A tiaturi i te Arii hau ê o te ao taatoa

1. Eaha ta Ioba i faaruru?

MEA huru rahi ta Ioba, hoê taata faaroo puai, i faaruru. Ua pohe ta ˈna mau tamarii, ta ˈna mau animara e ta ˈna mau tavini. Ua roohia o ˈna i te maˈi mauiui. Ino roa ˈtura ïa to ˈna roo. To ˈna mau “hoa” tei haere mai e hiˈo ia ˈna, aita ïa i tamahanahana ia ˈna. E no to ˈna mamae, ua parau roa ˈtu ta ˈna vahine here ia ˈna ia “faaino i te Atua a pohe atu ai.” (Ioba 2:9; 15:4, 5; 19:1-3) Ua nehenehe hoi teie mau ati e faaiti mai i to Ioba tiaturi i te Atua mau, a manaˈo atu ai o ˈna eita Iehova e paruru i te feia e here ra e e tavini ra ia ˈna.

2-3. Eaha te manaˈo e puta mai ia û tatou i te fifi, e eaha ta tatou e haapii mai i roto i te buka a Ioba?

² E û atoa tatou i te fifi o te nehenehe e faaiti mai i to tatou tiaturi ia Iehova. E “tau ino mau” hoi ta tatou e ora nei e “te fifi ia faaruru.” (Tim. 2, 3:1) Ia tairi mai tera e tera fifi, e tahua roa paha tatou a ore atu ai e haere faahou ia faaoromai. No reira hoi vetahi e manaˈo ai aita Iehova e tâuˈa mai ra ia ratou.

³ Mai te peu tera atoa to oe manaˈo, eiaha oe e haapeapea. Ua haapii mai Ioba eita roa ˈtu Iehova e faarue i ta ˈna mau tavini taiva ore. E nehenehe atoa oe e haapii i te tiaturi hope roa i to tatou Metua i te raˈi. E nafea ïa? E hiˈo mai tatou e piti manaˈo faufaa roa i roto i te buka a Ioba: A tahi, o Iehova anaˈe te Arii hau ê o te ao taatoa. A piti, e mana to Iehova no te faatupu i ta ˈna opuaraa, e e paruru o ˈna i to ˈna nunaa ma te tauturu atu ia piri noa ratou ia ˈna.

UA TIA ATOA MAI SATANI I MUA IA IEHOVA

4. O vai tei tia atoa mai i te rururaa te mau melahi i mua ia Iehova?

⁴ I te hoê mahana, ua ruru mai “te mau tamaiti a te Atua mau” ra o Iehova i mua ia ˈna. “Tomo atoa maira Satani i rotopu ia ratou,” ta te Bibilia atoa ïa e parau ra. (Ioba 1:6) A tahi ra te Bibilia a faahiti ai i te iˈoa “Satani,” aore ra “Patoi” ia Iehova. Ua vaiiho râ Iehova ia ˈna ia tia atoa mai i tera rururaa, noa ˈtu ua taiva o ˈna. E enemi hoi o ˈna no Iehova, no te mau melahi taiva ore, e no te taatoaraa o te taata haapao maitai. Mai ta Iehova i faahiti i te Genese 3:15, aita faahou Satani i roto i to Iehova utuafare i te raˈi, oia hoi ta ˈna mau melahi. O ratou hoi te “vahine” o te fanau mai i te “huaai.”

5. Eaha ta tatou e haapii mai i tei parauhia i tera rururaa i te raˈi?

⁵ Ua haapapai Iehova i roto i te Bibilia i ta ˈna i parau i tera rururaa i te raˈi. No te aha? No te faaite mai ïa e pari haavare ino roa Satani, ia au noa iho â i ta Satani i faahiti. (Ioba 1:9; a hiˈo atoa i te Apokalupo 12:10.) No te haapapu mai e faaohipa noa Iehova i to ˈna mana otia ore ma te parau-tia e ma te afaro. E no te haapii mai e haamau te Manahope i te otia i ta vetahi ê e nehenehe e rave.

