Ua ineine anei outou no te haapiiraa?
1. Eaha ta outou e nehenehe e rave a haere ai outou i te haapiiraa?
1 O ta outou matahiti matamua anei i te fare haapiiraa aore ra aita, e farerei iho â outou, te feia apî Kerisetiano, i te mau fifi e faaheporaa apî. E taime maitai atoa râ no te “faaite i te parau mau.” (Ioa. 18:37) Ua ineine maitai anei outou no te na reira?
2. E nafea outou e ineine ai no te haapiiraa?
2 Ia manuïa outou i roto i te mau tuhaa atoa o te oraraa, ua fanaˈo outou i te faaineineraa no ǒ mai ia Iehova ra, i to outou mau metua ra, e te tavini haapao maitai e te paari. (Mas. 1:8; 6:20; 23:23-25; Eph. 6:1-4; Tim. 2, 3:16, 17) Ua ite papu ïa outou i teie nei eaha te mau fifi e tiai ra ia outou i te fare haapiiraa. Ma te ite i te mau titauraa a te Atua e te mau tupuraa ta outou e faaruru, a faaineine ia outou no te faaite i te parau mau. (Mas. 22:3) A haapao maite i te mau haapiiraa e te mau manaˈo tauturu a te Bibilia i roto i na buka e piti Les jeunes s’interrogent, na reira atoa te mau tumu parau tei taaihia i te reira i pia-tamau-hia i roto i te Réveillez-vous!
3. E nafea outou e nehenehe ai e horoa i te faaiteraa?
3 I roto i ta outou tuhaa fenua taa ê, e nehenehe outou e faaite i te parau mau ma te ravea rau. E hiˈo mai vetahi ê i to outou ahuraa e faaneheneheraa rouru au, to outou haerea e ta outou mau parau, to outou faatura i to outou mau hoa haapiiraa e orometua haapii, e oia atoa ta outou mau nota. E ite ratou e e niu papu to outou i roto i te oraraa, e e ui mai paha vetahi, “Mea taa ê roa oe, no te aha?” (Mal. 3:18; Ioa. 15:19) E taime maitai ïa no te horoa ˈtu i te faaiteraa e no te faataa ˈtu i ta outou mau tiaturiraa. (Tim. 1, 2:9, 10) I te roaraa o te matahiti, e faaruru paha outou i te mau fifi tei taaihia paha i te mau oroa here aiˈa aore ra i te tahi atu oroa. Ia anihia mai no te aha outou e ore ai e apiti atu, e parau noa anei outou, “Aita ta ˈu haapaoraa e farii ra i te reira, e Ite no Iehova vau,” aore ra e horoa roa ˈtu outou i te faaiteraa no nia i to outou Metua î i te here ra o Iehova? E faaitoito te hoê faaineineraa maitai arataihia e Iehova ia outou ia horoa i te faaiteraa au i to outou mau orometua haapii, hoa haapiiraa, e vetahi ê atu.—Pet. 1, 3:15.
4. No te aha outou e tiaturi ai e e manuïa ta outou matahiti haapiiraa?
4 Te taiâ rii ra paha outou i te haere i te haapiiraa, ia papu râ ia outou e e rave rahi te turu ra ia outou no to ratou hinaaro ia manuïa ta outou matahiti haapiiraa. Hau atu â, te oaoa ra matou e o outou i ta outou fanaˈoraa e horoa i te faaiteraa ia vetahi ê i roto i ta outou tuhaa fenua taa ê. No reira, a faaitoito e ia ineine outou no te haapiiraa!