Pahonoraa i ta outou mau uiraa

◼ E mea tano anei ia faaohipa te mau amuiraa aore ra te taata i te mau tapao a te mau taatiraa e au i te ture a te mau Ite no Iehova?

Te hoê tapao, o te hoê ïa iˈoa aore ra taipe o te ite-ohie-noa-hia e ma te papu. Te faahohoˈa ra te tapao Watch Tower (Pare Tiairaa) i te Watch Tower Bible and Tract Society of Pennsylvania e i te tahi atu mau taatiraa a te faanahonahoraa a Iehova. Te faaohipa ra te Association Les Témoins de Jéhovah no Tahiti i te hoê Bibilia hohorahia i nia i ta ˈna mau rata. E tapao taa ê ta te tahi atu mau taatiraa a te mau Ite no Iehova.

E mea maitai eiaha te mau amuiraa aore ra te taata ia faaohipa i te mau tapao aore i te mau iˈoa o te mau taatiraa tei au i te ture a te faanahonahoraa, aore ra i te mau tapao e iˈoa tei tuea roa, i nia i ta ratou mau Piha a te Basileia, i nia i te mau iri faaiteraa i te Piha a te Basileia, i nia i ta ratou mau rata, i nia i ta tatou iho mau taoˈa, e te vai ra ˈtu â. E nehenehe tera huru faaohiparaa i te mau tapao a te faanahonahoraa e faatupu i te taa ore o te mau tia a te Hau, te feia poro, e vetahi atu no nia i te taairaa haamanahia o te amuiraa e te mau taatiraa tei au i te ture a te faanahonahoraa. E nehenehe atoa e manaˈo-hape-hia e na te pu rahi aore ra na te amaa i farii aore ra i faatae mai i te hoê rata.

E mea maitai eiaha e faaohipa i te tapao Watch Tower (Pare Tiairaa), aore ra te tahi atu mea tuea, no te mau paturaa no a muri aˈe o te mau Piha a te Basileia. Te mau amuiraa e tapao ta ta ratou mau Piha a te Basileia, aita ïa e titauhia ra ia taui oioi i te mau iri faaiteraa aore ra te huru hamaniraa, e nehenehe hoi te reira e titau i te mau tauiraa, te taime, te tutavaraa, e te moni rahi. E mea maitai râ ia feruri e na reira mai te peu e e mea haihai te tauiraa e e ere i te mea ohipa rahi. Aita anaˈe, e nehenehe e rave i te reira ia faaapîhia te Piha a te Basileia aore ra te iri faaiteraa.