E tauturu te buka a Ioba ia oe i roto i te mauiui

1-2. Eaha te tahi mau tumu mea faufaa ia taio tatou i te buka a Ioba?

PENEIAˈE ua taio oe i te buka a Ioba aita i maoro aˈenei. Hoê teie o te mau buka faahiahia roa ˈˈe noa ˈtu ua papaihia piri i te 3 500 matahiti i teie nei. E faahiahia te taata i teie buka no te mea mea ohie ia taa, mea nehenehe te huru papairaa e mea puai te mau haapiiraa i roto. Parau mau, na Mose i papai i tera buka, na Iehova râ i haapapai ia ˈna.—Tim. 2, 3:16.

² E buka faufaa roa teie i roto i te Bibilia. No te mea e taa ia tatou no te aha te mau melahi e te taata e faaoti ai e haamoˈa i te iˈoa o Iehova. E ite atoa mai tatou i te mau huru maitatai faahiahia o Iehova mai to ˈna here, to ˈna paari, ta ˈna parau-tia e to ˈna puai. Ei hiˈoraa, i roto i te buka a Ioba ua faahitihia Iehova ei “Manahope” 31 taime. E pahono atoa teie buka e rave rahi uiraa, mai teie: No te aha te Atua e vaiiho noa ˈi i te mauiui?

3. Eaha ta tatou e haapii mai i te buka a Ioba?

³ E nehenehe tatou e faaau i te taioraa i te buka a Ioba i te paumaraa i nia i te mouˈa. Mai nia mai, e ite maitai tatou i raro e ati aˈe ia tatou. No reira, ia taio tatou i tera buka e ite tatou i to Iehova manaˈo no nia i to tatou mauiui. E ite atoa tatou i te haapiiraa ta te ati Iseraela i nehenehe e huti mai i te aamu o Ioba. O tatou atoa te faufaahia i te reira. E ite atoa tatou e nafea ia faaohipa i teie buka a Ioba no te tauturu ia vetahi ê.

UA VAIIHO TE ATUA IA IOBA IA MAUIUI

4. Eaha te taa-ê-raa i rotopu ia Ioba e te ati Iseraela i Aiphiti?

⁴ I ora na Ioba i te fenua o Uza, aita i atea roa ia Arabia. I tera taime, te faatîtîhia ra te nunaa Iseraela i Aiphiti. Ua haamori vetahi o ratou i te mau idolo i Aiphiti. O Ioba râ, aita ïa. Ua vai taiva ore o ˈna ia Iehova. (Ios. 24:14; Ezk. 20:8) Inaha ua parau hoi Iehova no Ioba: “Aita e taata mai ia ˈna i nia i te fenua.”a (Ioba 1:8) Mea rahi hoi ta Ioba faufaa. I tera ra tau, o ˈna te taata rahi roa ˈˈe i hitia o te râ. (Ioba 1:3) Eita e ore, ua riri roa Satani a ite ai i teie taata taoˈa rahi e tavini ra i te Atua ma te taiva ore.

5. No te aha Iehova i vaiiho ai ia mauiui Ioba? (Ioba 1:20-22; 2:9, 10)

⁵ Ua parau Satani e faarue Ioba ia Iehova ia faaruru o ˈna i te fifi. (Ioba 1:7-11; 2:2-5) Mea here roa iho â na Iehova ia Ioba. Tera râ, ua vaiiho Iehova ia Satani ia haapapu e parau mau iho â anei ta ˈna i parau no Ioba aore ra eita. (Ioba 1:12-19; 2:6-8) Tairi ihora ïa Satani ta Ioba mau nǎnǎ, ta ˈna na ahuru tamarii e ia Ioba i te fêfê mauiui mau mai to ˈna avae tae roa i to ˈna upoo. Noa ˈtu râ, aita Ioba i taiva noa ˈˈe. (A taio i te Ioba 1:20-22; 2:9, 10.) E haapiiraa atoa no tatou to ˈna aamu. I muri aˈe, ua faaora Iehova i to ˈna maˈi, ua horoa na ˈna i te faufaa rahi atu â, te roo maitai, e ahuru â tamarii. Ua horoa semeio Iehova na Ioba 140 â matahiti, e ua ite oia i ta ˈna mau tamarii e to ratou huaai, e maha uˈi. (Ioba 42:10-13, 16) Mea nafea teie aamu i te tautururaa i tei ora na i tahito ra, e nafea atoa tatou e faufaahia ˈi i teie mahana?

