Ua hau i te 2 000 miria tara tei haamâuˈahia no te mau nuu faehau: Eaha ta te Bibilia e parau ra?

Ua naea te haamâuˈaraa a te mau nuu faehau na te ao atoa nei i te faito teitei apî e 2 240 miria tara Marite i 2022. Te tumu matamua i rahi roa ˈi tera mau haamâuˈaraa, ei patoiraa ïa i te nuu faehau Rusia tei tamata i te haavî i te fenua Ukraine. Ia au i te hoê titorotororaa i ravehia i Eperera 2023 e te pu SIPRI (Stockholm International Peace Research Institute), i te matahiti 2022:

• No te mau nuu faehau Europa, “ua maraa ta ratou haamâuˈaraa i te faito 13 i nia i te hanere i teie matahiti, a tahi faahou ra a itehia ˈi te reira mai te tau mai â o te tamaˈi toetoe.”

• Area te nuu faehau Rusia, ua maraa ta ˈna haamâuˈaraa i te faito e 9,2 i nia i te hanere. E ere faahou ïa o Rusia i te paeraa o te fenua mea haamâuˈa aˈe i ta ˈna moni no te nuu faehau, tei nia ˈtura râ oia i te tiaraa toru.”

• Tei ia Marite noa iho â te tiaraa matamua, “i nia i te taatoaraa o te haamâuˈaraa no te nuu faehau na te ao atoa nei, ua raea ta ˈna tuhaa i te faito e 39 i nia i te hanere.”

Na te taote Nan Tian atoa i tiaau i te titorotororaa a te SIPRI. Te na ô ra oia: “Ia ite tatou e ua maraa roa te haamâuˈaraa no te mau nuu faehau i te mau matahiti i mairi aˈenei, e tapao te reira e te ora nei tatou i roto i te hoê ao atâta roa ino.”

Ua tohu te Bibilia e e haere uˈana noa te au-ore-raa i rotopu i te mau fenua rahi. Te faaite-atoa-hia ra te ravea hoê roa e tupu ai te hau i roto i teie nei ao.

Ua tohuhia te au ore i roto i tera e tera nuu

• Te pii ra te Bibilia i te tau ta tatou e ora nei ‘te taime hopea.’—Daniela 8:19.

• Ua tohu te buka Daniela e i taua taime ra, e “aro” te mau nunaa te tahi i te tahi. Te na ô faahou ra Daniela e e haamâuˈa rahi tera mau nuu i ta ratou “taoˈa,” aore ra moni.—Daniela 11:40, 42, 43.

No te ite hau atu â no nia i teie parau tohu Bibilia anaanatae mau, a mataitai i te video Te tupuraa o te mau parau tohu: Daniela pene 11.

E nafea te hau mau e tupu ai?

• Te haapapu ra te Bibilia e e faaore te Atua i te mau faatereraa taata atoa. “E haamau te Atua o te raˈi i te hoê faatereraa arii o te ore roa e haamouhia. E e ore roa tera faatereraa arii e riro i te hoê nunaa ê atu. E faahuˈahuˈa e e haamou oia i tera mau faatereraa arii atoa, e o ˈna anaˈe te vai mai e a muri noa ˈtu.”—Daniela 2:44.

• Fatata roa te Atua ra o Iehovaa i te faatupu i tei ore i noaa aˈenei i te taata ia rave, te hau mau ïa o te vai noa e a muri noa ˈtu. E nafea? E faaore ta ˈna Faatereraa arii i te raˈi i te mau mauhaa tamaˈi e te mau ohipa ino atoa.—Salamo 46:8, 9.

No te ite hau atu â no nia i te Faatereraa arii a te Atua e ta ˈna e rave, a taio i te tumu parau “Eaha ta te Faatereraa arii a te Atua e rave?”