ORARAA KERISETIANO
A ohipa amui no te poro i roto i te tuhaa fenua e rave rau reo
E anaanatae atu â te mau taata i te poroi no nia i te Faatereraa arii ia faaroo ratou i te reira na roto i to ratou iho reo. No reira paha i te Penetekose 33, ua faanaho Iehova i te ohipa ia nehenehe te “ati Iuda mǎtaˈu i te Atua no te mau fenua atoa” e faaroo i te parau apî oaoa na roto i to ratou “iho reo,” noa ˈtu ua ite ratou i te reo paraparau-rahi-hia mai te reo Hebera aore ra Heleni. (Ohi 2:5, 8) I teie mahana, i te fenua e rave rau reo te paraparauhia ra, te vai ra te mau amuiraa e faatupu ra i te mau putuputuraa na roto i te mau reo ê. Peneiaˈe te poro ra ratou i roto i te hoê â tuhaa fenua, i te hoê â taime aore ra ma te pinepine. E nehenehe te taata e riri mai. E nafea ïa te feia poro o taua mau amuiraa ra e ohipa amui ai no te poro ma te ore e haafifi i te mau taata o te tuhaa fenua?
A faanaho (Mas 15:22): E titauhia i te mau tiaau no te taviniraa ia putuputu e ia haamau i te hoê faanahoraa maitai no te poro i roto i taua mau tuhaa fenua ra. Mai te peu mea nainai ta ratou tapura fenua, e hinaaro paha te tahi mau amuiraa e reo ê to ratou ia ore outou e poro i te mau fare o ta ratou iho tapura fenua. Tera râ, aita paha ratou e nehenehe e poro tamau i roto i te taatoaraa o ta ratou tuhaa fenua no te mea mea aano te reira e ua purara te mau fare. E hinaaro paha ïa ratou ia poro outou i te fare o ta ratou tapura fenua e ia faaara ˈtu mai te peu te vai ra o te paraparau ra i te reo ê e o te anaanatae ra. (od-F 93-94 par. 37) Aore ra e ani paha ratou i te tauturu a ta outou amuiraa no te imi i te feia e paraparau ra na roto i to ratou reo e ia faaite mai eaha to ratou vahi nohoraa. (km 7/12 5, tumu parau tarenihia) A haamanaˈo e nehenehe te mau taata o te hoê noa fare e paraparau e rave rau reo. Ia tu râ te mau faanahoraa ravehia no te poro i roto i te tuhaa fenua i te mau ture no te ore e faaite haere i te mau haamaramaramaraa no nia i te taata.
A ohipa amui (Eph 4:16): A pee maite i te mau faaueraa atoa ta te tiaau no te taviniraa e horoa. Te faatere ra anei oe i te hoê haapiiraa Bibilia e te hoê taata mea au aˈe na ˈna e haapii mai na roto i te reo o te tahi atu amuiraa? Mea au aˈe ïa na te tahi taata poro o te hoê amuiraa aore ra pǔpǔ e paraparau ra i te reo o te piahi e faatere i te haapiiraa. E haere oioi aˈe paha oia i mua i te pae varua.
A faaineine (Mas 15:28; 16:1): Mai te peu i roto i ta oe tuhaa fenua, e farerei oe i te hoê taata e paraparau ra i te tahi atu reo, a rave i ta oe e nehenehe no te faaite atu i te parau apî oaoa. A faaineine ia oe ma te feruri na mua ˈtu eaha paha te reo ta te taata e paraparau i roto i te tapura fenua. A rave mai i te mau huriraa Bibilia e video i nia i ta oe matini roro uira afaifai. A faaohipa i te ravea roro uira JW Language no te haapii mai e nafea ia aroha i te taata na roto i te tahi atu reo.