Hoê ravea apî faahiahia no te poro i te vahi taata
1. Eaha tei faaitoitohia i te mau amuiraa e vahi o te oire e haere rahi ai te taata i roto i te tuhaa fenua?
1 Te vai ra te tahi amuiraa e vahi o te oire e haere rahi ai te taata i roto i te tuhaa fenua. Ua faaitoitohia ratou ia faanaho i te pororaa ma te faaohipa i te mau iri e vairaa vea turairai. E mea titauhia ia vai noa hoê taata poro i pihai iho i te vairaa vea turairai. I te iri râ, e piti ïa taata poro. E mea tia ia faaite ratou i te huru mahanahana, auhoa e farii maitai. Ia anaanatae te tahi taata i te mau papai e vai ra i nia i te iri aore ra vairaa vea turairai, e haamata hoê taata poro i te aparauraa ma te na ô: “Ua ui ê na anei oe eaha ta te Bibilia e parau ra no nia i tera tumu parau?” E nehenehe atoa hoê aore ra piti taata poro e haamata i te aparauraa e te mau taata aita i atea roa i te iri aore vairaa vea turairai. E na reira ratou mai te ravehia i roto i te pororaa faanaho-ore-hia.
2. A faatia mai i te hoê tupuraa e faaite ra e mea faufaa te iri e vairaa vea turairai no te pororaa.
2 E rave rahi haapiiraa Bibilia tei haamatahia maoti teie ravea. Ei hiˈoraa, ua hinaaro te tahi piahi tuatoru e papai no nia i te mau Ite no Iehova, aita râ oia i ite i te tahi Piha a te Basileia fatata. I te hebedoma i mua, ua ite oia i te hoê iri i te fare haapiiraa tuatoru. Ua haamata oia i te haapii i te Bibilia e ua riro teie piahi ei Ite no Iehova. I teie nei, e poro atoa oia ma te faaohipa i taua mau ravea ra.
3. Eaha to vetahi manaˈo no nia i teie huru pororaa?
3 Ua faaohipa te tahi tuahine i teie huru pororaa. Te na ô ra oia: “Te vai ra o te haere mai i te iri aore ra vairaa vea turairai no te rave i te mau vea apî. Ua ite-atoa-hia vetahi tei ore i faaroo aˈenei no nia i te mau Ite no Iehova. Mea papu e maoti teie mau ravea e nehenehe ai e poro i e rave rahi taata.” Teie ta te tahi atu tuahine i parau: “E ravea apî faahiahia mau te reira no te pororaa no te mea o te taata te haere mai ia oe ra noa ˈtu e eita ratou e anaanatae nei i te reira.”
4. No te aha e mea faufaa ai ia tuu i te iri e vairaa vea turairai i te hoê â taime e vahi i te hebedoma taitahi?
4 E mea faufaa ia maiti i te hoê â vahi, hoê â mahana e hora i te hebedoma taitahi no te tuu i te iri aore ra vairaa vea turairai. E matau ïa te taata i te iteraa i te reira. I te pae hopea, e mea ohie aˈe no ratou ia haere mai no te ui i ta ratou mau uiraa aore ra no te rave i te tahi papai. Ua faanaho anei ta oe amuiraa i te pororaa i te vahi taata? Mai te peu e e, e nehenehe atoa oe e apiti atu i taua huru pororaa oaoa e te maitai no te “poro haere i te basileia o te Atua.”—Luka 9:60.