Tau veavea na te ao nei i 2023: Eaha ta te Bibilia e parau ra?

Ati aˈe te ao nei te faaruru ra te taata i te tau veavea mau e oia atoa te tahi atu ati natura. A tapao na te tahi mau faatiaraa:

“Ua faaruru te ao i te hoê tau veavea mau i te avaˈe no Tiunu mai te tau a tapaohia ˈi te anuvera a 174 matahiti i teie nei.”—Agence américaine dˈobservation océanique et atmosphérique, États-Unis, département du Commerce, 13 no Tiurai 2023.
“Ua faaruru te fenua no Italia, Paniora, Farani, Heremani e Poronia i te tau veavea mau, e te anuvera o te faitohia i nia 48°C i te motu no Sicile e Sardaigne, te mau anuvera aita i itehia aˈenei i Europa.”—Agence spatiale européenne, 13 no Tiurai 2023.
“A maraa noa ˈi te veavea, te tiaihia ra ia tupu rahi atu â te ûa rahi, a aratai atoa ˈtu ai i te pape pue.”—Stefan Uhlenbrook, directeur de lˈhydrologie, de lˈeau et de la cryosphère à lˈOrganisation météorologique mondiale, 17 no Tiurai 2023.

Te haapeapea ra anei oe i te maraaraa o te mau ati natura? A hiˈo eaha ta te Bibilia e parau ra no nia i te reira.

Ua tohu anei te Bibilia no te mau ati natura?

E. Ua tohu aˈena te Bibilia no to tatou tau i te tau veavea e te tahi atu mau ati natura. Ei hiˈoraa, ua tohu Iesu e ite tatou i “te mau mea riaria.” (Luka 21:11) No te maraaraa o te anuvera e rave rahi o te mǎtaˈu ra e tuino te huitaata i te fenua.

E riro anei te fenua ei vahi ano?

Aita. Ua poiete te Atua i te fenua ei nohoraa no tatou, eita oia e vaiiho i te taata ia tuino i te reira. (Salamo 115:16; Koheleta 1:4) Inaha, ua tohu oia e “haamou i te feia e tuino ra i te fenua.”—Apokalupo 11:18.

Te faaite ra te Bibilia e nehenehe e e paruru te Atua i te fenua i te mau ati natura.

“Te tamǎrû ra [te Atua] i te vero. Te mania ra te mau are miti.” (Salamo 107:29) E mana to te Atua i nia i te natura. E nehenehe oia e faaafaro i te mau fifi o te natura o te haamauiui ra i te huitaata.
“Te haapao nei oe i te fenua, ma te faahotu e te faaruperupe ia ˈna.” (Salamo 65:9) E faariro te Atua i te fenua ei paradaiso.

No te ite hau atu â no nia i te parau fafau a te Atua e faaora i te fenua, a hiˈo i te tumu parau “Na vai e faaora i te fenua?”