TUMU PARAU MATAMUA | E HINAARO ANEI OE E HAAPII I TE BIBILIA?

Haapiiraa Bibilia no te taata atoa

Ua matau-maitai-hia te mau Ite no Iehova no ta ratou ohipa pororaa. Ua ite anei râ oe na te ao nei, e faatere atoa matou i te haapiiraa Bibilia?

Te hoê taata e haapii ra i te Bibilia i nia i ta ’na raveraa ohipa

I 2014, ua hau atu 8 000 000 Ite no Iehova i roto 240 fenua e faatere ra fatata 9 500 000 haapiiraa Bibilia i te avaˈe.a Ua rahi aˈe ïa te taata e haapii ra i te Bibilia i te huiraatira e vai ra i roto tau 140 fenua!

No te rave maite i tera ohipa, fatata hoê miria e te afa Bibilia, buka, vea e te tahi atu mau papai ta te mau Ite no Iehova e pia i te matahiti na roto 700 reo! Maoti tera tutavaraa taa ê, e nehenehe te taata e haapii i te Bibilia na roto i te reo ta ratou e hinaaro.

“I te fare haapiiraa, haumani hanoa vau, a rave ai râ i teie, mea anaanatae roa ïa e mea tamahanahana mau ta ˈu e haapii!”—Katlego no Afirika apatoa.

“I roto i te haapiiraa, e pahonohia ta ˈu mau uiraa atoa e te tahi atu â.”—Bertha no Mehiko.

“Eaha ˈtu â te ani! E faaterehia te haapiiraa Bibilia i to ˈu fare e te taime e tano ia ˈu.”—Eziquiel no Beresilia.

“I te tahi taime, 15 e tae atu 30 minuti aore ra hau atu te haapiiraa. Aita râ e peapea, mea au roa na ˈu te reira.”—Viniana no Auteralia.

“Maere oe, mea tamoni ore te haapiiraa!”—Aimé no Bénin.

“Mea faaoromai e mea mǎrû te taata e haapii ra ia ˈu. Ua riro mai mâua ei hoa rahi roa.”—Karen no Irelane apatoerau.

“Aita te mau taata atoa i haapii i te Bibilia i riro ei Ite no Iehova.”—Denton no Beretane.

PAHONORAA O TE MAU UIRAA A TE TAATA NO NIA I TA MATOU MAU HAAPIIRAA BIBILIA

Mai te aha te tereraa o te haapiiraa?

E hiˈopoa matou i te mau irava Bibilia ia au i te mau tumu parau e rave rau. A hiˈo na te mau pahonoraa o te mau uiraa e hiti mai: O vai te Atua? Mai te aha to ˈna huru? E iˈoa anei to ˈna? Teihea roa oia? E nehenehe anei e haafatata ˈtu? Te fifi râ, te iteraa ïa eaha te mau irava Bibilia e pahono i tera mau uiraa.

No te tauturu i te taata ia ite i te pahonoraa, e pinepine matou i te faaohipa i te buka Eaha ta te Bibilia e haapii mau ra?b Ua faaineinehia tera papai ia taa ohie te taata eaha te mau haapiiraa tumu i roto i te Bibilia. No nia anei i te Atua, Iesu Mesia, te mauiui, te tia-faahou-raa, te pure e e rave rahi atu â tumu parau.

Afea e ihea e faatupu ai i te haapiiraa?

E nehenehe e faatupu i te reira i te taime e te vahi ta oe e hinaaro.

Eaha te maoro o tera haapiiraa?

E rave rahi te faataa hoê hora i te hebedoma no te haapii i te Bibilia. E nehenehe râ e faatano ia au i to oe tupuraa. E haapii vetahi 10 aore ra 15 minuti noa i te hebedoma.

Ehia moni te haapiiraa?

Mea tamoni ore te haapiiraa e te mau papai e faaohipahia. Ua na ô hoi Iesu i ta ˈna mau pǐpǐ: “I horoa-noa-hia mai ta outou, e horoa noa hoi outou.”—Mataio 10:8.

Afea e hope ai te haapiiraa?

Tei ia oe noa. E 19 pene to roto i te buka Eaha ta te Bibilia e haapii mau ra? E nehenehe oe e haapii hoê aore ra te taatoaraa o te mau pene ia au i to tupuraa.

E titauhia anei ia riro vau ei Ite no Iehova?

Aita. Ua ite matou e tiamâraa to te taata ia maiti i ta ˈna mau tiaturiraa. E nehenehe râ te feia i fanaˈo i te ite papu no nia i te Bibilia e rave i tera faaotiraa.

Eaha te rave no te ite atu â?

Ma te haere i nia i te reni jw.org, e ite atu â oe eaha te mau tiaturiraa e ohipa a te mau Ite no Iehova.

E nafea ia fanaˈo i te tahi haapiiraa Bibilia?

A faaî i ta oe parau aniraa i nia www.jw.org/ty.
A papai i te vahi nohoraa piri i ǒ oe faaitehia i te api 2 o teie vea.
No te niuniu i te mau Ite no Iehova, a hiˈo “Les Témoins de Jéhovah” i roto i te buka o te mau numera niuniu o to oe fenua.

a E nehenehe hoê taata aore ra te tahi pǔpǔ iti e fanaˈo i te haapiiraa Bibilia.

b Piahia e te mau Ite no Iehova. Hau atu 230 mirioni tei neneihia na roto hau atu 260 reo.

TAUTURU NO TE UTUAFARE

“A haamata ˈi ta ˈu vahine i te haapii i te Bibilia, ua taui roa to ˈna huru. Ua maitai mai to mâua oraraa utuafare. No to ˈu hinaaro e ite i ta ˈna e haapii ra, ua farii atoa vau i te haapiiraa. Ua riro mai au ei taata maitai aˈe. Ma te haapii i te Bibilia, ua piri atu â mâua.”—Eziquiel.

“I muri aˈe i to ˈu haapiiraa i te Bibilia, ua faaea vau i te rave i te raau taero, te inu hua i te ava e ua faaitoito i te haavî i to ˈu huru. E fare mâ e te naho to ˈu i teie nei. Ua here atu â vau i to ˈu utuafare e mea au na ˈu ia rave i te mau mea e faaoaoa ia ratou. E oraraa oaoa roa ˈˈe to ˈu i teie nei.”—Karen.

“Ua faaino vetahi taata ia ˈu a haapii ai au i te Bibilia. Ua turu mai râ ta ˈu tane ma te parau: ‘Eita vau e tâuˈa i ta te taata e parau. Ua ite au ua taui oe e tera te mea faufaa no ˈu. A tamau i ta oe e rave ra.’ Aita mâua i oaoa aˈenei mai tera!”—Viniana.