Pahonoraa i ta outou mau uiraa
◼ No te aha e titauhia ˈi te manaˈo tano no te faaohipa i te niuniu no te mau putuputuraa a te amuiraa?
No te maˈi e no te tahi atu tupuraa eita e nehenehe e ape, eita vetahi e tae i te mau putuputuraa i te Piha a te Basileia i te tahi taime. Ua faanaho e rave rahi amuiraa e ia faaroo taua feia ra i te mau putuputuraa i ǒ ratou na roto i te niuniu. Ia fanaˈo iho â te feia e hinaaro mau ra i teie ravea î i te here, e titauhia te manaˈo tano e te faanaho-maitai-raa. Na te mau matahiapo e tiaau e e haapao i te reira ia ‘ravehia hoi te mau mea atoa ma te tia e ma te nehenehe.’—Kor. 1, 14:40.
E haapao na mua te mau matahiapo i te feia poro maˈi tamau, huma, aore ra faaea fare noa no te tahi atu tumu, o ta ratou amuiraa. Oia atoa te hoê taata poro, aore ra piahi Bibilia tei haere maitai i mua, o te mau i te fare no te hoê taime no te maˈi aore ra paruparu. E taio-atoa-hia ratou. Ia ore ia navai te reni niuniu, te vai ra te tahi atu ravea, mai te haruharuraa i te putuputuraa no te feia e hinaaro mau ra i te reira.
Aita mau â e faaauraa to te maitai ia tae roa ˈtu i ta tatou mau putuputuraa. Ia amui roa ˈtu tatou i to tatou mau taeae, e ‘mahanahana tatou e ratou atoa’ e e taa maitai aˈe i te feia tae apî mai te faufaaraa ia haaputuputu. I te mau putuputuraa, mea rahi ta tatou e haapii mai i te mau faahiˈoraa, e nehenehe te mau matahiapo e tauturu ia tatou taitahi, e e ite roa ˈtu tatou i te here mahanahana o te fetii taeae. Ua tano mau â te huru aau o te hoê tuahine ruhiruhia. I to ˈna tauahiraahia a haere ai oia i rapae i te Piha a te Basileia, ua na ô oia e: “Eita oe e fanaˈo i te reira na roto i te niuniu!”—Roma 1:11, 12.
Mai ia Ana, ‘tei ore roa i faarue i te hiero,’ te tae tamau nei e rave rahi o to tatou mau ruhiruhia i te mau putuputuraa ia au i to ratou ea e tupuraa. (Luka 2:36, 37) No ratou, noa ˈtu e e faaohipahia te niuniu ia titauhia, eita te reira e mono i te tae-roa-raa ˈtu i te mau putuputuraa i te Piha a te Basileia. Ia au i to ratou hiˈoraa maitai roa, ia oaoa noa tatou i te tutava i te tae roa ˈtu i ta tatou mau putuputuraa no te haamori i to tatou Atua rahi, o Iehova.—Sal. 95:1-3, 6; 122:1.