Te tuinoraa i te fenua: Eaha ta te Bibilia e parau ra?

“Ua ati mau â te natura. E poi te mau oire rahi i te pape. E faaruru te fenua taatoa i te veavea rahi e te âhu, te vero riaria mau e te ereraa i te pape na tera e tera fenua. E mirioni animara e tiare te morohi. E ere teie no roto mai i te hoê hohoˈa teata. O ta te mau aivanaa râ e parau e e tupu ia na reira noa tatou i te tuino i te fenua.”—Oreroraa parau a António Guterres, e tia mana no te Hau amui, i te hoê apooraa nunaa rau no nia i te parururaa i te natura tei tupu i te 4 no Eperera 2022.

“Te faaara mai ra te mau aivanaa e, i te mau matahiti i mua nei, e mou roa e 423 aua rahi tuiroo i Marite noa, o te fifi hanoa ia veaveahia. Te rahiraa ati e tiai ra ia tatou, e au ra ïa i te mau ati i roto i te Bibilia: te auahi e te diluvi, te taheraa o te pape paari i te poro o te fenua, te maraaraa o te miti e te âhu rahi.”—“Te ûa rahi i Yellowstone, e tapao no te hoê ati i mua nei,” The New York Times, 15 no Tiunu 2022.

E nehenehe anei e faatitiaifaro i te mau fifi natura? Mai te peu e e, na vai ïa? A hiˈo na eaha ta te Bibilia e parau ra.

Ua tohuhia e tupu te fifi natura

Te parau ra te Bibilia e fatata te Atua i “te haamou i te feia e tuino ra i te fenua.” (Apokalupo 11:18) E toru manaˈo ta teie irava e faataa mai ra:

1. 1. E noaa iho â i te taata ia tuino i te fenua.

2. 2. E tae i te hoê mahana, e ore tera tuinoraa.

3. 3. E ere na te taata, na te Atua râ e faatitiaifaro i te mau fifi natura.

E ore roa te fenua e mou

Te parau ra te Bibilia e ‘e vai noa te fenua e a muri noa ˈtu.’ (Koheleta 1:4) E parahi-noa-hia te fenua e te taata.

• “E fatu te feia parau-tia i te fenua, e e parahi ratou i nia iho e a muri noa ˈtu.”—Salamo 37:29.

E ore roa te mau fifi natura e e maitai mai te fenua.

• “E oaoa roa te medebara e te fenua mǎrô, e e oaoa te vahi papu pâpâmǎrô e e uaa mai te tiare.”—Isaia 35:1.