UA HAAMAU IEHOVA I TE OTIA

6. Mea nafea to Iehova faaiteraa na ˈna e faaoti i te tereraa o teie rururaa? (Ioba 1:7, 8)

⁶ A taio i te Ioba 1:7, 8. Ua faaite Iehova e na ˈna e faaoti i te tereraa o teie rururaa. Teie hoi ta ˈna i ui ia Satani: “Ua tapao anei oe i ta ˈu tavini o Ioba?” Ua ite maitai Iehova te hinaaro ra Satani e tairi i ta ˈna tavini taiva ore ra o Ioba. E faaohipa râ o ˈna i to ˈna mana hau ê no te tauturu ia Ioba. E hiˈo mai ïa tatou mea nafea.

7. Ia au i te Ioba 1:10, 11, no Satani, eaha te tumu e haamori ai te taata ia Iehova?

⁷ A taio i te Ioba 1:10, 11. O Iehova te Arii hau ê o te ao taatoa, e e faaohipa o ˈna i to ˈna mana i te taime tano e ma te tano. (Ier. 32:17; Dan. 4:35) No Satani râ, e ere mea afaro ta Iehova huru faaohiparaa i to ˈna mana. Ua parau hoi o ˈna e horoa te Atua i te mau mea maitatai na te taata, mai ia Ioba, ia haamori ratou ia ˈna. Ua parau atoa o ˈna te haamori nei ta Iehova mau tavini ia ˈna, no te fanaˈo noa i ta ˈna mau haamaitairaa. Eaha ïa ta Iehova i rave i mua i teie mau faahaparaa?

8-9. Eaha te otia ta Iehova i haamau no Satani, e no te aha? (Ioba 1:22) (A hiˈo atoa i te hohoˈa.)

⁸ A taio i te Ioba 1:12. Ua vaiiho Iehova i te Diabolo ia haapapu i ta ˈna i parau, i roto noa râ i te otia haamauhia e Iehova. Inaha, ua parau roa o ˈna ia Satani: “Eiaha . . . oe e hauti ia [Ioba]!” Pauroa te melahi i tera rururaa tei faaroo i teie opaniraa a Iehova. Aita e ravea, ia auraro iho â ïa Satani. Aita hoi e mana to ˈna no te na nia ˈˈe i tera faaueraa. Ua taotiahia ta ˈna e nehenehe e rave i nia ia Ioba. Mai tera atoa i teie mahana. Ta Iehova e vaiiho ia Satani ia rave, tera anaˈe ta ˈna e nehenehe e rave. Ua faaohipa ïa Iehova i to ˈna mana hau ê no te paruru ia Ioba e no te faaite e Atua î i te here o ˈna e te parau-tia.

⁹ Aita roa ˈtu ta Satani mau raveraa i manuïa. Noa ˈtu eaha ta ˈna i rave i nia ia Ioba, aita Ioba i taiva i to ˈna Metua i te raˈi. (Ioba 1:22) Ua ite râ Iehova eita Satani e tuu, e tairi faahou o ˈna ia Ioba.

10. No te aha Iehova i vaiiho ai ia Satani ia tairi â ia Ioba? (Ioba 2:2-6)

¹⁰ A taio i te Ioba 2:2-6. Puai tera hinaaro to Satani ia fati Ioba. Ua parau hoi o ˈna e faaino Ioba ia Iehova ia ora mai o ˈna. Vaiiho atura ïa Iehova ia ˈna ia tairi i taua taata taiva ore ra i te maˈi rahi no te haapapu ua hape Satani. I ǒ nei â, ua haamau Iehova i te otia. Teie ta ˈna i faaue: “Eiaha . . . e rave i to ˈna ora!” Aita e ravea, ia auraro iho â ïa Satani. Te ite faahou ra ïa tatou o Iehova iho â te Faatere hau ê. Inaha aita hoi e mana to Satani no te na nia ˈˈe i te otia ta Iehova i haamau i ta ˈna e nehenehe e rave.

UA FAAORE IEHOVA I TE ATI O IOBA

11. I to Iehova faaoreraa i te ati o Ioba, eaha te mau haamaitairaa ta ˈna i horoa na ˈna? (Ioba 42:10-13)

¹¹ A taio i te Ioba 42:10-13. I to Ioba haapapuraa eita roa ˈtu o ˈna e fati, aita ˈtura Iehova i vaiiho faahou ia Satani ia tairi ia Ioba. Faaore ihora Iehova i te ati o ta ˈna tavini taiva ore. I ǒ nei atoa, aita e mana to Satani no te tapea ia Iehova ia paruru e ia haamaitai ia Ioba ta ˈna tavini here.

