E manuïa te opereraa!

E toru hebedoma hou ta ratou tairururaa mataeinaa, e opere te mau amuiraa i te titau-manihini-raa i te taata. Tera atoa iho â ïa i teie matahiti. E pinepine e maere te taata i farii i te reira e i tae mai i te mau oreroraa parau Bibilia, te naho o te tairururaa maoti te mau rima tauturu, te haerea maitai e te auhoêraa ta tatou e faaite. (Sal. 110:3; 133:1; Isa. 65:13, 14) E manuïa anei râ ta tatou opereraa noa ˈtu e mea atea te faaearaa o te taata i te vahi tairururaa?

I muri aˈe i te tairururaa mataeinaa 2011, a ite ai i te titau-manihini-raa i to ˈna pae opani, ua papai te tahi vahine i te amaa. I matau na oia i te tapuni a patoto ai te mau Ite no Iehova. Te na ô ra o ˈna: “E fare nehenehe mau to ˈu e mea maitai ta ˈu tane. No ˈu, te vai ra ta ˈu mau mea atoa. Aitâ râ vau e oaoa nei, te ere nei au i te tahi mea. Ua faahoro vau i te pereoo e 320 kilometera no te haere i te tairururaa i te Mahana maa.” No to ˈna au i te reira, ua taniuniu i ta ˈna tane no te faaara e haere atoa o ˈna i te Tapati. “Ua faaroo vau i te mau oreroraa parau atoa e ua farerei e rave rahi Ite no Iehova. Aita vau i haumani noa ˈˈe.” A hoˈi ai i te fare, ua haapii oia i te Bibilia. E maha avaˈe i muri aˈe, ua riro ei taata poro bapetizo-ore-hia. “Auaˈe au i ite i tera titau-manihini-raa. I teie nei, ua itea ia ˈu te oaoa mau!”

E tae mai iho â vetahi tei farii i te titau-manihini-raa. E apiti anaˈe ïa ma te itoito i teie opereraa faufaa. A hopoi mai e a faaohipa i te mau titau-manihini-raa e toe ra no te poro ma te faanaho-ore-hia.

[Tumu parau tarenihia i te api 5]

E nafea ia titau manihini?

Ia porohia te taata atoa o te tuhaa fenua a te amuiraa, e mea tia ia haapoto i te parau. Ma te mata oaoa, e na ô paha oe: “Iaorana. Na te ao nei, te tutava ra matou i te opere i teie titau-manihini-raa. Teie ta oe. Ua papaihia te mau haamaramaramaraa i nia iho.” Ia tano, i te hopea hebedoma, a pûpû atoa ˈtu i te mau vea.