Ua ineine anei ta outou tamarii?
1. No te aha ia ineine te tamarii haere haapiiraa?
1 Fatata te haapiiraa. E faaruru iho â paha ta tatou tamarii i te mau fifi e faaheporaa apî. E ravea apî atoa râ ta ratou no te faaite i te parau mau. (Ioa. 18:37) Ua ineine anei ratou?
2. Eaha te mea tia ia ite ta outou tamarii?
2 Ua taa anei i ta outou tamarii eaha te auraa e apiti i te mau oroa here aiˈa aore ra te tu ore ra i te mau Papai e no te aha e ore ai e apiti atu? Ua ineine anei ratou i te faaruru i te mau faaheporaa no te haere i te haapiiraa teitei, no te haamatau, no te inu i te ava aore ra no te rave i te raau taero? E parau noa anei ratou e aita ta ratou haapaoraa e farii ra, aore ra ua ite ratou e nafea ia faataa i ta ratou mau tiaturiraa?—Pet. 1, 3:15.
3. Ia aha te mau metua i te arui haamoriraa utuafare?
3 A faaohipa i te arui haamoriraa utuafare: E tauturu iho â te mau metua i ta ratou tamarii ia fifihia ratou. Mea au aˈe râ ia faaineine ê na ia ratou hou te haapiiraa e haamata ˈi. Eita ïa ratou e riaria. E taime maitai te arui haamoriraa utuafare no te na reira. A tauaparau no nia i ta ratou mau haapeapearaa a hoˈi ai i te fare haapiiraa. I teie nei ua paari mai ratou e ua taa maitai aˈe i te oraraa, e hiˈo-faahou-hia paha te tahi mau tumu parau o te mau matahiti i mairi. (Sal. 119:95) E nehenehe atoa outou e hauti i te hoê taata e ohipa ra i te fare haapiiraa, mai te hoê orometua, aore ra i te tahi atu piahi. A haapii ia ratou e nafea ia pahono maoti te Bibilia aore ra ia faaohipa i na buka Haaferuriraa aore ra Les jeunes s’interrogent. Ua na reira te hoê metua no te faaineine i ta ˈna mau tamarii ia faaite i ta ratou mau orometua apî, i te omuaraa o te matahiti haapiiraa, e e Ite no Iehova to ratou utuafare.—A hiˈo i te Tour de Garde o te 15 no Titema 2010, api 3-5.
4. Ma te paari, eaha ta te mau metua e rave?
4 I teie anotau hopea nei, e ere i te mea ohie no te mau Kerisetiano apî ia faaruru i te mau fifi. (Tim. 2, 3:1) Ma te paari, e feruri te mau metua i te mau fifi e nehenehe e fa mai a faaineine atu ai i ta ratou tamarii ia faaruru atu. (Mas. 22:3) Fatata te haapiiraa, a rave ïa i tei nehenehe ia ineine ratou.