E titauhia anei ia ˈu ia riro ei Ite no Iehova, ia haapii au i te Bibilia e o ratou?

Eita. Eita roa ˈtu oe e faahepohia ia riro ei Ite no Iehova. E mirioni taata te haapii ra i te Bibilia e o matou, eita râ ratou e riro ei mero o ta matou mau amuiraa.a Te haapii atu nei matou i te Bibilia ia vetahi ê no te faaite i ta te Bibilia e parau ra. Na oe iho e faaoti eaha ta oe e rave e te mau mea ta oe i haapii mai. Ua ite matou e na te taata taitahi e faatupu i te faaroo.—Iosua 24:15.

E nehenehe anei au e faaohipa i ta ˈu iho Bibilia i roto i te haapiiraa Bibilia?

E. Papu maitai, te oaoa nei matou i te faaohipa i Te Bibilia, Huriraa o te ao apî no te mea ua hurihia te reira na roto i te reo o teie tau. Mai te peu e e hinaaro oe e fanaˈo i te hoê Bibilia, e nehenehe matou e horoa ˈtu i te reira ma te tamoni ore. Teie nei râ, te oaoa nei matou mai te peu e te faaoti nei oe i te faaohipa i ta oe iho Bibilia. E nehenehe oe e haapii mai i te poroi Bibilia no nia i te tiaturiraa e te faaoraraa maoti e rave rahi huriraa Bibilia.

No te aha outou e haapii atu ai i te Bibilia i te feia e ere i te Ite no Iehova?

• E na reira matou no te mea te here nei matou i te Atua ra o Iehova. Te hinaaro nei te Atua ia haapii atu te mau Kerisetiano ia vetahi ê i te mau mea ta ratou i haapii mai. (Mataio 22:37, 38; 28:19, 20) No matou, aita ˈtu e fanaˈoraa taa ê rahi aˈe i te riroraa ei “hoa ohipa . . . no te Atua” no te tauturu i te mau taata ia ite eaha ta te Parau a te Atua e haapii mai ra.—Korinetia 1, 3:6-9.

• E na reira atoa matou no te mea te here nei matou i to matou mau taata tupu. (Mataio 22:39) Te oaoa nei matou i te faaite ia vetahi ê i te mau mea faahiahia ta matou i haapii mai.—Ohipa 20:35.