12. A horoa i te hoê hiˈoraa o ta Iehova i rave no vetahi o ta ˈna mau tavini tei tiaturi e mana faaora to ˈna.

¹² I te mau mahana hopea, ua faaohipa Iehova i to ˈna mana no te tauturu e rave rahi tavini ta ˈna. Ei hiˈoraa, i 1945 i to te mau Nazi opuaraa e haapohe 230 Ite no Iehova ma te faahaere ia ratou mai to ratou aua haavîraa tae roa i tatahi, mea atea hoi e mea atâta roa, ua ora mai ratou pauroa. I roto i te hoê faaotiraa ta ratou i papai no nia i ta ratou i faaruru, teie ta ratou i parau: “I teie nei, to muri ia matou tera tau tamataraa fifi roa ino. E te feia tei faahereherehia, tei haruhia mai roto mai i te umu auahi ei auraa parau, aita te hauˈa auahi i mau noa ˈˈe i nia ia ratou. . . . Ua î râ ratou i te puai e te mana o Iehova.” Ua parau atoa ratou: “Hoê noa mea ta matou e hinaaro, . . . [i muri iho] i to matou vairaa i roto i te apoo liona, te neheneheraa ïa e tavini ia Iehova . . . a muri noa ˈtu. Tera ta matou haamaitairaa rahi roa ˈˈe.”—A hiˈo atoa i te Daniela 3:27; 6:22.

13. Ia papu ia tatou te aha ia û tatou i te fifi? (A hiˈo atoa i te hohoˈa.)

¹³ E û atoa paha tatou i te fifi iti rahi mai te huru ra ua taorahia tatou i roto i te apoo liona. (Pet. 1, 5:8-10) I te tahi taime, e tahua roa tatou a manaˈo atu ai eita roa ˈtu to tatou mau fifi e ore. I roto i tera tupuraa, e haamanaˈo anaˈe i ta Ioba i faaruru. Ia papu maitai ia tatou e mana to Iehova no te faaore i to tatou mauiui i teie nei â aore ra i roto i te paradaiso. Eita o ˈna e vaiiho noa i teie ao ino, ua faataa hoi o ˈna i te taime e haamou ai oia i te reira.

MEA HERE NA IEHOVA I TA ˈNA MAU TAVINI TAIVA ORE

14-15. Eaha ta Iehova e hinaaro no ta ˈna mau tavini taiva ore? (Ioba 14:15) (A hiˈo atoa i te hohoˈa.)

¹⁴ A taio i te Ioba 14:15. Mea faufaa roa no to tatou Metua i te raˈi ta ˈna mau tavini taiva ore, e mea here roa na ˈna ia ratou. Ia pohe noa ˈtu ratou e faahoˈi mai Iehova ia ratou i te ora. Auê ïa oaoa ia faatiahia mai ratou i roto i te paradaiso!—Isa. 65:17.

¹⁵ I muri mai atoa te oreraa to ˈna mau ati, ua ora â Ioba i roto i te ao ino a Satani. Ia au râ i te Bibilia, ua faaora Iehova i to ˈna maˈi e ua tataipiti oia i ta ˈna faufaa. I roto i te paradaiso, mea rahi atu â te haamaitairaa ta Iehova e horoa na Ioba. Ua faaite Iehova e hinaaro o ˈna ia fanaˈo ta ˈna mau tavini taiva ore i te oaoa rahi. Inaha, e haamaitai o ˈna te taata tei vai taiva ore ia ˈna, a fanaˈo atu ai ratou pauroa i te ora mure ore i te fenua nei faarirohia ei paradaiso. (Apo. 21:3, 4) O ˈna hoi te Arii hau ê o te ao taatoa e tera ta ˈna e hinaaro no ta ˈna mau tavini. Ia û tatou i te fifi e tamahanahana mai ïa teie manaˈo ia tatou.

16. No te aha atoa e tiaturi ai o Iehova te Arii hau ê?

¹⁶ I muri iho e rave rahi matahiti, pohe ihora Ioba. E mana râ to Iehova no te faahoˈi mai ia ˈna i te ora. O ˈna hoi te Arii hau ê e te Manahope. (Deut. 32:39) Eita hoê aˈe taata te nehenehe e tapea ia ˈna ia faatia faahou mai to ˈna mau taata here. E tupu te reira i te taime iho â ta ˈna i faataa.—Roma 8:38, 39.

