Ravea 5

A haamâha i to oe mau hinaaro pae varua

EAHA TA TE BIBILIA E HAAPII RA? “O tei faaroo â e ua haapao i te parau a te Atua, o ratou tei maitai.”—Luka 11:28.

EAHA TE FIFI? I nia na tausani haapaoraa, mea rahi te haapii ra i te mau ravea tuea ore no te haamâha i to oe mau hinaaro pae varua. E nafea oe e ite ai e teihea te haapii i te parau mau e ta te Atua e farii mau ra? No te hoê taata papai tuiroo, e mea maamaa e te ino atoa ia tiaturi e ia haamori i te Atua. Te haapoto ra te hoê vea (Maclean’s) i te manaˈo o te hoê taata tuiroo e na ô ra e aita e Atua: “Te haafaufaa ore ra te manaˈo Kerisetiano o te tahi mea o te hau ê i te ihi aivanaa e i to tatou ite i to tatou oraraa e te turai ra ia tatou i te haavîraa uˈana.”

EAHA TE RAVE? A hiˈopoa i te mau haapapuraa e te vai mau ra te Atua. (Roma 1:20; Hebera 3:4) Eiaha e vaiiho i te tahi noa ˈtu taata ia tapea ia oe ia imi i te mau pahonoraa i te mau uiraa faufaa, mai teie: No te aha tatou e ora ˈi? E oraraa anei i muri aˈe i te pohe? No te aha mea rahi ai te mauiui? Eaha ta te Atua e titau maira? E mea faufaa roa ia pahonohia teie mau uiraa no te ite i te mauruuru mure ore.

Eiaha râ e farii hanoa i ta vera ma parau. Te faaitoito ra te Bibilia ia faaohipa i to oe puai feruriraa ia papu ia oe eaha ta te Atua e farii ra. (Roma 12:1, 2) E hoonahia oe. Ia faataa oe i te taime no te haapii i te Bibilia e no te faaohipa i to te reira mau aˈoraa, e iti mai to oe mau fifi e to oe ahoaho e e oaoa ˈtu â oe i te oraraa. E parau mau teie. Ua maitaihia e mirioni taata o te mau taˈere atoa i te haapiiraa i te parau mau no nia i te Atua e ta ˈna mau opuaraa.

E here atu â oe i te Atua ia faaohipa oe i te mau aˈoraa Bibilia î i te paari. No te aha e ore ai e farii i te haapii i te Bibilia e te mau Ite no Iehova? Ia na reira oe, e farii paha oe i ta te aposetolo Paulo i papai: “Te paieti e te mauruuru ra, o te taoˈa rahi mau ïa.”—Timoteo 1, 6:6.

[Hohoˈa i te api 8]

Ia papu ia oe eaha ta te Atua e farii ra