Te faatia ra te feia poro i te Basileia
Te hotu ra te pororaa i te fare e i te fare haapiiraa
TE ORARAA o te hoê kerisetiano o te hamanimaitai-raa ïa ia vetahi ê, na roto iho â râ i te tufaraa ˈtu ia ratou i te parau apî maitai o te Basileia o te Atua. Te parau ra te Maseli 3:27 e: “Eiaha oe e tapea i te maitai i te taata e au ia ˈna ia hopoi ra, tei to rima taua maitai ra ia hopoi.” I Raparata ua hinaaro te hoê Ite apî i roto i te toruraa o te matahiti i te fare haapiiraa tuarua e tufa i te parau apî maitai o te Basileia i te hoê hoa haapiiraa. Ua noaa mai ia ˈna i to ˈna na reiraraa i te mau faahopearaa faahiahia mau.
I te hoê mahana ua parau te Ite apî i to ˈna hoa e e ere te mau haapaoraa atoa i te mea maitai. I to te taurearea pahonoraa ˈtu e aita o ˈna e rave ra i te tahi ohipa ino, ua parau te Ite e: “Aita râ oe e rave ra i te tahi mea maitai no te Atua.” Ua haaferuri te reira i te taurearea. I muri aˈe ua faataa te Ite e teie te mau mahana hopea e no te fanaˈo i te farii maitai o te Atua, e tia i te taata ia noaa te ite papu no nia i te Bibilia e ia faaohipa i te reira. Ua farii to ˈna hoa haapiiraa. E farii anei râ to ˈna utuafare e ia haapii oia i te Bibilia? No te horoa i te tahi mea ei haaferuriraa i to ˈna hoa, ua ani te Ite ia ˈna ia taio i te buka ra E nehenehe oe e ora e a muri noa ˈtu i roto i te paradaiso i nia i te fenua nei.
Ua mairi te tau, e ua faarue te hoa i te fare haapiiraa. Aita i faaroo-noa ˈˈe-hia te tahi parau no nia ia ˈna ua hau atu i te hoê matahiti te maoro. I muri aˈe i te hoê mahana ua hitimahuta te Ite apî i te taniuniuraahia mai o ˈna e to ˈna hoa o tei parau e te ite maitai ra o ˈna e te tupu mau ra te mau parau tohu a te Bibilia. Ua faanaho oioi te Ite e ia faatere oia i te hoê haapiiraa bibilia e o ˈna.
I to ˈna haereraa i te fare o to ˈna hoa haapiiraa tahito, ua tapao o ˈna e ua haapeapea te mau metua o to ˈna hoa i te ohipa o ta ta raua tamaiti e rave apî nei. Ua manaˈo atoa te taeae apî aˈe o te hoa e ua inohia to ˈna upoo. No reira ua rave te mau metua e ia apiti atoa te taeae apî aˈe i te haapiiraa no muri iho. I muri aˈe, ma te taˈi, ua faatia teie taurearea i te mau metua e aita to ˈna taeae matahiapo i maamaahia, ua parau hoi te metua vahine ia ˈna e, “Maoti i te hoê noa fifi, e piti ta ˈu i teie nei!”
No reira, i te haapiiraa no muri iho ua apiti o ˈna iho i te reira e ua tia ia ˈna ia farii e aita te upoo o te mau tamaroa i inohia. I muri aˈe ua faanahohia te hoê haapiiraa bibilia e o ˈna e ta ˈna tane. Aita i maoro ua haamata te utuafare taatoa i te haere i te mau putuputuraa o te amuiraa i te Piha no te Basileia. Ua haamata atoa te mau metua tupuna i te haapii i te Bibilia e ua haere ratou i te mau putuputuraa. Mai reira mai â, ua bapetizohia na taurearea matamua ra. Ua faaipoipo oia, e ua riro raua ta ˈna vahine ei feia poro itoito.
Hau atu, na roto i te pororaa faanaho-ore-hia i te fare haapiiraa, ua tauturu te Ite apî i e piti hoa haapiiraa ê atu e tae noa ˈtu i te metua vahine e te tuahine o te hoê o raua, ia haamata i te haapii i te Bibilia. I te taatoaraa, 11 taata o tei haapii i te parau mau o te Bibilia no te mea aita te Ite apî i haamarirau i te hamani maitai i to ˈna mau hoa haapiiraa. Auê faahopearaa oaoa mau e! Oia mau, “E ao to te feia, o Iehova to ratou Atua.”—Salamo 144:15.