E Ite tatou i te mau taime atoa
1. Eaha ta tatou e haapii mai i te pororaa a Iesu i te vahine i te apoo pape?
1 E rave rahi hora to Iesu haere-noa-raa. Ua rohirohi e ua poihâ oia. A haere ai ta ˈna mau pǐpǐ e hoo mai i te maa, ua faafaaea oia i te hoê apoo pape i Samaria. E ere to ˈna tere i reira no te poro. Te haere ra hoi oia i Galilea no te rave â i ta ˈna taviniraa. Ua poro râ oia i te hoê vahine e huti ra i te pape. (Ioa. 4:5-14) No te aha? Aita roa ˈtu Iesu i faaea i te tavini ia Iehova ei “ite mau e te parau mau.” (Apo. 3:14) E pee tatou ia ˈna ei Ite no Iehova i te mau taime atoa.—Pet. 1, 2:21.
2. E nafea ia faaineine no te poro ma te faanaho ore?
2 A faaineine: E nehenehe tatou e faaineine no te poro ma te faanaho ore ma te rave i te mau papai. Mea rahi te taata poro o te rave i te mau api parau no te horoa na te mau rave ohipa i te fare toa e i te fare titoraa mori, e te tahi atu ta ratou e farerei i te reira mahana. (Koh. 11:6) E tuu noa te hoê tuahine o te ratere pinepine i te hoê Bibilia nainai e te buka Bibilia haapii i roto i ta ˈna pute. E tutava oia i te aparau i te feia e parahi ra i pihai iho ia ˈna.
3. E nafea ia haamata i te aparauraa?
3 A haamata i te aparauraa: Ia poro tatou ma te faanaho ore, aita e faufaa ia omua ma te hoê tumu parau Bibilia. Aita Iesu i haamata i te aparau i te vahine i te apoo pape ma te faaite atu e o ˈna te Mesia. Ua ani noa ˈtu râ oia maa pape e inu. Ua maere te vahine. (Ioa. 4:7-9) Maoti taua raveraa ra, ua haamata te hoê tuahine i te aparauraa i to ˈna uiraahia e e faatupu anei oia i te oroa. Aita oia i pahono “aita” no te mea e Ite no Iehova oia. Ua parau atu râ oia, “Ua maiti au eiaha e faatupu i te reira.” E pinepine e hinaaro te taata e ite no te aha, a nehenehe atu ai te tuahine e horoa i te faaiteraa.
4. No te aha te Mataio 28:18-20 e faaitoito ai ia oe?
4 Noa ˈtu e ua hope ta Iesu taviniraa itoito rahi i te fenua nei, te anaanatae noa ra oia i te pororaa e ravehia ra mai ta ˈna i rave. (Mat. 28:18-20) No reira, mai ia Iesu, to tatou Hiˈoraa, e Ite tatou o tei ineine i te faˈi i to tatou faaroo i te mau taime atoa.—Roma 10:10.