6. Ua nehenehe te aamu o Ioba e tauturu i te ati Iseraela. A faataa na. (A hiˈo atoa i te hohoˈa.)

⁶ Te haapiiraa no te ati Iseraela. Mea mauiui roa te oraraa o te ati Iseraela i Aiphiti, mai ia Iosua raua Kaleba tei haavîhia mai to raua apîraa mai â. I muri iho noa ˈtu aita ta raua e hara, ua overe atoa raua na te medebara 40 matahiti no te faaroo ore o te nunaa. Ua nehenehe hoi te aamu o Ioba e tauturu i te ati Iseraela e to muri mai uˈi. Inaha, e taa ïa ia ratou o vai mau na te tumu o te mau mauiui. E taa atoa ia ratou no te aha te Atua e vaiiho ai i te taata ia mauiui, e mea here na ˈna te feia o te tapea i to ratou taiva ore.

7-8. E nafea te aamu o Ioba e tauturu ai i te feia e mauiui ra? A faatia na i te tahi tupuraa.

⁷ Te haapiiraa no tatou. Mea rahi i teie mahana aita e tiaturi faahou ra i te Atua. Aita hoi ratou e taa ra no te aha te taata maitai e roohia ˈi i te ati. A hiˈo na ia Hazelb hoê potii no Rwanda. Mea tiaturi roa o ˈna i te Atua i to ˈna apîraa. Ua taui râ i muri iho. Ua taa to ˈna na metua, faaea mai nei to ˈna mama i te tahi atu tane mea ino roa i nia ia Hazel. I to ˈna taurearearaa, ua maferahia o ˈna. Ua imi Hazel i te tamahanahanaraa i te pureraa, aita râ hoê aˈe. I muri mai, ua papai o ˈna i te hoê rata i te Atua. Ua na ô o ˈna: “Te Atua e, i pure noa na vau ia oe, e ua tutava noa vau i te rave i te mea maitai, tera ïa ta oe faahoˈiraa! Eita vau e haapao faahou ia oe. E haapao noa vau ia ˈu i teie nei, na ˈu e imi i to ˈu oaoa.” Maui roa tatou no teie mau taata mai ia Hazel, no te mea te manaˈo nei ratou o te Atua te tumu o to ratou mau ati.

⁸ O tatou râ, ua haapii mai tatou i roto i te buka a Ioba, o Satani te tumu o te mau mauiui e ere te Atua. Ua haapii atoa tatou ia roohia te taata i te ati, e ere te auraa ua rave ratou i te ohipa ino. E roohia tatou pauroa i “te taime e te tupuraa manaˈo-ore-hia.” (Koh. 9:11; Ioba 4:1, 8) Ua ite atoa tatou e maoti to tatou taiva ore i roto i te fifi, e nehenehe Iehova e pahono ia Satani o te faatihaehae ra ia ˈna. E paturu ïa tatou i te roo o Iehova. (Ioba 2:3; Mas. 27:11) Eiaha ïa tatou e haafaufaa ore i teie mau haapiiraa. Auaˈe hoi te reira i ite ai tatou te parau mau no nia i te tumu e mauiui ai tatou e te feia herehia. Ua taa atoa ia Hazel te reira i to ˈna haapiiraa i te Bibilia e te mau Ite no Iehova. Papu atura ia ˈna e ere te Atua te tumu o to ˈna mau ati. Te na ô ra oia: “Ua pure faahou vau i te Atua ma to ˈu aau atoa. Ua parau vau ia Iehova e ia ˈu i parau eita vau e haapao faahou ia ˈna, e parau noa. I tera taime, aita hoi au i matau maitai ia ˈna. Teie nei, oaoa iti rahi to ˈu, inaha ua taa ia ˈu mea here na Iehova ia ˈu.” Mauruuru atoa tatou ia Iehova i te faaiteraa mai no te aha o ˈna e vaiiho ai i te mauiui. E hiˈo tatou i teie nei e nafea tatou tataitahi e faufaahia ˈi i te aamu o Ioba.

