendeli va Yehova va Kuetele Esilivilo Kovaso Aye?”)

¹⁴ Ivaluka okuti onjila ndomo Yehova a ku tenda ya litepa lonjila ndomo oluali lu ku tenda. (Tanga 1 Samuele 16:7.) Komanu valua Voluali, omunu umue o kuete lika esilivilo nda eye wa fina, nda o kuete olombongo vialua kuenda nda wa tanga calua. Pole, Yehova ka tendi omanu lonjila yaco. (Isa. 55:​8, 9) Omo liaco, ove ku sukila oku tenda esilivilo o kuete lonjila ndomo oluali lu ci tenda, pole, o sukila oku li tenda ndomo Yehova a ku tenda. Embimbiliya li tukula ovolandu omanu valua okuti olonjanja vimue, va simile okuti ka va kuatele esilivilo. Vamue pokati komanu vaco Eliya, Naomi kuenda Hana. Poku tanga ovolandu atiamẽla kokuavo, limbuka ndomo Yehova a va solele. Ove o pondolavo oku kuata o kadernu kamue oco o sonehemo ovina via lipita ale komuenyo wove vi lekisa okuti Yehova o ku sole kuenda wa ku kapako. Handi vali, ove o pondola oku linga ekonomuiso liatiamẽla koku kuata “ovisimĩlo via sunguluka viatiamẽla kokuove,” valivulu etu.c

15. Momo lie Yehova a tendela Daniele okuti omunu umue “o soliwe?” (Daniele 9:23)

¹⁵ Kũlĩha okuti ekolelo liove li koka okuti o kuata esilivilo lialua ku Yehova. Vepuluvi limue, uprofeto Daniel okuti kotembo yaco wa kuatele ale ci soka 90 kanyamo, wa “kala lekavo lialua” kuenda wa sumuile. (Dan. 9:​20, 21) Yehova wo pamisa ndati? Eye wa tuma ungelo umue oco a ivaluise Daniele okuti, eye “o soliwe calua” kuenda olohutililo viaye via yeviwa. (Tanga Daniele 9:23.) Nye ca koka okuti Daniele o soliwa calua la Yehova? Pokati kovituwa vialua, ocisola Daniele a kuatele koku linga eci ca sunguluka kuenda ekolelo liaye. (Esk. 14:14) Yehova wa kapa ulandu waco Vembimbiliya oco a tu lembeleke. (Va Rom. 15:4) Eye o yevelelavo olohutililo vietu kuenda wa tu kapako omo liocisola tu kuete loku linga ovina viwa kuenda upange wetu wekolelo.— Mik. 6:​8, atosi; Va Hev. 6:10.

16. Nye ci pondola oku ku kuatisa oku tenda Yehova nda Isia umue ukuacisola?

¹⁶ Tenda Yehova nda Isia umue oku sole. Yehova ka sandi eci cĩvi kokuove, pole, o yongola lika oku ku kuatisa. (Osa. 130:3; Mat. 7:11; Luka. 12:​6, 7) Oku sokolola kovina viaco, ca siata oku kuatisa omanu valua va kuete ovisimĩlo ka via sungulukile viatiamẽla kokuavo muẽle. Ndeci, kũlĩhĩsa ulandu wa manji umue ukãi o tukuiwa Eliana wo ko Espanya, wa enda oku liyeva okuti ka kapiwileko kuenda ka kuatele esilivilo omo okuti vokuenda kuanyamo alua ulume waye wa enda oku u popia lãvi. Eye hati: “Olonjanja viosi eci nda enda oku liyeva okuti si kuete esilivilo, ame nda enda oku sokolola okuti Yehova o kasi oku ndi kuata peka loku ndi tata locisola kuenda oku ndi teyuila.” (Osa. 28:9) Manji umue ukãi o tukuiwa Lauren woko Afrika du Sul, olonjanja viosi o livaluisa eye muẽle ndoco: “Nda Yehova lohenda yaye wa ndi kokela kokuaye lovikolo viocisola loku ndi teyuila vokuenda kuanyamo osi kuenda wa siata oku talavaya lame oco ndi longise omanu vakuavo, uvangi wokuti eye o ndi sole kuenda ndi kuete esilivilo lialua kokuaye.”—Hos. 11:4

17. Nye ci pondola oku ku kuatisa oku kolela okuti o taviwa la Yehova? (Osamo 5:12) (Talavo ociluvialuvia.)

¹⁷ Kolela okuti ove o taviwa la Yehova. (Tanga Osamo 5:12.) Daviti wa sokisa oku taviwa la Yehova “ndociyepelo cinene” ci teyuila vakuesunga. Oku kũlĩha okuti ove o taviwa la Yehova kuenda o kuete ekuatiso liaye, ci pondola oku kala ndociyepelo ci ku teyuila eci o kuata ovisimĩlo ka via sungulukile viatiamẽla kokuove muẽle. Pole, o kũlĩha ndati okuti o taviwa la Yehova? Ndomo tua konomuisa, tu pondola oku ci kolela poku tanga Embimbiliya muna Yehova a tu situluila ovisimĩlo viaye viatiamẽla kokuetu. Handi vali, Yehova o talavaya lakulu vekongelo, lakamba vetu kuenda lomanu vakuavo oco va tu ivaluise okuti tu kuete esilivilo lialua kovaso aye. Oco hẽ, nye ove o sukila oku linga eci omunu umue a ku sapuila ovina viwa?

18. Momo lie o sukilila oku tava epandiyo liomanu vakuavo?

¹⁸ Tava epandiyo liomanu va ku sole haivo va ku kũlĩha. Ivaluka okuti Yehova o pondola oku vetiya omanu vaco, oco va ku kuatise oku kuata elomboloko liokuti o taviwa laye. Manji Eliana wa tukuiwa ale wa popia hati: “Kamue kamue ndi kasi oku lilongisa oku tava lutima wosi olondaka viocisola omanu vakuavo va siata oku ndi sapuila. Ka ca lelukile kokuange oku ci linga, pole, nda kũlĩha okuti eci oco Yehova a ndi yonguila.” Akulu vekongelo locisola, va siata oku kuatisa manji Eliana oku limbuka okuti eye o soliwe calua la Yehova. Cilo, manji Eliana ukundi wotembo yosi kuenda o kuatisa kupange wo Betele oku upisa konjo.

19. Momo lie tu sukilila oku kolela okuti tu soliwe calua la Yehova?

¹⁹ Yesu locisola calua, o tu ivaluisa okuti tu kuete esilivilo lialua kovaso a Isietu wo kilu. (Luka 12:24) Tu pondola oku kolela okuti Yehova o tu tenda ndomanu va soliwe calua. Lalimue eteke ka tu ka ivaliko ocili caco! Omo liaco, tu likolisiliko oku kuatisa vakuetu oku limbuka okuti ovo va soliwe calua la Yehova!