Te paˈurâ rahi: Eaha ta te Bibilia e parau ra?

“Ua tapao te fenua Taina e a tahi ra ratou a faaruru ai i te hoê tau veavea mau aita i itehia aˈenei i teie matahiti.”—The Guardian 7 no Tetepa 2022.
“I nia i te hoê roaraa e pae matahiti, e faaruru te tahi mau tuhaa fenua no Afirika i te paˈurâ rahi.”—UN News 26 no Atete 2022.
“E tupu te hoê paˈurâ rahi na te afaraa no Europa e peneiaˈe hoê o te paˈurâ rahi roa ˈˈe teie.”—BBC News 23 no Atete 2022.

E rave rahi aivanaa tei tohu e e tamau noa teie paˈurâ i te tupu e e ino roa ˈtu â te reira. E nehenehe anei tatou e tiaturi e e maitai mai te oraraa a muri aˈe? Eaha ta te Bibilia e parau ra?

Te paˈurâ e te mau parau tohu Bibilia

Ua tohu te Bibilia no to tatou nei tau:

“E tupu . . . i tera e tera vahi te oˈe.”—Luka 21:11.

Pinepine, no te paˈurâ e faaruru te taata i te oˈe. Te haapapu ra teie mau tupuraa mai te oˈe, te mauiui e te pohe e te tupu ra te parau tohu a te Bibilia.—Apokalupo 6:6, 8.

No te aha te paˈurâ i rahi roa ˈi?

Te horoa ra te Bibilia i te hoê tumu papu i rahi roa ˈi te paˈurâ. Te faataa ra te reira:

“Aita e tiaraa to te taata e haere ra ia aratai i to ˈna mau taahiraa.”—Ieremia 10:23.

Te auraa, aita e haere i te taata “ia aratai i to [ratou] mau taahiraa” aore ra ia faatere ia ratou. No ta ratou mau faaotiraa tano ore e faaruru ai te taata i te paˈurâ e e ere ai vetahi i te pape.

Mea rahi o te mau aivanaa e parau ra e o te taata te tumu o te maraaraa o te veavea e no ratou atoa i rahi roa ˈi te paˈurâ na te ao atoa nei.
No te nounou e no te faatereraa a te taata ma te haapao noa ia ratou iho, i ino roa ˈi te mau uru raau, te natura e te fenua. Ei faahopearaa, ua iti atoa mai te pape i nia i te fenua.

Tera râ, te horoa mai ra te Bibilia i te hoê tiaturiraa.

E maitai mai anei te oraraa a muri aˈe?

Te fafau ra te Bibilia e e fatata roa te Atua i te faaafaro i te fifi mai te ereraa i te pape. E nafea?

1. E “haamou [te Atua] i te feia e tuino ra i te fenua.” (Apokalupo 11:18) E haamou oia i te feia ino e te feia nounou, o ratou hoi te tumu i ere ai te taata i te pape e i ino roa ˈi te fenua.—Timoteo 2, 3:1, 2.
2. “E riro te fenua tei mǎrô no te âhu ei pape hopuna î i te opaero.” (Isaia 35:1, 6, 7) E faaore roa te Atua i te mau fifi ta te paˈurâ i faatupu e e faariro o ˈna i te fenua ei paradaiso.
3. “Te haapao nei oe i te fenua, ma te faahotu e te faaruperupe ia ˈna.” (Salamo 65:9) Maoti te haamaitairaa a te Atua e fanaˈo ai te taata atoa i te maa maitatai e te pape.