E nafea ia poro maoti te vairaa papai?

E ravea pororaa maitai roa te vairaa papai afaifai aore ra te iri vairaa papai. Te tauturu rahi nei te reira ia faatae i te taata aau haavare ore i te parau mau. (Ioa. 6:44) No reira te mau matahiapo i faaitoitohia ˈi ia faanaho i te pororaa i te mau tuhaa fenua o ta ratou amuiraa mea rahi te taata te hahaere. I te mea e mea afaifai teie mau vairaa papai, aita e faufaa ia ani i te parau faatia a te feia mana i te rahiraa o te taime. O vai te nehenehe e apiti atu? Te feia poro o te faaite ra i te tura, i te huru feruriraa e tano e o tei ite maitai i te paraparau. Eaha te rave e eaha te ore e rave? Teie te tahi mau aratairaa te tauturu atu.

Eaha te rave?

A faaite i te auhoaraa, i te farii maitai e a tauturu i te feia e na pihai iho mai. E mata ataata to vetahi feia poro a aroha ˈtu ai i te taata ma te auhoa. Ia hiˈo mai hoê i te vairaa papai, e parau paha oe: “E nehenehe oe e rave i ta oe e hinaaro.”
A faaatea rii ia oe i te vairaa papai. Te parau nei te feia poro i te tahi mau vahi e mea rahi te taata te haere mai a na reira ˈi. No te tahi atu, aita ïa, ua ite ratou i te feaaraa o te taata. E faaatea atu â ïa teie feia poro ia ratou a tiai atu ai i te taata ia haere mai i te vairaa papai. Ia na reira te hoê taata, a tamata i te paraparau ia ˈna ma te ui atu paha: “Ua feruri aˈena anei oe i teie uiraa?”
A faaohipa pinepine i te Bibilia ia nehenehe.
A faataa i te tereraa o te hoê haapiiraa Bibilia i te taata atoa o te rave i te hoê papai haapiiraa, mai te buka Bibilia haapii. A faaite atoa ˈtu i te video No te aha e haapii ai i te Bibilia?
Ia nehenehe, a ani atu i te feia tei faaite i te anaanatae e nafea ia farerei faahou ia ratou. Mai te peu e aita ratou e ora ra i roto i ta oe tuhaa fenua, a faaî i te api parau Veuillez suivre l’intérêt (S-43) ta oe e horoa oioi i te papai parau o te amuiraa.