E TAUTURU MAI TE AAMU O IOBA IA FAAOROMAI TAMAU

9. Ia feruri outou ia Ioba, eaha te puta mai? (Iakobo 5:11)

⁹ A feruri na i te mauiui iti rahi o Ioba. Te parahi noa ra o ˈna i roto i te rehu, e fêfê anaˈe to nia i to ˈna tino. Ua ino roa e mataratara hanoa to ˈna iri e ua pararai roa o ˈna. No to ˈna paruparu, aita rea ohipa e maraa ia ˈna, e raˈuraˈu noa râ i to ˈna tino i te huˈahuˈa farii a autâ noa ˈi no te mauiui. Teie râ, e ere mea faaruru noa ta Ioba i teie mau ati to ˈna, mea faaoromai tamau râ o ˈna. (A taio i te Iakobo 5:11.) Na te aha i tauturu ia Ioba?

10. A faataa mai te aha te huru o te auhoaraa o Ioba raua Iehova.

¹⁰ Ua haamahora Ioba i to ˈna aau ia Iehova. (Ioba 10:1, 2; 16:20) Ei hiˈoraa, i te pene 3 ua autâ Ioba no to ˈna mau ati e ua manaˈo o ˈna o Iehova te tumu. I muri iho, a faahapa ˈi to ˈna mau hoa ia ˈna, ua pahono Ioba e aita o ˈna i rave noa ˈˈe i te hara. I tera taime, te faaite ra o ˈna i to ˈna manaˈo ia Iehova. Ia au atoa i ta ˈna mau parau, ua manaˈo o ˈna mea tia aˈe o ˈna ia Iehova. (Ioba 10:1-3; 32:1, 2; 35:1, 2) Noa ˈtu râ, ua faˈi Ioba e “parau feruri-ore-hia” tei matara mai i to ˈna vaha, no to ˈna hinaaro e haapapu aita ta ˈna e hara. (Ioba 6:3, 26) I te pene 31, ua hinaaro Ioba ia haapapu roa mai te Atua e aita iho â ta ˈna e hara. (Ioba 31:35) Parau mau, ua hape Ioba i te titauraa i te Atua ia faataa mai no te aha o ˈna i roohia ˈi i teie mau ati.

11. Mai te aha to Iehova huru i nia ia Ioba?

¹¹ Ia feruri tatou i ta Ioba mau parau, te taa ra ia tatou e mea piri roa raua Iehova, e ua ite te Atua e vai taiva ore o ˈna. I to Iehova pahonoraa mai na roto i te mataˈi vero, aita o ˈna i faataa ia Ioba te tumu o to ˈna mau ati. Aita atoa o ˈna i faahapa ia Ioba no to ˈna autâraa e parauraa aita ta ˈna e hara. Ua haapii râ Iehova ia ˈna mai te hoê papa e haapii i ta ˈna tamaiti. E tera iho â te raveraa tano. Inaha, ua farii Ioba ma te haehaa aita o ˈna i ite pauroa, e tatarahapa ˈtura o ˈna. (Ioba 31:6; 40:4, 5; 42:1-6) Eaha ïa te haapiiraa no ta Iehova mau tavini i tahito ra, e no tatou atoa i teie mahana?

