No te aha te mau Ite no Iehova e poro ai i te taata o tei parau na mua ˈˈe “Aita vau e anaanatae ra”?
Na te here i te Atua e i te taata tupu e turai ra i te mau Ite no Iehova ia faaite i te poroi Bibilia i te taata atoa, oia atoa te feia i parau na mua ˈˈe “Aita vau e anaanatae ra.” Te oaoa nei ratou i te na reira. (Mataio 22:37-39) Na te here i te Atua e turai ra ia matou ia faaroo i te aˈoraa a ta ˈna Tamaiti e poro. (Ohipa 10:42; Ioane 1, 5:3) No te rave i te reira, e haere pinepine matou e poro i te poroi a te Atua, mai ta te mau peropheta a te Atua i tahito ra i rave. (Ieremia 25:4) No te mea te here ra matou i to matou taata tupu, e tamata ïa matou i te faaite i “te parau apî oaoa o te Faatereraa arii” faufaa roa i te taata atoa, oia atoa te feia aita i anaanatae na mua ˈˈe i te reira.—Mataio 24:14.
Ia hoˈi faahou matou e farerei i te taata aita i anaanatae, pinepine matou i te ite i te tahi tauiraa. E toru tumu to te reira:
E taui te taata i to ratou vahi faaearaa.
E anaanatae te tahi atu mau taata o taua noa fare ra i ta matou poroi.
E taui atoa te huru o te taata. No te tahi mau ohipa e tupu ra na te ao nei aore ra i tupu i roto i to ratou oraraa, “e hiaai” atu â ratou “i te mau mea pae varua,” a anaanatae atu ai i te poroi Bibilia. (Mataio 5:3) E nehenehe atoa te aau o te feia tei patoi na e taui mai to te aposetolo Paulo.—Timoteo 1, 1:13.
Tera râ, eita matou e faahepo i te taata ia farii i ta matou poroi. (Petero 1, 3:15) Te tiaturi ra matou e na te taata tataitahi e faaoti no ˈna iho no te parau o te haamoriraa.—Deuteronomi 30:19, 20.