A TIATURI ROA IA IEHOVA

17. Eaha te haapapuraa eita e haere ia Satani ia haamou i ta Iehova mau tavini?

¹⁷ Ua haapii mai tatou i te buka a Ioba e rave rahi tumu e tiaturi roa ˈi tatou ia Iehova. Mauruuru roa tatou ia ˈna, no te mea aita o ˈna i vaiiho ia Satani ia haamou i ta ˈna mau tavini. Ua ite tatou o ˈna te Arii hau ê. Inaha, fatata e iva mirioni taata teie e tavini nei ia ˈna ma te taiva ore. Pau te rave a te mau hau faatere e te mau tia faaroo etaeta, aita i mau te haamoriraa ia Iehova e te pororaa i te parau apî oaoa. Ua tauturu hoi Iehova i ta ˈna mau tavini. (Isa. 54:17) E ite iho â te taata o Iehova te Atua mau, o Satani râ, e haavare ïa e e taparahi taata. E ia pohe noa ˈtu tatou, e faatia faahou mai Iehova i te taata atoa tei vai taiva ore ia ˈna.—Hos. 13:14.

18. No te aha eiaha tatou e riaria no te mau mea e tupu i mua nei?

¹⁸ A feruriruri ai tatou i te aamu o Ioba, e puai atu â to tatou tiaturi e tauturu mai iho â Iehova i roto i te mau tupuraa atoa. I te roaraa o te ati rahi, e manaˈo Satani e ta ˈna mau nuu mea ohie roa ia tairi i te nunaa o te Atua. Ua hape râ ratou. E faaohipa Iehova i to ˈna mana hope mai ta ˈna i na reira no Ioba. Eita o ˈna e vaiiho ia Satani ia haamou i to ˈna nunaa. Fatata roa hoi o ˈna i te faaore i te mauiui o te huitaata, o Satani hoi te tumu. E huri o ˈna ia Satani e ta ˈna mau demoni i roto i te abuso 1 000 matahiti. (Luka 8:31; Apo. 20:1-3) I muri mai, e mou roa Satani e pauroa te mau orure hau, mai ta Iehova iho â i parau.—Gen. 3:15; Roma 16:20; Apo. 20:10.

19. E nafea Iehova e haamaitai ai i te feia e tiaturi roa ia ˈna? (A hiˈo atoa i te hohoˈa.)

¹⁹ Te tiai ru nei tatou i te ao apî i reira tatou e riro ai ei taata tia roa e te oaoa. E fanaˈo ïa tatou i te hoê oraraa hope te faahiahia mai ta tatou i ore i fanaˈo aˈenei. Ua fafau hoi Iehova: “Inaha, te faaapî nei au i te mau mea atoa.” (Apo. 21:5) Eaha to ˈna auraa? A tahi ra ïa te huitaata e ora mai ai i te mau raveraa ino a Satani e ta ˈna mau demoni. I vai noa na hoi teie ao i raro aˈe i te mana o te varua ino e tausani matahiti. A feruri na ïa, eita oe e haapeapea faahou no te tahi noa ˈˈe ohipa, topa maitai ïa te taoto. E ite mata roa te feia e ora ˈtu i Aramagedo e rave rahi semeio. Inaha e ora te maˈi. E faatiahia mai te feia herehia. Ua tae te taime e fanaˈo ai tatou i te ora mau ta Iehova i hinaaro noa na no tatou.

20. Ia faaoti papu oe i te aha?

²⁰ A faaruru noa ˈi i te mau fifi ma te itoito, e faaoti papu anaˈe i te tiaturi ia Iehova e i te paturu i to ˈna mana arii. E faaite anaˈe i to tatou here ia ˈna a haapapu atu ai e haavare Satani. Hau atu, e hiˈo anaˈe i to tatou a muri aˈe ma te taiâ ore. Inaha, e ora tatou i raro aˈe i te faatereraa a Iehova, te Arii hau ê o te ao taatoa o te tiai ru nei i te haamaitai i ta ˈna mau tavini.