12. Mea nafea Mose e te tahi atu ati Iseraela i te faufaaraahia i te aamu o Ioba?

¹² Te haapiiraa no te ati Iseraela. Te vai ra iho â te haapiiraa e huti mai i te hiˈoraa o Ioba. A hiˈo na ia Mose. Mea rahi ta ˈna i faaruru a aratai ai i te nunaa Iseraela. Hopea ore ratou i te amuamu ia Iehova. O Mose râ, ua haamahora ïa i to ˈna aau ia Iehova. (Exo. 16:6-8; Num. 11:10-14; 14:1-4, 11; 16:41, 49; 17:5) Ua titau-atoa-hia ia faaoromai tamau Mose i to Iehova aˈoraa ia ˈna. Ei hiˈoraa, a puhapa ˈi te nunaa i Kadesa, i te 40raa matahiti overeraa na te medebara, ua paraparau Mose “ma te feruri ore” e aita o ˈna i faahanahana ia Iehova. (Sal. 106:32, 33) Aita ˈtura ïa o Iehova i faatia ia tomo Mose i te Fenua tǎpǔhia. (Deut. 32:50-52) Eita e ore, ua mamae roa Mose. Noa ˈtu râ, ua farii o ˈna ma te haehaa i ta Iehova aˈo. Ua nehenehe atoa te aamu o Ioba e tauturu i to muri iho uˈi ia faaoromai tamau i te mau fifi ta ratou i faaruru. E ite ïa ratou e nafea ia pure hohonu ia Iehova, e no te aha eiaha e manaˈo mea tia aˈe ratou i te Atua. E taa atoa ia ratou te faufaaraa ia farii i te aˈo a Iehova ma te haehaa.

13. E nafea te aamu o Ioba e tauturu mai ai ia faaoromai tamau? (Hebera 10:36)

¹³ Te haapiiraa no tatou. Mea faufaa atoa ia faaoromai tamau tatou. (A taio i te Hebera 10:36.) Te faaruru nei hoi vetahi i te maˈi, te hepohepo, te fifi i roto i te utuafare, te oto ia pohe tei herehia e te vai ra ˈtu â. I te tahi taime, e maui roa ˈtu tatou no ta vetahi ê e parau mai aore ra no to ratou huru i nia ia tatou. (Mas. 12:18) Teie râ, te haapii mai ra te buka a Ioba eiaha e taiâ i te haamahora i to tatou aau ia Iehova, no te mea e faaroo mai iho â o ˈna. (Ioa. 1, 5:14) E mai te peu e “parau feruri-ore-hia” te matara mai, eita Iehova e riri mai. E horoa mai râ o ˈna i te puai e te paari ia faaoromai tamau tatou. (Par. 2, 16:9; Iak. 1:5) E faaafaro mai o ˈna ia tatou mai ta ˈna i rave i nia ia Ioba. E horoa mai o ˈna i te aˈoraa na roto i te Bibilia, ta ˈna faanahonahoraa e te mau hoa papu. (Heb. 12:5-7) Ua faufaahia Ioba i to ˈna fariiraa i te aˈoraa ma te haehaa. O tatou atoa ïa. (Kor. 2, 13:11) E haapiiraa faufaa mau ta tatou i apo mai. E hiˈo mai tatou i teie nei e nafea ia faaohipa i teie aamu no te tauturu ia vetahi ê.

A TAUTURU IA VETAHI Ê MAOTI TE BUKA A IOBA

14. Ia ui mai te taata eaha te tumu o te mauiui, eaha ta oe e pahono atu?

¹⁴ Peneiaˈe ua ui aˈena mai te taata ia oe no te aha tatou e mauiui ai. Mea nafea oe i te pahonoraa ˈtu? Ua faaite paha oe i ta te Bibilia e parau ra no nia i tei tupu i te ǒ i Edene. Ua parau Satani, te hoê melahi ino, ia Adamu raua Eva i te hoê haavare. Orure hau atura ïa raua i te Atua. (Gen. 3:1-6) Faataa ˈtura ïa oe e no to raua faaroo-ore-raa, roohia ˈtura te taata atoa i te mauiui e te pohe. (Roma 5:12) I muri iho, faataa ˈtura oe e ua vaiiho te Atua i te taime ia ite te taata e haavare Satani e ia faaroo ratou i te parau apî oaoa o te ora mure ore. (Apo. 21:3, 4) Mea tano roa ta oe pahonoraa, no te mea ua taa ia ratou i teie nei no te aha tatou e mauiui ai.

15. Ia ui mai te taata no nia i te tumu o te mau mauiui, e nafea oe ia faaohipa i te aamu o Ioba? (A hiˈo atoa i te hohoˈa.)

¹⁵ Teie te tahi atu pahonoraa. E nehenehe oe e haaferuri i te taata ma te faatia ˈtu i te aamu o Ioba. Na mua râ, a haapopou ia ˈna no ta ˈna uiraa. A faaite atu e ua faahiti atoa Ioba, hoê tavini taiva ore tei faaruru e rave rahi ati, i tera uiraa. Ua tae roa o ˈna i te manaˈo o te Atua te tumu o to ˈna mau ati. (Ioba 7:17-21) E maere paha ïa tera taata e ere no teie nei tera uiraa. I muri iho, e nehenehe oe e parau ia ˈna te haapapu ra te buka a Ioba e ere o te Atua te tumu o to Ioba mau ati, o Satani râ. E te fa a Satani, te haapapuraa ïa te haamori ra te taata i te Atua no ta ˈna noa mau haamaitairaa, e ere râ no to ratou here ia ˈna. Ua vaiiho râ te Atua ia Ioba ia mauiui. Tapao faaite ïa, ua papu ia ˈna te vai ra iho â te taata e tapea i to ratou taiva ore noa ˈtu te fifi. Tera te haapapuraa e haavare Satani. I te pae hopea, e nehenehe oe e faaite atu ua haamaitai te Atua ia Ioba no to ˈna taiva ore ia ˈna. No reira, e tamahanahana tatou i te taata ma te haapapu e ere o Iehova te tumu o to ratou mau ati.

16. A faatia na i te tahi tupuraa e faaite ra e tauturu iho â te aamu o Ioba i te taata.

¹⁶ E hiˈo mai tatou mea nafea te aamu o Ioba i te tautururaa ia Mario. I te hoê mahana i 2021, ua poro te hoê tuahine na roto i te niuniu paraparau. O Mario te taata matamua tei pahono mai, e ua taio atu o tuahine i te hoê irava. Faataa ˈtura tuahine e horoa mai te Atua i te hoê oraraa no a muri aˈe e te tahi tiaturiraa. E faaroo atoa o ˈna i ta tatou mau pure. Parau maira Mario e ua opua o ˈna e haapohe ia ˈna, taˈi mai nei te niuniu. Ua parau Mario: “Te tiaturi nei au i te Atua, i teie râ poipoi ua manaˈo vau e aita o ˈna e tâuˈa faahou ra ia ˈu.” No reira, i te piti o te aparauraa, ua faatia tuahine i te aamu o Ioba e ta ˈna i faaruru. Hinaaro atura Mario e taio i te taatoaraa o te buka a Ioba. Hapono atura tuahine i te tahi poroi e aratai ia ˈna i Te Bibilia, Huriraa o te ao apî i nia i te jw.org. Ei faahopearaa, ua farii Mario i te hoê haapiiraa Bibilia e ua oaoa roa o ˈna i te ite e Atua î i te here Iehova o te tâuˈa ra ia ˈna.

17. No te aha tatou e mauruuru roa ˈi ia Iehova no te buka a Ioba? (Ioba 34:12)

¹⁷ Papu maitai, mea puai iho â te Bibilia no te tauturu i te taata, te feia iho â râ e mauiui ra. (Heb. 4:12) Mauruuru roa tatou ia Iehova no to ˈna haapapairaa i te aamu o Ioba i roto i ta ˈna Parau, mai ta Ioba i ani. (Ioba 19:23, 24) “Papu maitai, eita te Atua e haa ma te ino,” ta te buka ïa a Ioba e haapii mai ra. (A taio i te Ioba 34:12.) Te haapii atoa mai ra tera buka no te aha te Atua e vaiiho ai i te mauiui e e nafea tatou ia faaoromai tamau. E nehenehe atoa tatou e faaohipa i tera buka no te tauturu ia vetahi ê. I to muri nei tumu parau, e ite mai tatou e nafea teie buka e tauturu mai ai ia horoa tatou i te aˈoraa.